¹ O au o Jemesa nai talatala ni Kalou vata na Turaga o Jisu Karisito, sa loloma yani vi ira na yavusa e jinikarua ra sa duiviseyaki: ² Ikodou na wekaqu, dou nanumia me kani marau sara, ni dou sa lutu i na ka e levu sa dauvivatovolei. ³ Ni dou sa kila sa vatubuya na dauvosojia na vatovolei ni nomudou vabaujia. ⁴ Me jini vinaka na cakacaka ni dauvosojia, mo dou vinaka taucoko sara kinia, me kua ni dua na ka me yali. ⁵ Ke sa lailai na vuku vi dua vi ikodou, me kerea vua na Kalou, o koya sa solia valevu vi ira keceliga na tamata, sa reva ni vusekatakia dua na ka, na solia liga vua. ⁶ Me kerekere ina vabaujia, me kua ni vajijiqa. O koya sa vajijiqa sa va na ua ni waitui sa cagina i na cagi sa vitubuyaki. ⁷ Me kua ni nanumia na tamata ni na rawa e dua na ka mai vua na Turaga; ⁸ na tamata sa lomalomarua, sa yamekemeke na nonai varau keceliga. ⁹ Me reki na tamata dravudravua i na nona laveji cake, ¹⁰ vata ki koya sa vutuniyau ina nona malumalumu mai, ni na takali liga o koya me va na se ni co. ¹¹ Ni sa cabe cake na siga vata na cagi katakata, sa varaqosatakia sara na co. Sa mira na sena, sa seavu na kena rairai vinaka. Na malai yani va kinia na tamata vutuniyau i na nonai valavala. ¹² Sa kalougata na tamata sa vosojia ni sa vatovolei. Ni sa vatovolei oji, na rawa nai sala ni bula o koya sa yalatakia na Turaga vi ira sa lomani koya. ¹³ Ni sa dauveretaki e dua, kua ni tukunia, "Sa dauveretaki au na Kalou," ni sa reva ni dauveretaki rawa na Kalou i na ka ca, sa reva ni dauveretakia e dua na tamata o koya. ¹⁴ Sa dauveretaki na tamata yadua, ni sa vecei koya na nona garogaro ca, sa bacani koya. ¹⁵ Ni sa qai vasucua na garogaro ca, sa vasucua kinia nai valavala ca, sa oji nai valavala ca, sa qai vasucua na mate. ¹⁶ Dou kua ni vacalai, ikodou na wekaqu lomani. ¹⁷ Sa qai mai colo nai solisoli vinaka keceliga vata nai solisoli keceliga sa yaga sara, sa qai sobu mai vua na Tama ni rarama, sa reva vua na vivukiyaki, se yaloyalo ni vigoleyaki. ¹⁸ Sa vatuburi kita o koya i na nona lewa liga i na vosa ni djina, me da va nai sevu ni vika sa bulia o koya. ¹⁹ O koya gona, ikodou na wekaqu lomani: mo dou kusarawa yadua ina varorogo, mo dou berabera ni vosa, mo dou berabera ni cudru. ²⁰ Ni sa reva ni vatubuya na ka dodonu vua na Kalou na cudru ni tamata. ²¹ O koya gona, mo dou qai dainia tani na dukadukali vata na ka ca e vinaka tu, sa vabauji i na yalomalua na vosa sa tei i na lomamudou, gona sa vabula rawa na yalomudou. ²² Dou muria na vosa, dou kua ni rogocia laliga, mo dou vakaisini ikodou kinia. ²³ Ke dua sa rogocia laliga na vosa qai reva ni muria, sa tautauvata na tamata sa qai ilovi koya i na iloilo: ²⁴ ni sa qai ilovi koya, sa qai tani yani, sa nanulevajia vasauri se sa vacava nai rairai ni yagona. ²⁵ O koya sa varaicia matua na vunau vinaka sara, na vunau ni visereki, sa tu dei kinia, sa reva ni daurogocia, se nanulevajia, sa caka vokiliga na cakacaka, na kalougata kinia o koya i na nona cakacaka. ²⁶ Ke dua vi ikodou sa nanumia sa lotu, ke sa reva ni tarovia na yamena, sa dauvivakaisini vokiliga na yalona, sa ka laliga na nona lotu na tamata ke. ²⁷ Na lotu savasava sa reva ni cala i na mata ni Kalou o Tamada sa va ke: Me sa dauraici ira na luveniyali vata ki ira na yada, ni ra sa rarawa, me sa qarauni koya vokiliga me kua ni tauvi koya na duka ni ka vavuravura.