¹ Ia au raicia e dua tani voki nai vatakilakila mai lomalagi, na ka levu e vivareucalataki, e le vitu na agilose sa tauria e vitu na mate ca sa kenai ojioji sara liga; ni sa vayacori sara vi ira na cudru ni Kalou. ² Ia au ma raicia voki e dua na ka e va na wasa iloilo sa viwaki vata ki na bukawaqa; ia o ira ra sa gumatua vua na manumanu vata ki na nona matakau vata ki nai wiliwili ni yacana, ra sa tu ina wasa iloilo, ra sa tauria na viapi ni Kalou. ³ Ra sa meketakia na meke i Mosese nai talatala ni Kalou vata ki na meke ni Lami, ka tukunia, A ka levu ka vivakurabuitaki na nomunu cakacaka, na Turaga na Kalou Kaukauwa; sa dodonu ka djina na nomunu valavala, oi ikonu na Tui ni vigauna keceliga. ⁴ O cei me reva ni rerevaki ikonu, na Turaga, ka varokorokotakia na yacamunu? Ni sai ikonu liga sa yalosavasava: o ira keceliga na vivanua ra na qai mai ka cuva ina matamuni; ni sa vatakilai mai na nomunu cakacaka dodonu. ⁵ Ia ma oji au sa varaicia voki ni ma dola tu na vale ni jikina tabu ni viyalayalati mai lomalagi. ⁶ Ia o iratou na agilose e le vitu ratou sa qai mai na valenilotu, ratou sa tauria na mate ca e vitu, ratou vaisulu ina lineni savasava sara ka vulavula, sa vau na lomaseredratou ina wa koula. ⁷ A sa dua vi iratou na ka bula e le va sa solia vi iratou na agilose e le vitu na bilo koula e vitu sa sinai ina cudru ni Kalou, o koya sa bula liga ka reva ni mudu. ⁸ Sa sinai na valenilotu ina kubou mai nai ukuuku ni Kalou, mai na nona kaukauwa vokiliga; sa reva na tamata sa curu rawa ki na valenilotu, ina vayacori mada eliu na mate ca e vitu sa tauria o iratou na agilose e le vitu.