¹ A sa dua na ka levu vivakurabuitaki sa rairai mai lomalagi; sa dua na yalewa sa vaisulu ina matanisiga, sa tu i ruku ni yavana na vula, a sa vaisala ina kalokalo jinikarua: ² ia ni sa bukete sa qoqolou, ni sa taratara me vasucu. ³ Sa dua vokiliga na ka vivakurabuitaki sa rairai mai lomalagi; sa dua na gata levu damudamu, sa vitu na uluna ka jini na nonai leu, ka vitu nai sala vaturaga sa toka i uluna. ⁴ Sa yaratakia nai katolu ni wase ni kalokalo ni lomalagi na buina, ka daini ira ki vuravura: Sa tu ina mata ni yalewa na gata levu ni sa varau me vasucu, ka me kania sara na luvena ni sa qai sucu mai. ⁵ Sa vasucumia o koya na gonetagane, sa lesi me lewai ira na vimatanitu keceliga i nai jitoko kaukamea: sa kau yani na luvena vua na Kalou, ki na nonai jikojiko vaturaga vokiliga. ⁶ Sa dro na yalewa ki vikau, ki na dua na jikinia ka varautakia na Kalou, me nona me ra vakani koya kinia ka dua na udolu ka rua na drau ka onosagavulu na siga. ⁷ Sa tubu nai valu mai lomalagi; o Maikeli vata ki ira na nona agilose era sa vivala vata ki na gata levu; a sa caka vata nai valu na gata levu vata ki ira na nona agilose. ⁸ Ra sa reva ni gumatua: sa reva voki ni raicia e dua na nodra jikinia mai lomalagi. ⁹ Sa dainia tani na gata levu, na gata makawa, a yacana na Tevoro vata ki Setani, o koya sa temaki ira keceliga na kai vuravura: sa dai ki vuravura, ra sa dai vata kaya na nona agilose. ¹⁰ Au sa rogocia e dua na domo levu mai lomalagi, sa tukunia, Sa qai yaco na bula vata ki na kaukauwa vata ki na matanitu ni noda Kalou vata ki na kaukauwa ni nona Karisito: ni sa dai sobu o koya sa daubeitaki ira na wekada, o koya ke sa beitaki ira jikoliga ina mata ni Kalou ina siga vata ki na bogi. ¹¹ Ra sa rawai koya ina vuku ni dra ni Lami vata ki na vuku ni vosa ra sa tusanakia; ia ra reva ni vinakajia na nodra bula, ra sa bole mate liga. ¹² O koya ke mo reki kinia na lomalagi vata ki ikodou sa jiko kinia. Dou na ca oi ikodou sa jiko i vuravura vata ki na wasawasa: ni sa qai sobu vi ikodou na tevoro, sa cudru sara valevu, ni sa kila o koya ina reva ni dede na nona gauna. ¹³ Ia ni sa raicia na gata ni sa dai o koya i vuravura, sa qai vacacania na yalewa sa vasucumia na gonetagane. ¹⁴ Sa rua na taba ni ikeli levu sa soli vua na yalewa, me vuka kinia o koya ki na vikau ki na nona tikinia, sa qai maroroi kinia i na dua na gauna vata ki na gauna voki eso vata ki na vimama ni gauna, mai na mata ni gata. ¹⁵ Ia na gata levu sa luwarakia na wai mai na gusuna e va na dobui, me davemuria na yalewa, me vacirimia tani ina waluvu. ¹⁶ Sa vukei koya na yalewa o vuravura, ni sa dalaga na gusuna o vuravura, ka sa tilomia na dobui sa luwarakia na gata levu mai na gusuna. ¹⁷ Sa cudru vua na yalewa na gata levu, ka qai caka na vivala vata ki ira na kena vo ni nona kawa, o ira sa vabaujia na vosa ni Kalou, ka tauria jikoliga nai tukutuku ki Jisu. ¹⁸ Ia, na gata levu sa tucake tu ina nuku ni matasawa