¹ Oi au o Paula, nai apositolo i Jisu Karisito nai lesilesi ni Kalou, vi ira ra sa lotu i Efeso, ra sa yalodjina vi Jisu Karisito. ² Me nomudu na loloma vata na vacegu mai vua na Kalou o Tamada vata ki na Turaga o JIsu Karisito. ³ Me varokorokotaki na Kalou na Tamai koya na noda Turaga o Jisu Karisito, o koya sa vakalougatataki kita i na ka ni vivakalougatataki vayalo keceliga i na viyasana valomalagi i na vuku i Karisito. ⁴ Me va sa djigitaki kita iliu i na vukuna, sa tauyavutaki imuri o vuravura, me da yalosavasava ka reva ni cala i matana i na loloma. ⁵ Ni sa lesi kita i liu me da vabau me da luvena i na vuku i Jisu Karisito, me va na nona lewa vayalovinaka. ⁶ Me dokai kinia na kena vinaka ni nona loloma; sa lomani kita kinia o koya i na vukui koya sa Daulomania. ⁷ I na vukui Jisu eda sa rawajia kinia na bula sa voli i na nona dra vata na vabokoci ni valavala ca, me vaka na nona loloma levu. ⁸ O koya sa valevutakia sara vi kita o koya i na vuku vata ki na yalomatua keceliga. ⁹ Na Kalou sa vatakila vi kita na nona lewa sa vuni tu, me vaka na ka e vinaka vua, ka sa vatakila vua na Turaga, ¹⁰ me yaco kinia na ka sa lewa o koya sa oji keceliga na gauna sa lokucia, me soqonia vata na ka keceliga vi Karisito na vika mai lomalagi vata na vika vavuravura. ¹¹ I na vuku i Karisito eda sa caka vokiliga kinia me nonai votavota, ni da sa lesi iliu me va sa nakijia o koya sa caka na ka keceliga me va na nona lewa. ¹² Me dokai kinia na nona vinaka i na vuku i kitou, o kitou sa vararavi iliu vi Karisito. ¹³ I na vuku i Karisito, ikodou vokiliga, ni dou sa rogocia iliu na vosa ni vavuvuli djina, nai tukutuku vinaka ni nomudou bula, sai koya ni dou sa vabaujia dou sa dregaji kinia i na Yalo Tabu sa yalataki, ¹⁴ o koya nai matai ni nodai votavota me yaco mada na gauna ena rawa djina kinia o ira na nona sa voli tu, me dokai kinia na nona vinaka. ¹⁵ I na vuku ni ka ke, o au vokiliga niu sa rogocia oji na nomudou vabaujia na Turaga o Jisu vata na nomudou loloma vokiliga vi ira keceliga ra sa lotu, ¹⁶ au sa reva ni cegu ni vavinavinaka i na vukumudou niu sa cavuji ikodou jiko i na noqu masu. ¹⁷ Au sa masulakia vua na Kalou ni nona Turaga o JIsu Karisito, na Vu ni ka e vaiukuukutaki, me solia vi ikodou na yalo ni vuku vata nai vavuvuli sa macala mo dou kilail koya kinia. ¹⁸ Au sa masulakia me vararamataki na mata ni yalomudou, mo dou kila kinia nai nuinui sa kacivi ikodou kinia o koya vata na kena levu ni ukuuku sa taukenia o koya vi ira sa lotu. ¹⁹ Au sa masulakia kau sa kerea me levu sara na nona kaukauwa vi kita sa vabauji koya, me vaka sa dau caka me yaco i na nona kaukauwa djina. ²⁰ Na kaukauwa vataliga ke sa vakaukauwatakia na Karisito ni vaturi koya cake mai na mate ka vajikori koya i na ligana i matau i na viyasana valomalagi. ²¹ Sa vadaberi Karisito me uasivi cake sara vi ira keceliga sa liu vata ki ira ra sa lewa vata ki ira sa kaukauwa vata ki ira sa turaga, vata na yaca keceliga sa cavuji i na gauna ke vata na gauna se bera mai. ²² Na Kalou sa vamalumalumutakia na ka keceliga sa tu i na ruku ni yavana ka lesi koya me lewa na ka keceliga i na vuku ni soqosoqo le ni lotu. ²³ Na lotu sai koya na yagona, sa sinai sara vua sa vasinaijia na ka keceliga i na ka keceliga.