¹ Ni sa vaojia o Jisu na vosa keceliga ke, sa tukunia vi ira na nona tisaipeli, ² "Dou sa kila sa vo liga e rua na bogi me qai caka na kana vata ni qai sivia: na qai soli yani na Luve ni tamata me lauvako i na kauveilatai." ³ Ra sa qai soqoni vata o ira na bete levu vata ki ira na vunivola, vata ki ira na nodra matua na tamata, i na vale ni bete levu o Kaiafa na yacana, ⁴ a ra sa bose me ra bukiveretaki Jisu me ra tauria ka vamatea. ⁵ A ra sa tukunia, "Me kua ni ia jiko na kana vata, de ra maue kinia na tamata" ⁶ Ia ni sa jiko o Jisu mai Pecani i na vale ni Saimoni na vukavuka, ⁷ sa qai mai vi koya e dua na yalewa sa tauria e dua na tavaya alapasita waiwai talei sara, sa sova i uluna, ni sa jiko o koya me kana. ⁸ Ia ni sa raicia o ira na nona tisaipeli, ra sa cudru sara ka tukunia, "Sa dainia la liga ke i na vuku ni cava? ⁹ Sa rawa ni volitaki na waiwai ke me rawa mai kinia e levu nai lavo ka me soli vi ira na dravudravua." ¹⁰ Ia ni sa kila o Jisu sa tukunia vi ira, "Dou sa vasaga na yalewa ke ina vuku ni cava? Sa caka vi au o koya e dua na cakacaka vinaka. ¹¹ Ni sa jiko vadua ki ikodou o ira na dravudravua; ia o au, na reva ni jiko vadua ki ikodou." ¹² Ni sa sova o koya nai lumu ina yagoqu, sa caka me noqui lumu ni bulu. ¹³ Au sa tukunia vaidjina vi ikodou, "Na viyasana keceliga i vuravura taucoko na vunautaki kinia nai tukutuku-vinaka ke, na baki tukuni vokiliga kinia na ka sa caka na yalewa ke, me kenai divi." ¹⁴ Sa qai dua vi ira na le jinikarua, na yacana o Jutasa Isikarioti, sa qai vi ira na bete levu, ¹⁵ ka tukunia, 'Na cava nu na via solia vi au, ke'u na soli koya yani vi ikodou?' Sa ra varautakia vua e tolusagavulu na jiki ni siliva. ¹⁶ Ia mai na siga gona sa varaicia o koya na gauna e rawarawa me na soli koya kinia. ¹⁷ Ia i nai matai ni siga ni kana madrai sa reva ni valeveni, sa qai mai vi Jisu o ira na tisaipeli, ka tukunia vua, "Ivei na jikinia ikonu sa vinakatakia me kitou varautakia mo nu kana kinia na ka ni qai sivia?" ¹⁸ Sa tukunia o koya, "Qai vua na tamata gona i na koro, ka tukunia vua, " Sa tukunia nai Vavuvuli, Sa voleka na noqu siga; o au vata ki ira na noqu tisaipeli, kitou na ia na kana vata ni qai sivia ina nomu vale." ¹⁹ A ra sa caka na tisaipeli me vaka sa varojia vi ira o Jisu, ra sa varautakia me ra caka na kana vata ni qai sivia. ²⁰ Ni sa raiyavi mai, sa jiko sobu o koya vata ki ira na le jinikarua. ²¹ Ia ni ra sa kana jiko, sa tukunia o koya, "Au sa tukunia vaidjina vi ikodou, ni na soli au yani e dua vi ikodou." ²² Ra sa qai rarawa valevu, ra sa tekivu vayadua me ra tukunia vua, "Noqu Turaga, o au beka?" ²³ Sa vosa o koya, ka tukunia, "O koya kirau sa tokocia vata kaya na ligana i na bilo, sai koya gona na soli au yani: ²⁴ sa qai na Luve ni tamata me va sa volai i na vukuna, ia sa ca vua na tamata gona sa solia yani na Luve ni tamata! ke sa reva ni sucu mai na tamata gona, ke sa vinaka vua" ²⁵ Sa qai vosa o Jutasa, o koya sa solia yani, ka tukunia, "Vavuvuli, o au beka?" Sa tukunia vua o koya, "O sa tukunia djina mai." ²⁶ Ia ni ra sa kana jiko sa tauria n amadrai o Jisu, ia ni sa lotutakia oji, sa dovia, ka solia vi ira na tisaipeli, ka tukunia, "Tauria, kania; ke na yagoqu." ²⁷ Sa qai tauria na bilo o koya, ia ni sa vavinavinakatakia oji, sa solia vi ira, ka tukunia, "Dou somi kece kinia; ²⁸ ke na noqu dra ni viyalayalaji vou sa liviraki i na vukudra na le levu, me bokoci kinia nai valavala ca. ²⁹ Ia au sa tukunia vi ikodou, Au na reva ni somia i muri na vua ni vaini ke, ka malua me yaco mada na siga au na somia vou kinia vata ikodou i na matanitu ni Tamaqu." ³⁰ Ni ra sa sere oji, ra sa qai yani i na ulu-ni-vanua ni violive. ³¹ Sa qai tukunia vi ira o Jisu, "Nu na tarabe keceliga i na vukuqu i na bogi ni kua: ni sa volai, Au na yavijia nai vatawa ni sipi, a ra na dui vasesei na qele ni sipi. ³² Ia ni'u sa tucake voki mai, au na qai liutaki ikodou i Kalili." ³³ Sa qai vosa o Pita, ka tukunia, "Ke na tarabe o ira keceliga ina vukumunu, o au, au na reva ni tarabe." ³⁴ Sa tukunia vua o Jisu, "Au sa tukunia vi Ikonu, I na bogi liga ni kua, ni se bera ni tagi mada iliu na toa, o na cakitaki au vatolu." ³⁵ Sa tukunia vua o Pita, "Ke daru na mate vata, au na reva sara ni cakitaki konu." Sa vosa vavokiliga kinia o ira keceliga na tisaipeli. ³⁶ Sa qai mai o Jisu vata ki ira i na dua na yasana sa vatokai o Kecisemani. sa tukunia vi ira na tisaipeli, "Nu jiko liga i vono ke, meu qai mada i vaka meu masu." ³⁷ Sa yadji Pita o koya vata ki rau na luvei Sepete, sa tekivu me rarawa na lomana ka yaluma sara. ³⁸ Sa qai tukunia vi iratou o koya, "Sa rarawa valevu na yaloqu, me vaka au na mate: dou jiko liga i vono ke, me datou vatawa, ³⁹ Sa qai valailai va i liu o koya, sa cuva sobu vatoboicu, sa masu, ka tukunua, "I, Tamaqu, ke rawa, mo nu yadjia tani mada vi au na bilo ke; ia me kua ni liga ni vaka na noqu lewa, me vaka liga nomunu lewa." ⁴⁰ Ni sa lesu voki mai vi ratou na tisaipeli, sa raici ratou ni ratou sa moce, sa tukunia vi Pita, "Oi! nu sa reva ni rawa me datou vatawa vata me dua la liga na auwa, beka?" ⁴¹ "Nu vatawa, ka masu, me kua ni rawai ikodou na vere: e djina liga sa gu na yalo, ia na yago sa malumalumu." ⁴² Sa qai varua o koya ka masu, ka tukunia, "I, Tamaqu, ke reva ni rawa me yali tani vi au na bilo ke, meu somia liga, me yaco liga na nomunu lewa" ⁴³ Sa qai mai o koya sa raici ratou ni ratou sa moce voki: ni sa bibi na matadratou. ⁴⁴ Sa daini ratou o koya, sa baci qai voki yani. ka masu vatolu, sa cavujia voki na vosa gona. ⁴⁵ Sa qai mai vi ratou na nona tisaipeli, ka tukunia vi ratou, "Dou moce liga, ka dou vacegu; raicia, sa voleka na gauna, sa na soli yani na Luve ni tamata i na ligadra na tamata ca: ⁴⁶ "Tucake, me tu qai raicia, sa voleka mai o koya sa na soli au yani." ⁴⁷ Ia ni sa vosa jiko o koya, raicia, sa qai mai o Jutasa e dua vi ira na le jinikarua, vata ki ira vata kaya e le levu sara ra sa vaiseleiwau, ka vaiwau, mai vi ira na bete levu vata ki ira na nodra matua na tamata. ⁴⁸ Ia o koya sa soli koya yani sa tukunia oji vi ira e dua nai vatakilakila, ka tukunia, "O koya liga au na regucia, sai koya gona; "vesukia matua." ⁴⁹ Sa qai sara mai vi Jisu, ka tukunia, "Sa loloma, vavuvuli! sa regucia." ⁵⁰ Sa tukunia vua o Jisu, "Noqui tau, o sa qai mai i na vuku ni cava?" Ra sa qai mai ka tauri Jisu matua. ⁵¹ Ka raicia, e dua vi ira sa jiko vata ki Jisu sa ucunia mai na nonai seleiwau, sa yavijia na nona tamata na bete levu, sa takia tani na daligana. ⁵² Sa qai tukunia vua o Jisu, "Daramakia voki na nomui seleiwau i na kena taga, ni ra na mate i nai seleiwau o ira kece ra tauria nai seleiwau." ⁵³ "O sa nanumia beka e reva ni rawa vi au meu masuji Tamaqu, ka na solia sara mai vi au o koya na agilosi e jinikarua nai vavakoso ka mani vakacaca. ⁵⁴ Na qai vayacori vacava nai Vola Tabu sa tukunia na kena yaco me vake?" ⁵⁵ I na jiki-ni-bogi gona sa tukunia o Jisu vi ira na le levu, "Dou sa qaivia beka e dua na daubutako, ni dou sa vaseleiwau ka vaiwau, mo dou tauri au? Au ma dau jiko sobu vata ki ikodou i na visiga, ka vatavuvuli i na valenisoro, ia dou ma reva ni tauri au. ⁵⁶ Ia sa caka keceliga na ka ke, me vayacori kinia na nodrai vola na parofita." Sa qai daini koya o ira keceliga na tisaipeli, ka tuba. ⁵⁷ Ia o ira sa tauri Jisu ra sa yadji koya yani vi Kaiafa na bete levu, i na yasana ra sa soqoni vata kinia na vunivola vata ki ira na matua. ⁵⁸ Sa muri koya vayawa o Pita i na vale ni bete levu, sa curu kinia, sa jiko sobu vata ki ira na ovisa, me raicia mada na kenai ojioji. ⁵⁹ Ia o ira na bete levu vata ki ira keceliga na matavilewai, ra sa vaqara eso me ra mai beitaki Jisu vaseseni, me mate kinia o koya: ⁶⁰ ka mani reva ni raicia: ia, sa le levu ra beitakia vaseseni ra qai mai. Ka oji sa qai mai e le rua, ⁶¹ rau sa tukunia, "O koya ke sa tukunia, Au sa rawa meu basukia na vale ni soro ni Kalou, ka tara voki i na bogi tolu. ⁶² Sa qai tucake tu na bete levu, ka tukunia vua, "Sa reva na ka mo tukunia beka mai? Na cava ke rau sa beitaki iko kinia o rau ke?" ⁶³ Sa galu liga o Jisu. Sa qai vosa na bete levu ka tukunia vua, "Au varoji iko matua ina mata ni Kalou bula, mo tukunia mai vi kitou se o iko na Karisito, na Luve ni Kalou se reva." ⁶⁴ Sa tukunia vua o Jisu, "O sa tukunia djina mai: ia au sa tukunia vokiliga vi ikodou, i na gauna mai muri, dou na raicia na Luve ni tamata ni sa jiko i na liga i matau i Koya sa kaukauwa, ni sa qai vokiliga mai i na vi o ni lomalagi." ⁶⁵ Sa qai dresulakia na nonai sulu na bete levu, ka tukunia, "Sa qai vosavacacatakia na Kalou o koya: sa yaga vacava me so voki nai vadjinadjina? raicia, dou sa rogocia liga na nona vosavacacatakia na Kalou: ⁶⁶ na vacava dou sa lewa?" Ra sa vosa ka tukunia, "Sa dodonu liga me mate." ⁶⁷ Ra sa qai kasuvia na matana, ka qova; sa sabicia ira voki eso, ⁶⁸ ka tukunia, "Tukunia mai vi kitou, Ikonu na Karisito, se o cei sa sabici iko?" ⁶⁹ Sa jiko i tuba o Pita i na rara ni vale, sa dua na vada sa qai vua, ka tukunia, "Konu vokiliga ma jiko vata ki Jisu na kai Kalili." ⁷⁰ Sa cakitakia o koya i matadra keceliga ka tukunia, "Au sa reva ni kila na ka o sa tukunia." ⁷¹ Ni sa qai o koya vake, i darava, sa dua voki sa raicia, sa tukunia vi ira sa jiko kinia, "O koya vokiliga ke ra ma jiko vata ki Jisu na kai Nasareci." ⁷² Sa cakitakia voki o koya ka bubului kinia, ka vake, "Au sa reva ni kila na tamata gona." ⁷³ Sa dede valailai liga sa qai mai o ira ra ma tu kinia, ra sa tukunia vi Pita, "Sa djina liga sa dua vi ira o ikonu; ni sa tukuni konu na nomunu vosa." ⁷⁴ Sa qai tekivu o koya me ruru ka bubului, ka vake, "Au sa reva ni kila na tamata gona." Sa qai tagi sara na toa. ⁷⁵ Sa qai nanumia na vosa ni Jisu o Pita, ni sa tukunia vua, "Na reva mada ni tagi iliu na toa, o na cakitaki au vatolu." Sa curu i tuba ka tagi sara valevu.