¹ O koya ke, au sa vamamasu vi ikodou, na viwekani, i na vuku ni loloma valevu ni Kalou, mo dou solia na yagomudou mei madrali bula, me savasava, me vinaka vua na Kalou, me nomudou i soro vayalo. ² Ia dou kakua ni vatauvatani ikodou vata ki ira ra sa vavuravura: ia dou mataliatakia liga ni sa vavoui na yalomudou, mo dou kila rawa kinia na loma ni Kalou, sa yaga, ka vinaka, ka dodonu sara liga. ³ Ia i na loloma sa soli mai vi au, au sa tukunia vi ira na tamata yadua vi ikodou, me kakua e dua me dokai koya me va sa reva ni dodonu me dokai koya; me yalomatua liga na nona nanumia, me va nai varau ni vabaujia sa vota na Kalou vi ira yadua. ⁴ Me va sa dua bauliga na yagoda, ka levu na jikida, ia ka sa reva ni vaitavi vata na jikida keceliga; ⁵ sa vakinia oi kita, na lewe levu, kita sa yago vata ni da tu vata ki Karisito, kita sa vijikina va vokiliga vai kita. ⁶ Ni da sa rawajia na visolisoli sa duidui me va na loloma sa soli vi kita: ke sa parofisai, me da parofisai me va nai varau ni noda vabaujia; ⁷ se na dauvivota, me da caka na vivota; se o koya sa dauvatavuvuli, me vavuvuli jiko; ⁸ se o koya sa dauvunau, me vunau jiko; o koya sa caka na dausolisoli, me djina na lomana; o koya sa daulewa, me gumatua kinia; o koya sa dauloloma, me caka i na reki. ⁹ Me reva ni seseni na loloma. Mo dou cajia sara na ka ca; mo dou kabijia sara liga na ka vinaka. ¹⁰ Dou vilomani sara i na vilomani ni vitacini; dou viuasiviji i na vivarokorokotaki; ¹¹ i na gumatua mo dou kakua ni vucesa mai: me katakata na yalomudou; mo dou qaravia na Turaga; ¹² dou reki i nai nuinui; vosojia na ka rarawa; caka jikoliga na masu: ¹³ vivotayakia vi ira na dravudravua ra sa lotu; dauvacegui ira na vulagi. ¹⁴ Dou vosavakalougatataki ira ra sa vacacani ikodou: vosavakalougatatakia liga, ka reva ni rukaka. ¹⁵ Dou reki vata ki ira era sa reki, ka tagi vata ki ira era sa tagi. ¹⁶ Dou lomavata jiko vai ikodou. Kakua ni nanumia na vika vaturaga, ia mo dou viriti vata ki ira na tamata lalai. Dou kakua ni vakasami ikodou ni dou sa vuku. ¹⁷ Kakua ni visausaumitakia na nona ca e dua. Nakijia iliu na vika sa dodonu i na matadra na tamata keceliga. ¹⁸ Ke sa rawa, mo dou vatovolea me vilomani vata ki ira na tamata keceliga. ¹⁹ Oi ikodou sa lomani dou reva ni saumia na ca sa caka vi ikodou, ia mo dou dainia vua na Kalou me saumia; ni sa volai; A noqu i tavi me'u cudruvakia; au na saumia liga oi au, sa tukunia na Turaga. ²⁰ O koya mo qai vakania na nomu meca, ke sa viakana; ke sa viasomi, mo vasomicia koya: o na binia kinia ki na uluna na qilaiso sa waqa tu ni o sa caka vake. ²¹ Me kakua ni rawai iko na ca, mo rawa liga na ca i na vinaka.