¹ Ia au ma rogocia voki e dua na domo levu mai na valenilotu, sa tukunia vi iratou na agilose e le vitu, "Dou qai, ka sovarakia yani na bilo e vitu ni cudru ni Kalou ki vuravura." ² Sa qai na kenai matai, sa sovarakia na nona bilo ki vuravura; sa tauvi ira na tamata na vidikoso ca e rarawa sara, o ira sa tu kinia nai vatakilakila ni manumanu vata ki ira sa varokoroko ki na nona matakau. ³ Ia nai karua ni agilose sa sovarakia na nona bilo ki na wasawasa; sa vuki kinia me va na dra ni tamata mate: ia sa mate na ka keceliga sa bula voli ina wasawasa. ⁴ Ia nai katolu ni agilose sa sovarakia na nona bilo ki na viuciwai vata ki na vivurevure ni wai; ra sa vuki kinia me dra. ⁵ Ia au ma rogocia na agilose ni viwai ni sa tukunia, Oi ikonu na yalododonu, ikonu sa bula ni kua, ikonu ma bula eliu, ikonu sa yalosavasava, ikonu sa lewa vake. ⁶ Ni ra sa vadavea na dra ni tamata yalosavasava vata ki na dra ni parofita o ira ke, ikonu sa qai solia vi ira na dra me ra somicia; sa dodonu me vakinia vi ira. ⁷ Ia sa dua tani voki au ma rogocia mai nai cabocabo ni soro, sa tukunia, E va liga ke, na Turaga na Kalou Kaukauwa, sa djina ka dodonu na nomunu lewa. ⁸ Ia nai kava ni agilose sa sovarakia na nona bilo i na matanisiga; sa soli vua me vavisai ira na tamata ina bukawaqa. ⁹ Ra sa visa na tamata ni sa katakata valevu, Ra sa vosavacacatakia na Kalou, o koya sa lewa rawa na vimate ca ke: Ra sa reva ni vivutuni me ra varokorokotaki koya. ¹⁰ Ia nai kalima ni agilose sa sovarakia na nona bilo ki nai jikojiko ni manumanu; sa butobuto na nona matanitu; ra sa kajia na yamedra ina vuku ni rarawa, ¹¹ ka vosavacacatakia na Kalou ni lomalagi ina vuku ni nodra rarawa vata ki na nodra vidikoso, ra sa reva ni vivutunitakia na nodra i valavala. ¹² Ia nai kaono ni agilose sa sovarakia na nona bilo ki na uciwai levu o Uferetisi; sa dji kinia na kena wai, me caramaki na nodra sala na tui mai natuicake. ¹³ Ia au ma raicia voki e le tolu na yalo velavela ratou sa va na boto, ratou sa qai mai na gusu ni gata levu, mai na gusuna vokiliga na manumanu, mai na gusuna vokiliga na parofita seseni. ¹⁴ Ni ratou sa yalo ni tevoro o iratou, ratou sa caka na cakacaka mana, ratou sa qai yani vi ira na tui ni vivanua vata ki vuravura taucoko, me vasoqoni ira vata ki nai valu ni siga djina ko ya ni Kalou Kaukauwa. ¹⁵ ("Raicia! Au sa qai mai me va na daubutako! Sa kalougata o koya sa vatawa, sa tauria jiko na nonai sulu, de qai voli ka televua, ia ka ra raicia na nona televuwa.") ¹⁶ A ratou sa vasoqoni ira vata i na vanua na yacana i na vosa va Iperiu o Amaketone. ¹⁷ Ia nai kavitu ni agilose sa sovarakia na nona bilo ina macawa; sa rogo mai na domo levu, mai na valenilotu mai lomalagi, mai nai jikojiko vaturaga, sa tukunia, "Sa caka oji." ¹⁸ Sa rogo na domo ni vosa vata ki na kurukuru, ka tibi na livaliva; sa tavuki valevu na vanua, sa reva ni vakinia mai nai vatekivu ni nodra jiko i vuravura na tamata, ka me tavuki vakaukauwa, ka valevu vakinia. ¹⁹ Sa tawase vajikitolu na koro levu, ia sa bale na vikoro i na vivanua; sa mai vananumi o Papiloni na koro levu i na mata ni Kalou, me soli kinia na bilo ni waini ni nona cudru waqawaqa. ²⁰ Sa dro tani yani na viyanuyanu keceliga, ia na viulunivanua sa reva ni raicia. ²¹ Sa lutuki ira na tamata na uca cevajia levu mai lomalagi, a kena bibi e dua na taledi. Ra sa vosavacacatakia na Kalou o ira na tamata i na vuku ni mate ca ni uca cevajia; ni sa ka levu sara na mate ca ke.