¹ Ni sa savulaci, ra sa bosei Jisu o ira keceliga na bete levu vata ki ira na nodra matua na tamata, me ra vamatea; ² ia ni ra sa vesukia, ra sa yadjia tani, ka soli koya vi Ponitio Pailato na kovana. ³ Ia o Jutasa, o koya ma soli koya yani, ni sa raicia sa lewai o koya me mate, sa qai vivutuni, sa vasuka na jiki ni siliva e tolusagavulu vi ira na bete levu vata ki ira na matua, ⁴ ka tukunia, "Au sa cala ni'u ma soli koya sa reva nona cala me mate." A ra sa tukunia, "Sa bale vacava vi kitou? Sa baleji iko liga." ⁵ Sa dainia o koya na vijiki ni silia i na vale ni soro, sa curu yani; ka qai kunaji koya. ⁶ A ra sa yadjia na vijiki ni siliva o ira na bete levu, ka tukunia, "Sa reva ni tara me dai i na kato ni kamunaga ni vale ni soro, ni sai sau ni mate." ⁷ A ra sa qai bosea, ka volia kinia na jiki ni vanua ni dautuli kuro, me ra bulu kinia na vulagi. ⁸ O koya gona sa vatokai kinia na jiki ni vanua gona, na jiki ni vanua ni dra, ka yacovia na siga ni kua. ⁹ Sa qai vayacori na ka sa vosatakia o Jeremaia na parofita, ka tukunia, "Era na yadjia na jiki ni siliva e tolusagavulu, mei voli ki koya sa volitaki, o koya ra sa volia o ira eso na luve i Isireli, ¹⁰ a ra sa solia mei voli ni jiki ni vanua ni dautuli kuro; me vaka sa vosa vi au na Turaga." ¹¹ Sa tu o Jisu i na mata ni kovana, sa tarogi koya na kovana ka tukunia, "O sa nodra Tui na kai Jutia, se reva?" Sa tukunia vua o Jisu, "O sa tukunia djina mai." ¹² Ia ni ra sa beitakia o ira na bete levu vata ki ira na matua, sa reva ni vosa o koya. ¹³ Sa qai tukunia vua o Pailato, "O sa reva beka ni rogocia na kena levu ni ka ra sa beitaki ikonu kinia?" ¹⁴ Sa reva voki ni saumia o koya e dua na nona vosa; sa kurabui valevu kinia na kovana. ¹⁵ Sa dau nonai varau na kovana i na kana vata ni qai sivia gona me sereki vi ira na le levu e dua na tamata vesu, o koya ra sa djigitakia. ¹⁶ Sa jiko vi ira e dua sa vesu tu, sa vairogorogo sara, o Parapa na yacana. ¹⁷ O koya, ni ra sa soqoni vata mai, sa tukunia kinia vi ira o Pailato, "O cei dou sa vinakatakia meu serekia vi ikodou? O Parapa se o Jisu, o koya sa vatokai na Karisito?" ¹⁸ Ni sa kila o koya ra ma soli koya yani ni ra sa vuvutaki koya. ¹⁹ Ia ni sa jiko sobu o koya i nai jikojiko ni vilewai, sa yadjia yani vua na wajina nai tukutuku, ka tukunia; "Me kua ni dua na ka mo caka vua na tamata dodonu ke: au sa rarawa valevu ni kua ni'u sa tadrai koya. ²⁰ Sa qai vamasuji vi ira na le levu o ira na bete levu vata ki ira na qase, me ra kerei Parapa, ka me mate o Jisu. ²¹ Sa qai vosa na kovana ka tukunia vi ira, "O cei vi rau na le rua ke, dou sa vinakatakia meu serekia vi ikodou?" Ra sa tukunia, "O Parapa." ²² Sa tukunia vi ira o Pailato, "Na cava meu qai caka vi Jisu, o koya sa vatokai na Karisito?" Ra sa tukunia keceliga vua, "Me lauvako liga i na kauveilatai." ²³ Sa qai tukunia na kovana, "Na cava na ka ca sa caka o koya?" A ra sa qai qoqolou valevu i colo ka tukunia, "Me lauvako liga i na kauveilatai." ²⁴ Ni sa raicia o Pailato ni sa reva ni yaco na nona vosa, ka sa mauwe mai o ira na tamata, sa qai yadjia e dua na wai, sa vuluvulu i matadra na le levu, ka tukunia, "O au, au na reva ni tarogi i na vuku ni nona mate na tamata dodonu ke: sa baleji konu liga." ²⁵ Sa ra qai vosa kece na tamata, ka tukunia, "Me baleji kimamu vata ki ira vokiliga na luvei kimamu, na nona mate." ²⁶ Sa qai sereki Parapa vi ira o koya, ia ni sa rubilaki Jisu oji, sa qai solia yani me vakoji i na kauveilatai. ²⁷ Ia o ira na sojia ni kovana ra sa yadji Jisu i na vale ni turaga, ka vasoqoni ira vata kinia na mata sojia taucoko. ²⁸ A ra sa luvajia na nonai curucuru, ka vacuruya e dua nai sulu damudamu. ²⁹ Ka ra sa qai talia e dua nai sala i na wa-votona, ra sa vaisalataki koya kinia, ka dainia i ligana i matau e dua na dravo, ra sa tekiduru i matana, ra sa valialiai koya, ka tukunia, "Sa loloma, na nodra Tui na kai Jutia!" ³⁰ A ra sa kasuvia, ka tauria na dravo, ka warocia i uluna. ³¹ Ia ni ra sa valialia oji, ra sa luvajia vua na nonai curucuru, ka daramakia vua na nonai curucuru djina, ka yadjia yani me ra vakojia i na kauveilatai. ³² Ia ni ra sa qai yani, ra sa raicia e dua na kai Kirini, o Saimoni na yacana: o koya ra sa vasauraratakia me cola na nona kauveilatai. ³³ Ia ni ra sa yaco i na vanua sa vatokai o Kolikoca, ( kenai balebale, Na vanua ni qavokavoka,) ³⁴ ra sa solia vua na wai wiwi sa viwaki vata na ka gaga me somia: ia ni sa tovolea o koya, sa bese ni somia. ³⁵ Ra sa qai vakojia i na kauveilatai, ra vota na nonai curucuru, i na vawiri madigi: me vayacori kinia na ka sa vosatakia na varovita, "Ra sa vota vi ira na noqui curucuru, ia na noqui tutuvi ra sa ia kinia na vawiri madjigi." ³⁶ Ra sa jiko sobu ka vatawai koya mai kinia. ³⁷ A ra sa vakojia i colo donuya na uluna nai vola ni ka sa beitakia vua: "KE O JISU NA NODRA TUI NA KAI JUTIA." ³⁸ Sa qai lauvako vata ki koya i na kauveilatai e le rua na daubutako, dua i na ligana i matau, ka dua i na ligana i mawi. ³⁹ Ia o ira na qai jiko, ra sa vosavacacataki koya, ni ra sa kuretakia na uludra, ⁴⁰ ka tukunia, "O Ikonu sa basukia na vale ni soro ka tara i na bogi e tolu, vabulai ikonu mada: ke o sa Luve ni Kalou, mo siro sobu mai na kauveilatai." ⁴¹ Sa vavokiliga kinia o ira na bete levu vata ki ira na vunivola, vata ki ira na matua, ra sa valialia, ka tukunia, ⁴² "O koya sa dau vabulai ira na tani; sa reva ni vabulai koya rawa: Sa nodra Tui na Isireli o koya, me siro sobu ni kua mai na kauveilatai, kimamu na qai vabauji koya" ⁴³ Sa dau vararavi o koya vua na Kalou; me vabulai koya ni kua, ke vinakaji koya; ni sa tukunia, "O au na Luve ni Kalou." ⁴⁴ O rau vokiliga na daubutako, ratou ma vakoji vata i na kauveilatai, rau sa valialiai koya vokiliga. ⁴⁵ Sa qai butobuto na vanua taucoko, sa vatekivu mai nai kaono ni aua ka yacovia nai ka ciwa ni aua. ⁴⁶ Ia i nai ka ciwa ni aua, sa kaci o Jisu i na domo levu, ka tukunia, "Ilai, Ilai, lama sa sapakicani?" na kenai balebale, "Noqu Kalou, noqu Kalou, o sa daini au i na vuku ni cava?" ⁴⁷ Ia ka so vi ira sa tu voleka, n i ra sa rogocia, ra sa tukunia, "Na tamata ke sa kacivi Ilaija jiko." ⁴⁸ Sa cici sara e dua vi ira, sa tauria e dua na vutovuto, ka vasuasua i na wai wiwi, ka vivigia i na dua na dravo, sa vasomi koya kinia. ⁴⁹ Sa tukunia o ira na kena vo, "Dainia mada; me da raicia se na qai mai o Ilaija me mai vabulai koya se reva." ⁵⁰ Ia o Jisu ni sa kaci voki i na domo levu, sa qai daini koya na yalona. ⁵¹ Ka raicia, sa wase rua nai laji ni vale ni soro mai na jikinia i colo ka yadjia ira; sa tavuki na vanua, sa kavida rua na vivatu lelevu; ⁵² sa tadola na vibulubulu; sa levu vokiliga na yagodra na yalododonu ra ma moce tu, sa tucake voki mai; ⁵³ ia ni sa tucake voki mai na mate o koya, ra sa qai mai na vibulubulu, ka qai i na koro tabu, sa qai rairai vi ira na le levu. ⁵⁴ Ia na turaga ni valu, vata ki ira ra sa jiko vata me vatawai JIsu, ni ra sa raicia na tavuki ni vanua, vata na vika sa yaco, ra sa rere valevu, ka tukunia, "Sa djina liga sa Luve ni Kalou o koya ke." ⁵⁵ A ra sa le levu vokiliga na yalewa ra sa vararai tu mai vayawa, o ira ma muri Jisu mai Kalili, ni ra sa dauqaravi koya: ⁵⁶ ma dua vi ira o Meri na yalewa ni Makitala, vata ki Meri na jinai Jemesa vata ki Josese, vata ki na jinadrau na luvei Sepete. ⁵⁷ Ia ni sa raiyavi, sa qai mai e dua na tamata vutuniyau, na kai Arimacea, na yacana o Josefa, o koya vokiliga ma tisaipeli ni Jisu: ⁵⁸ sa qai vi Pailato o koya, ka kerea na yagoi Jisu. Sa qai tukunia o Pailato me soli na yagona. ⁵⁹ Sa yadjia na yagona o Josefa, ka ologia i na dua nai sole lineni sa savasava, ⁶⁰ sa vadavoa i na nonai bulubulu vou, ka taya o koya i na vatu: sa vaqiqicia e dua na vatu levu i na darava ni bulubulu, ka qai voki yani. ⁶¹ Sa jiko mai kinia o Meri na yalewa ni Makitala, vata ki Meri kadua, rau sa dabe ka donuya nai bulubulu. ⁶² ia i na savulaci i na siga sa taravia na siga Varau, ra sa soqoni vata vi Pailato o ira na bete levu vata ki ira na Farisi, ⁶³ ra sa tukunia, "Ikonu na Turaga, kitou sa nanumia ni sa tukunia na dauvicalai gona, ni sa bula jiko, 'Me oji mada e tolu na bogi na qai tucake voki mai.' ⁶⁴ O koya mo dou qai lewa me sogo vakaukauwa nai bulubulu me oji mada nai katolu ni bogi, de ra qai mai na nona tisaipeli, ka butakocakia ka qai tukunia vi ira na tamata, "Sa tucake voki mai na mate o koya: na qai levu cake kinia na vivacalai i muri, ka ca valaiali koya iliu." ⁶⁵ Sa qai tukunia vi ira o Pailato, "Sa tu liga vi Ikodou nai vatawa eso: dou qai, dou vadeitakia me va dou sa kila." ⁶⁶ A ra sa qai, ra sogojia vakaukauwa nai bulubulu, ka dregajia na vatu, ka lesia eso na sojia me ra yadravia.