¹ Me ra talairawarawa vi ira na turaga levu o ira na tamata keceliga. Ni sa reva na turaga sa tubu laliga, mai vua liga na Kalou: o ira era sa turaga tu, sa lesi ira na Kalou. ² Ia o koya sa vorajia na turaga, sa vorajia nai lesilesi ni Kalou: ia ena cudruvi o ira era sa vorajia. ³ O ira na turaga era sa reva ni vu ni rere vi ira sa caka vinaka, vi ira liga sa caka ca: o sa qai gadrevia li mo reva ni rerevakia na turaga? mo caka na ka e vinaka, ena qai dokai iko kinia o koya: ⁴ ni sa nona talai na Kalou o koya vi iko mo vinaka kinia. Ia ke o sa caka ca, mo rere liga; ni sa reva ni tauria laliga nai seleiwau o koya: ni sa nona talai na Kalou, me cudruvi koya sa caka ca. ⁵ O koya ke ma dodonu kinia mo dou talairawarawa, e reva vokiliga i na vuku ni cudru, i na vuku vokiliga ni lewa-eloma. ⁶ O koya mo dou qai caka vokiliga na soli: ni ra sa nona talai na Kalou, ra sa qaravia jiko na ka ke. ⁷ O koya mo dou qai solia vi ira keceliga na ka e dodonu: na soli vi ira sa nodra nai solisoli; ai sigana vi ira sa nodra nai sigana; dou rerevaki ira e dodonu me ra rerevaki: varokorokotaki ira e dodonu me ra vakarokorokotaki. ⁸ Me reva na nona ka e dua o sa reva ni saumia, na dauvilomani liga me caka jiko; ni sa muria na vunau taucoko o koya sa daulomania na tani. ⁹ Io, ke: Mo reva ni caka na vibutakoci, Mo reva ni laba, Mo reva ni butako, Mo reva ni kocokoco; ia ke sa dua voki nai varo, sa tu vata keceliga i na vosa ke, Mo lomania na kai nomu me va o sa lomani iko. ¹⁰ O koya sa dauloloma sa reva ni caka ca vua na kai nona: o koya ke sa caka kinia na vunau taucoko o koya sa dauloloma. ¹¹ Ia ke, ni da kila na gauna, ni sa gauna ke mo dou yadra kinia mai na moce; ni sa qai voleka na noda bula, ka yawa i na gauna ni noda vabaujia. ¹² Sa varau oji na bogi, a sa voleka na siga: o koya me da qai luvajia tani nai valavala ni butobuto, ka me da vaiyaragi tu i na rarama. ¹³ Me da qai voli me va e kilikili, me va i na siga; me reva nai soqosoqo lialia, se na mateni, me reva na daudara se nai valavala velavela, me kakua na vileji se na vuvu. ¹⁴ Ia dou vaisulu i na Turaga o Jisu Karisito, ka reva ni caka me varau ki na gagadre ca ni yago.