¹ A sa dua na gasau sa soli vi au e va nai jitoko; a sa tu na agilose, ka tukunia, "Mo tu cake, ka varaujia na vale ni Kalou, ki nai cabocabo ni soro, vata ki ira ra sa lotu kinia." ² Ia na lomanibai e taudaku ni vale, mo reva ni varaujia: ni sa soli gona kivi ira na vimatanitu tani: ia ra na butukia na koro tabu ka vula vasagavulu ka rua. ³ Au na solia vi rau na noqu i talatala, me rau parofisai rawa ka siga e dua na udolu ka rua na drau ka onosagavulu, ka rau na vaisulu ina i sulu taga. ⁴ Na kau ruarua ke na yacana na olive vata ki nai tutu ni cina e rua sa tu i na mata ni Turaga vata ki vuravura. ⁵ Ia ke dua na tamata sa via vacacani rau, sa qai mai na gusudrau na bukawaqa, ka kania sara liga na nodrau meca: ia ke dua na tamata sa via vacacani rau, ina vamatei liga vake. ⁶ Rau sa rawajia me sogojia na lomalagi, me reva ni tau na uca i na gauna rau sa vunau kinia: rau sa rawajia vokiliga me vukicia na wai kece me dra, me rau yaviji vuravura vokiliga i na mate ca kece, me va na nodrau vitalia. ⁷ Ia ni rau sa vaojia na nodrau i tukutuku, ina vivala vata ki rau na manumanu sa qai mai bulubulu sa reva ni vabotona, ina kaukauwa vi rau o koya, ka vamatei rau. ⁸ Ia ina dai laliga tu na yagodrau sa mate i na sau la ni koro levu, sa vatokai vaibalebale o Sotoma vata ki Ijipita, sa lauvako vokiliga kinia i na kauveilatai na nodrau Turaga. ⁹ Ia o ira na vimatanitu vata ki na vimataqali vata ki na duivosavosa vata ki na vivanua, era na raicia na yagodrau sa mate ka tolu na siga vata ki na vimama ni dua voki na siga, a ra na reva ni dainia me buluji na yagodrau i nai bulubulu. ¹⁰ O ira vokiliga ra jiko i vuravura ra na reki ni rau sa mate, ka marau valevu, a ra na dui visoliyakia na nodra ka ni loloma; ni rau sa vararawataki ira ra sa jiko i vuravura oi rau na parofita ke. ¹¹ Sa oji e tolu na siga vata ki na vimama ni ka va ni siga, sa qai curumi rau na Yalo ni bula mai vua na Kalou, a rau sa tucake tu kinia; a sa ka levu na rere sa kani ira ra sa raici rau. ¹² Rau sa rogocia e dua na domo levu mai lomalagi ma tukunia vi rau, "Drau qai cake mai ki ke." Rau sa qai cake ki lomalagi ina o; sa raici rau o ira na nodra meca. ¹³ Ina jiki ni siga liga ko ya sa tavuki valevu kinia na vanua, sa bale nai katini ni wase ni koro, sa le vitu na udolu na tamata sa vamatei, ni sa tavuki na vanua: o ira sa vo ra sa rere vokiliga, ka vavinavinaka vua na Kalou ki lomalagi. ¹⁴ Sa qai oji nai karua ni ka ca; ka raicia, sa qai vatotolo sara mai nai katolu. ¹⁵ Sa qai uvucia na davui nai kavitu ni agilose; sa muri eso na vosa sa domo levu mai lomalagi, sa tukunia, Na matanitu vata ki na vuravura ke sa qai yaco me nona na noda Turaga, a nei koya na nona Karisito; ia na lewa o koya ka reva ni mudu. ¹⁶ O ira na qase e le ruasagavulu ka va, ra sa jiko ina nodra i jikojiko ina mata ni Kalou, ra sa cuva vatoboicu, ka varokoroko ki na Kalou, ¹⁷ ka tukunia, Kitou sa vavinavinaka vi ikonu, na Turaga na Kalou Kaukauwa, ikonu sa bula ni kua, ikonu a bula iliu, ikonu na bula vokiliga mai muri; ni ikonu sa yadjia vi ikonu na nomudou kaukauwa levu, ka lewa jiko. ¹⁸ O ira na vimatanitu ra sa cudru, ia sa yaco djina mai na nomudou cudru vata ki na nodra gauna na mate, me ra saumia kinia, mo dou solia vokiliga vi ira na nomudou i talatala na parofita na kodrai sau, vi ira vokiliga na tamata yalosavasava, vi ira vokiliga ra rerevakia na yacamunu, se ra turaga se ra tamata lalai; mo nu vakawabokotaki ira ra sa vakawabokotaki vuravura. ¹⁹ Sa dola na valenilotu ni Kalou mai lomalagi, sa rairai i na nona vale na kato ni vola ni viyalayalati: sa qai muri na livaliva vata ki na vosa vata ki na kurukuru vata ki na tavuki ni vanua vata ki na uca cevajia levu.