¹ Oi au o Paula, nai talatala i Jisu Karisito, sa kacivi mei apositolo, ka lesi me'u tukunia nai tukutuku-vinaka ni Kalou, ² o koya ma yalatakia iliu o koya ka ra vosatakia na nona parofita i nai Vola Tabu, ³ ina vuku ni Luvena o Jisu Karisito na noda Turaga, o koya sa sucu mai na kawa i Tevita me va na yagona; ⁴ o koya gona ma vatakilai vakaukauwa ina tu cake voki mai na mate, ni ma Luve ni Kalou, me va na yalona savasava: ⁵ o koya kitou ma rawajia vokiliga kinia na loloma vata ki na cakacaka vaiapositolo, me ra vabaujia ka talairawarawa kinia o ira na lewe ni vivanua keceliga, ina vuku ni yacana: ⁶ dou ma kacivi oji va vokiliga kinia oi ikodou mo dou nei Jisu Karisito: ⁷ Vi ikodou keceliga sa jiko mai Roma, oi ikodou sa daulomania na Kalou, oi ikodou ma kacivi me yalosavasava: Me nomudou na loloma vata ki na vacegu mai vua na Kalou na Tamada vata ki Jisu Karisito na Turaga. ⁸ Me'u vatekivu, o Jisu Karisito au ma vavinavinakatakia kinia vua na noqu Kalou ina vukumudou keceliga, ni ma tukunia e vuravura taucoko na nomudou vabaujia. ⁹ Ni ma noqu i vadjinadjina na Kalou, o koya au ma qaravia ina vu ni yaloqu i nai tukutuku-vinaka ni Luvena, ni'u ma reva ni mudu ni cavuji ikodou ina visiga ina noqu masu; ¹⁰ ni'u ma daumasu, me dua na gauna me'u kalougata kinia ina lewa ni Kalou me'u yaco yani vi ikodou. ¹¹ Ni'u ma gadrevia valevu me'u raici ikodou, me'u solia vi ikodou nai solisoli vayalo eso, mo dou vataudeitakia kinia; ¹² me da dui vacegui ina vuku ni nomudou vabaujia vata ki na noqu vokiliga. ¹³ Ia, oi ikodou na viwekani, au ma reva ni vinakajia mo dou nanulevajia, ni'u sa nakijia valevu me'u qai yani vi ikodou, (ia au sa tarovia liga ka yacovia na siga ke,) me dua na noqu yaga ina ikodou maliwa, me va vokiliga ina kodra maliwa na vimatanitu tani. ¹⁴ ma dodonu beka liga vi au me'u sai talatala vi ira na kai Kirisi, vi ira vokiliga na lewe ni vivanua la liga; vi ira na vuku, vi ira vokiliga era sa reva ni vuku. ¹⁵ A sa vakinia, me va au sa rawajia me yaloqu sara me'u vunautakia nai tukutuku-vinaka vi ikodou vokiliga mai Roma. ¹⁶ Ni'u ma reva ni maduatakia nai tukutuku-vinaka ki Karisito: ni sai koya ke na kaukauwa ni Kalou me vabulai kinia o ira yadua era sa vabaujia: sa liu vi ira na Jiu, vi ira vokiliga sa matanitu tani. ¹⁷ Ni sa vatakilai kinia, ni sa vadonui ira na Kalou ina vabaujia me ra sa vabaujia: me va na ka sa volai, Ena bula ina vabauja o koya sa yalododonu. ¹⁸ Ni sa vatakilai mai lomalagi na cudru ni Kalou vata ki na nodra i valavala ca keceliga vata ki na nodra reva ni dodonu na tamata, era sa tarovia nai vavuvuli djina i nai valavala reva ni dodonu; ¹⁹ ni sa rairai ina kodra maliwa na ka ni Kalou sa kilai rawa; ni sa varaitakia vi ira na Kalou: ²⁰ ni ma raici kinia na vika ni Kalou e vuni tu, io, na nona kaukauwa reva ni mudu vata ki na nona tu Vakalou, ni sa kilai oji ina vika sa buli, mai na gauna sa buli kinia o vuravura; o koya ke ma reva kinia na nodra ulubale. ²¹ Io, ni ra sa kila jiko na Kalou, era sa reva ni varokorokotakia me va sa Kalou, se vavinavinakatakia; ia sa lialia mai na nodra nanumia, a sa butobuto mai na yalodra sa sesewa vokiliga. ²² Ni ra ma tukunia jiko era sa vuku, era sa lialia mai; ²³ a ra sa vaisosomitakia na serau ni Kalou sa reva ni mate rawa, ina matakau me va na tamata sa ra mate la liga, vata ki na manumanu vuka, vata ki na manumanu e yavai va, vata ki na vika sa qasi voli. ²⁴ O koya sa daini ira kinia na Kalou me ra qeleqelewa ina dodomo ni yalodra, me ra vavelavelatakia kinia na yagodra vai ira: ²⁵ ia era sa vaisosomitakia nai vavuvuli djina ni Kalou, ina ka e lasu la liga, a ra sa soro kinia ka qaravia na ka sa buli ka reva o koya sa bulia, o koya sa nona na varokoroko ka reva ni mudu. Emeni. ²⁶ O koya sa daini ira kinia na Kalou me ra muria na dodomo vasisila; ni ra sa vaisosomitaka ko ira na nodra yalewa nai valavala sa lesi ina dua tani e reva ni lesi: ²⁷ sa va vokiliga kinia o ira na tagane, ni ra sa dainia nai valavala sa lesi vata ki na yalewa, sa waqa na nodra vidomoni vai ira: a ra sa caka o ira na tagane na ka velavela sara liga vata ki ira na tagane, ma yaco kinia vi ira nai sau dodonu ni nodra caka cala. ²⁸ Ia ni ra sa reva ni vinakatakia me ra kila jiko na Kalou, sa daini ira na Kalou me ra lomavatani, me ra caka na vika e reva ni kilikili ki ira; ²⁹ me ra sinai ina ka keceliga e ca, ina yaloca, ina daukocokoco, ina dauvivacacani; me ra sinai ina vuvu, ina laba, ina veileti, ina dauvivakaisini, ina yalocudrucudru; me ra dauvasolokakana, ³⁰ me ra daukakase, me ra daucajia na Kalou, me ra vosalevu, me ra viavialevu, me ra daudokai ira, me ra dauvavunia na ca, me ra dautalaidredre kivi ira na nodra qase, ³¹ me ra reva ni yalomatua, me ra yalayala ka seseni vokiliga, ka ra sa caca viwekani, era reva ni yalololoma: ³² ia ni ra sa kila jiko na lewa ni Kalou, ni sa dodonu me mate o ira era sa caka na vika vake, era sa reva ni caka la liga o ira, era sa dauvinakaji ira vokiliga era sa daucaka.