¹ Sa oti e tinikava na yabaki, au sa qai qai cake voki ki Panapasa ki Jerusalemi, kau sa yadji Taito voki liga. ² Ia sai vavuvuli liga ena raivotu kau a qai cake kinia, kau sa tukunia vi ira nai tukutuku-vinaka au sa vunautakia tiko vi ira na vimatanitu tani, ia ka vuni liga vi ira era sa rogo, de reva ni yaga na noqu cici ke, se na noqu cici eliu. ³ Ia sa reva ni vasaurarataki me cilivi o Taito, kirau sa tiko kaya, a kai Kirisi: ⁴ e reva ena vukudra na mataviwekani vailasu era sa kau vuni mai, o ira sa curu lo mai me ra varaicia na noda lalaga eda sa rawajia ni da sa tu vata ki Karisito Jisu, me ra vakabobulataki kita kinia: ⁵ ia kitou a reva ni talairawarawa vi ira me vamalumalumutaki kitou, e reva sara ena dua bau na jiki-ni-siga; me tu dei kinia vi ikodou na djina ni tukutuku-vinaka. ⁶ Ia o iratou eratou sa daurogo ni ratou sa ka levu cake, (se ratou vabeka evei sa ka waleliga vi au; sa reva ni vinakajia vailoa e dua na tamata na Kalou;) io, ko iratou eratou sa daurogo, sa reva e dua na ka eratou sa vaikuritakia vi au. ⁷ Sa reva sara ni vakinia, ia ni ratou sa raicia niu sa lesi meu vunautakia nai tukutuku-vinaka vi ira ka reva ni cili, me va ko Pita vi ira sa cili; ⁸ (io, o koya sa cakacaka ena loma i Pita mei apositolo vi ira sa cili, sa cakacaka ena lomaqu vokiliga ena vukudra na vimatanitu tani:) ⁹ ia o iratou o Jemesa, ki Kifa, ki Joni, eratou sa daurogo ni ratou sa duru, ni ratou sa kila na loloma ka soli vi au, eratou sa vabauji ki Panapasa ena vitauri liga i matau ni kitou sa duavata, ka me kirau qai vi ira era sa reva ni lotu, ia o iratou vi ira sa cili: ¹⁰ ia sa lomadra vokiliga ke, me kirau nanumi ira na dravudravua: a ka vokiliga ke kau sa gumatua kinia. ¹¹ Ia ni sa qai mai ki Anitioki o Kifa, au sa voraji koya ena matanavotu, ni sa dodonu me vunauci. ¹² Ni sa kana vata eliu o koya ki ira sa matanitu tani, ni ra sa reva ni tadu mai eso maivi Jemesa; ia ni ra sa tadu mai, sa reva ni via tiko vata ki ira ka sa qai tani o koya, ni sa rerevaki ira na cili. ¹³ O ira vokiliga na Jiu sa vo era sa ia vata kaya na vivaisini ko ya; a sa kau vatani vokiliga kinia ko Panapasa ena nodra vivaisini. ¹⁴ Ia ni kau sa raicia era sa reva ni valavala dodonu ka me va na dina ni tukutuku-vinaka, au a tukunia vi Kifa ena matadra keceliga, Kevaka ko sai valavala tiko me vataki ira sa matanitu tani ni o sa Jiu, ka yalia ni vataki ira na Jiu, ena cava ko sa vasaurarataki ira kina era sa matanitu tani me rai valavala me vataki ira na Jiu? ¹⁵ oi kita, eda sa Jiu ni da sucu, ka reva ni tamata ca mai vi ira na vimatanitu tani, ¹⁶ ni da sa kila sa reva ni vadonui na tamata ena vuku ni cakacaka ni vunau, ena vuku liga ni vabauti Jisu Karisito, eda sa vabauti Karisito Jisu, oi kita, me da vadonui kinia ena vuku ni da vabauti Karisito, ka reva liga ena cakacaka ni vunau; ni sa reva na tamata ena vadonui ena vuku ni cakacaka ni vunau. ¹⁷ Ia keva eda sa kune oi kita vokiliga me da tamata ca, ni da sa vasaqara tiko me da vadonui ena vuku i Karisito, sa qai vu beka ni valavala ca na Karisito? E reva sara. ¹⁸ Ia keva kau sa tara cake voki na ka kau a basukia sobu, au sa tukuni au kinia niu sa tamata caka ca. ¹⁹ Ni sai koya na vunau kau sa mate kinia ki na vunau, meu bula vua na Kalou. ²⁰ Kirau sa vakoti vata ki Karisito ki na kauveilatai: ia sa reva liga ni koi au djina sa bula tiko, na Karisito liga sa bula e lomaqu: ia na noqu bula vayago ke, au sa bula tiko kinia niu sa vabaujia na Luve ni Kalou, o koya ka lomani au, ka soli koya ena vukuqu. ²¹ Au sa qai reva ni vatawayagatakia na loloma ni Kalou; ni sa qai reva ni yaga na mate i Karisito, keva sa rawa na vivadonui ena vunau.