¹ Oi au o Paula, nai apositolo i Jisu Karisito, ina lewa ni Kalou, o Timoci vokiliga na taciqu. ² Vi ira era sa lotu ka viwekani djina, era sa tu vata ki Karisito, era sa tiko mai Kolosa? me nomudou na loloma vata na vacegu, mai vua na Kalou ko Tamada. ³ Kirau sa vavinavinaka vua na Kalou na tamai Jisu Karisito na noda Turaga, ka masulaki ikodou ina visiga. ⁴ Ni kirau sa rogocia na nomudou vabauji Karisito Jisu vata na nomudou loloma vi ira na keceliga era sa lotu. ⁵ Ena vuku ni ka dou sa vanuinuitakia, o koya sa maroroi mai lomaliagi me nomudou, ia, dou rogocia kinia ena vosa djina ni tukutuku vinaka. ⁶ Sa yaco mai vi ikodou, me va vokiliga vi ikodou, a sa vatekivu vata kina siga dou a rogocia kinia, ka kila djina na loloma ni Kalou. ⁷ Me va ikodou sa kila mai vi Epafira, a nirau tokani daulomani, ia, nai Talatala yalo djina i Karisito vi ikodou. ⁸ O koya vokiliga sa tukunia vi kirau na nomudou loloma ina Yalo Tabu. ⁹ Ina vuku ni ka ke oi kirau vokiliga, sa vatekivu vata ki na siga kirau a rogocia kinia, kirau sa reva ni mudu kinia na masulaki ikodou, ka masu mo dou vasinaiji ina nomudou kila na lomana, ina yalo matua ki na vuku vayalo vokiliga. ¹⁰ mo dou caka nai valavala e kilikili ki ira sa nona na Turaga, me vinakajia keceliga o koya, mo dou vavuana jiko i na cakacaka vinaka keceliga, me tubu cake vokiliga na nomudou kila na Kalou; ¹¹ Mo dou kaukauwa mai ena kaukauwa keceliga, me vaka na nona kaukauwa vaidjina, e tubu na vosotia keceliga ki na vosotia vadede ina marau. ¹² Mo dou vavinavinaka vua na Tamada, o koya sa varautakia vi kita meda rawajia na kedrai votavota era sa yalosavasava, ina rarama: ¹³ O koya sa vabulai kita mai na lewa ni butobuto, a sa yadi kita ki na matanitu nei koya na nona Gone ni toko: ¹⁴ O koya eda sa rawatia kinia na bula ena vuku ni nona dra ni sa bokoci na noda i valavala ca. ¹⁵ O koya na yaloyalo ni Kalou sa reva ni rairai, ka vatuburia e liu ka qai muri na ka keceliga, ka caka: ¹⁶ ni sa caka na ka keceliga o koya, se ra tu mai lomalagi, se ra tu e vuravura, se rairai se reva ni rairai, se ra vitikotiko vaturaga, se ra vimatanitu, se ra turaga sa liu, se ra turaga kaukauwa: sa caka na ka keceliga o koya, ka me nona vokiliga; ¹⁷ a sa bula eliu o koya sa muri na ka keceliga, ka sa vataudeitakia na ka keceliga ko koya. ¹⁸ O koya na ulu vokiliga ni yago, nai soqosoqo lewe ni lotu: o koya nai vatekivu, na ulumatua mai na mate; me vinaka cake kinia o koya ina ka keceliga. ¹⁹ Ni sa vinakatia me sinai o koya ina ka keceliga; ²⁰ ka me vavivinakatitaki ira kaya na ka keceliga ina vukuna, ni sa caka mada na ka ni vivinakati ina nona dra ni sa lauvako ki na kauveilatai; io, ina vukuna liga, se ra tu e vuravura se ra tu mai lomalagi. ²¹ Oi ikodou vokiliga, dou a kai tani eliu ka meca ena vu ni yalomudou ena cakacaka ca, sa qai vavivinakataki ikodou o koya, ²² ina yagona valewe ni sa mate, me varaitaki ikodou kinia ni dou sa yalosavasava ka reva ni beitakia rawa ka reva ni vunauci rawa e matana; ²³ keva dou sa vabautia tikoliga ka vataudeitakia ka vakaukauwatakia, ka reva ni vukicia tani mai nai nuinui ni tukutuku-vinaka dou a rogocia, ka sa vunautakia vi ira na tamata keceliga sa jiko e ruku i lomalagi; ia oi au o Paula au sa lesi meu kenai talatala. ²⁴ Au sa qai marau niu sa vararawataki ena vukumudou, ka vayacoria ina yagoqu na kena vo ni rarawa ina vuku i Karisito, ina vuku ni yagona, ko ya nai soqosoqo lewe ni lotu: ²⁵ au sa lesi kina meu kenai talatala, me va nai lesilesi ni Kalou, au sa lesi kinia ina vukumudou, meu vayacoria na vosa ni Kalou: ²⁶ na ka vuni ka vunitakia mai vi ira nai tabatamata ina gauna eliu, ia sa qai varaitaki mai vi ira na nona tamata yalosavasava: ²⁷ ni sa vinakajia na Kalou me vatakila vi ira na kena vaidjina ki na kena talei ni ka vuni gona ina kedra maliwa na vimatanitu; koya ke na Karisito ina lomamudou, na vu ni kena nuitakia na kalougata: ²⁸ o koya kitou sa vunautakia, ni kitou sa vasalatakia tiko na tamata yadua, ka vavulicia na tamata yadua ina vuku keceliga; ma kitou varaitakia kinia na tamata yadua ni sa vinaka sara ena vuku i Karisito: ²⁹ ke na ka kau sa daucakacaka vokiliga kinia, kau sa gumatua vokiliga me va na nona cakacaka sa mana ina lomaqu.