12 ¹ Ia e na vuku ni veika vayalo, oi Ikodou na veiwekani, au sa yali ni vinakatia mo dou yali ni kila. ² Dou sa kila ni dou a tiko yali lotu, dou sa yadi yani ki na veimatakau galu, me vaka ni dou sa tuberi voli vaka ka vaka. ³ O koya ko ya kau sa vatakila kinia vei ikodou, ni sa yali e dua na tamata sa vosa e na Yalo ni Kalou, me sa vosavacacataki Jisu: a sa yali e dua sa tukunia rawa ni sa Turaga ko Jisu, ke yali ni vuna na Yalo Tabu. ⁴ Ia sa duidui na ka sa soli, ia sa dua loa lia na Yalo Tabu. ⁵ Sa duidui voki lia na kena cakacaka, ia sa dua loa lia na Turaga. ⁶ Sa duidui voki lia nai valavala ni ka sa caka, ia sa dua loa lia na Kalou, o koya sa caka na ka kece lia vei ira kece lia. ⁷ A sa soli vei ira na tamata yadua nai vatakilakila ni Yalo Tabu me yaga kinia. ⁸ Sa soli vua e dua e na cakacaka ni Yalo Tabu na vosa ni vuku; vua voki e dua na vosa ni kila ka, e na cakacaka voki lia ni Yalo Tabu; ⁹ vua voki e dua na vadinatia, e na cakacaka voki ni Yalo Tabu; vua voki e dua nai solisoli me vabulai ira sa tauvi-mate, e na cakacaka voki lia ni Yalo Tabu; ¹⁰ vua voki e dua me caka na ka mana; vua voki e dua me parofisai; vua voki e dua me kila na veiyalo; vua voki e dua na vosa tani eso; vua viki e dua me lavetia na vosa tani eso: ¹¹ ia na Yalo Tabu e dua loa lia sa caka na ka kecelia koya, ni sa vota vei ira na tamata yadua me vaka sa vinakatia ko koya. ¹² Me vaka sa dua loa lia na yago, ka sa vuqa na kena tikinia, ia na tiki ni yago kece lia, sa levu lia, ka sa dua loa lia na yago: sa vaka voki lia kinia na Karisito. ¹³ Ni da sa papitaisotaki kece lia ki na yago e dua loa lia e na Yalo Tabu e dua loa lia, se da kai Jutia se da kai tani, se da bobula se dai taukei; eda sa va somi voki lia e na Yalo Tabu e dua loa lia. ¹⁴ Ni sa yali ni dua loa lia na tikina e na yago, sa levu lia. ¹⁵ Kevaka ena tukunia na yava, Oi au, kau sa yali ni tiki ni yago, niu sa yali ni liga; sa yali ni ka koya sa yali kinia ni tiki ni yago. ¹⁶ Ia kevaka ena tukunia na daliga, Oi au, kau sa yali ni tiki ni yago, niu sa yali ni mata; sa yali ni ka koya sa yali kinia ni tiki ni yago. ¹⁷ Kevaka sa mata na yago taucoko, ena qai evei na ka me rogo kinia? Kevaka e ka ni rogo na tikina kece, ena qai evei na ka me boi kinia? ¹⁸ Ia koya, sa caka na Kalou na veitiki ni yago me tu yadua, me vaka na nona lewa. ¹⁹ Ia kevaka sa dua loa lia na tikina kece lia, ena qai evei na yago? ²⁰ Ia koya, sa vuqa na tikina, a sa dua loa lia na yago. ²¹ A sa yali ni kaya rawa na mata ki na liga, Ko sa yali ni yaga vei au; se na ulu ki na yava, Drau sa yali ni yaga vei au. ²² Ia sa vakalevu cake voki oqori, a veitiki ni yago eda sa nanumia ni ra sa malumalumu, era sa yaga sara: ²³ ia na veitiki ni yagoda, eda sa nanumia sa matavinaka valailai, oqori eda sa va iukuukutakia vakalevu cake: ia na veitiki da sa yali ni lagilagi sa va lagilagitaki vakalevu cake. ²⁴ Ni sa yali ni yaga ki na veitiki da sa lagilagi vakai ira: ia na Kalou sa caka me veirauti na veitiki ni yago, a sa lewa me nanumi valevu cake oqori sa uasivi sobu: ²⁵ me kakua kina ni veisei na yago; ka me veinanumi vatautauvata na veitikina vakai ira. ²⁶ Ia kevaka sa rarawa e dua na tikina, sa rarawa vata na tikina kece lia; se dua na tikina sa dokai, sa reki vata na tikina kece lia.

²⁷ Ia koi ikodou na yago i Karisito, ka dui tikina yadua kinia. ²⁸ A sa lesi ira eso na Kalou e nai soqosoqo lewe ni lotu, a kenai matai ko ira nai apositolo, ai karua na parofita, ai katolu nai vavuvuli, sa qai muri ko ira sa daucaka-mana, kei ira, sa soli vei ira me ra vabula na tauvi-mate, ko ira era veivuke, ko ira era lewa, ko ira era kila na vosa tani eso. ²⁹ Era sai apositolo kece lia? era sa parofita kece lia? era sai vavuvuli kece lia? era sa daucaka-mana kece lia? ³⁰ era sa rawatia lece lia nai solisoli me ra vabula na tauvi-mate? era sa vosa kece lia e na vosa tani e vuqa? era sa lave vosa li ko ira kece lia?

³¹ Ia dou gadrevia vakalevu na veisolisoli vinaka sara: ia kau sa vakatakila vei ikodou nai valavala sa uasivi cake na kena vinaka.