¹ O koya ke sa reva kinia na nomu ulubale, o iko na tamata yadua sa daulewa: ni o sa beitaki iko i na nomu lewa na tani; ni o sai valavala iko vakinia o iko sa daulewa. ² Ia ita sa kila sa djina na lewa ni Kalou vi ira era sa caka na vika vake. ³ Ia o iko na tamata, sa lewai ira era sa caka na vika vake, ka sai valavala vakinia, o sa nanumia beka o na dro rawa mai na lewa ni Kalou? ⁴ se o sa beca beka na nona loloma levu vata ki na nona vosojia vadede, vata ki na nona cudru vamalua; ka o sa reva ni vakasama ni sa tuberi iko ki na vivutuni na loloma ni Kalou? ⁵ Ia o iko, me va na nomu yalokaukauwa vata ki na lomamu sa reva ni vivutuni, o sa binia jikoliga vi iko na cudru ki na siga ni cudruvi, ina varaitakia kinia na lewa dodonu ni Kalou; ⁶ o koya ena saumia na tamata yadua me va na nonai valavala: ⁷ na bula reva ni mudu, vi ira era sa gumatua jiko i nai valavala vinaka ka vasaqara nai ukuuku vata ki na varokoroko vata ki na reva ni mate rawa: ⁸ ia na cudru vata ki na lesavi vi ira era sa dauvileti, ka talaidredre ki nai vavuvuli djina, ia ka talairawarawa ki nai vavuvuli reva ni dodonu; ⁹ na rarawa vata ki na yaluma, vi ira na tamata keceliga sai valavala ca jiko, sa liu vua na Jiu, vi koya vokiliga sa matanitu tani; ¹⁰ ia nai ukuuku, vata ki na vakarokoroko, vata ki na vacegu, vi ira keceliga sai valavala vinaka, sa liu vua na Jiu, vi koya vokiliga sa matanitu tani. ¹¹ Ni sa reva ni vinakaji ira vailoa na tamata na Kalou: ¹² ni na rusa me va sa reva na vunau o ira keceliga sai valavala ca ka reva vi ira na vunau: ia ena lewai i na vunau o ira keceliga sai valavala ca ka sa tu vi ira na vunau, ¹³ ni ra ma reva ni dodonu i na mata ni Kalou o ira era sa rogocia laliga na vunau, o ira liga era sa muria na vunau era na vadonui: ¹⁴ ni ra sa caka vai ira liga na ka ni vunau o ira na vimatanitu tani, sa reva vi ira na vunau, era sa qai nodra vunau vai ira liga, ia sa djina sa reva vi ira na vunau: ¹⁵ o ira era sa vatakila sara ni sa volai i na yalodra nai valavala ni vunau, ka ni sa vadjinadjina jiko na nodra lewa-eloma vokiliga, ka ra sa dui lewa ni sa cala, se sa dodonu na nodra i valavala ¹⁶ i na siga ena lesi Jisu Karisito kinia na Kalou me lewa na nodra vika e vuni tu na tamata, me va na noqu i tukutuku-vinaka. ¹⁷ Ia kevaka o sa vatokai mo Jiu, ka o sa vararavi i na vunau, ka sa dokadokai iko i na vuku ni Kalou, ¹⁸ ka o sa kila na lomana, ka vinakajia na vika sa vinaka sara, ni o sa vatavulici mai na vunau; ¹⁹ o sa vararavi vokiliga vi iko mo tuberi ira na mataboko, mo nodra rarama era sa jiko i na butobuto, ²⁰ mo nodra i vavuvuli era sa sesewa, mo nodra i vavuvuli na gone lalai, ni sa nomu i na vunau nai vatakarakara ni vuku djina; ²¹ ia o iko, ko sa dauvatavulicia na tani, o sa reva li ni vatavulici iko? o iko, o sa dauvunau me kakua na butako, o sa bau butako o iko? ²² o iko, ko sa dautukunia me kakua na dauyalewa, o sa bau dauyalewa o iko? o iko, o sa daucajia na vimatakau, o sa bau butako mai na valenisoro? ²³ o iko, o sa dokadokai iko i na vuku ni vunau, o sa bau valialiai koya na Kalou ni o sa talaidredre ki na vunau ko ya? ²⁴ Ni sa dauvosavacacatakia na yaca ni Kalou vi ira na vimatanitu i na vukumudou, me va sa volai. ²⁵ Ni sa djina sa yaga na vicili, kevaka o sa talairawarawa ki na vunau: ia kevaka o sa talaidredre ki na vunau, sa yaco kinia na nomu cili me reva ni cili. ²⁶ Ia kevaka e dua sa reva ni cili ka sa muria nai valavala dodonu ni vunau, ena reva li ni wili na nona reva ni cili me cili? ²⁷ Ia o koya sa reva ni cili vayago, ke sa muria na vunau, ena reva li ni lewai iko, o iko sa talaidredre ki na vunau, ka sa tu vi iko nai vola vata ki na vicili? ²⁸ Ni sa reva ni Jiu o koya sa vakinia varairai laliga; ia sa reva ni vicili na ka sa rairai laliga i na yago: ²⁹ ia sa Jiu o koya sa vakinia eloma; a sa vayalo na vicili, sa ka ni yalo, ka sa reva ni ka ni vosa laliga; o koya sa reva ni doka o ira na tamata, sa doka liga o koya na Kalou.