¹ Ia ni ratou sa qai vi rau o Amifipoli vata ki Apolonia, ratou sa yaco i Cesalonaika, sa tu kinia e dua na nodra vale ni lotu na kai Jutia. ² Sa curu i loma o Paula, me va na nonai varau, sa tolu na siga ni vacecegu sa vavulici ira kinia mai nai Vola Tabu. ³ Ni sa vatakila ka vadjinadjinatakia ni sa kilikili ki Karisito me vosojia na mate ka tucake voki mai na mate. Sa tukunia, "Ni sai koya na Karisito, o Jisu ke, o koya au sa vunautakia vi kodou." ⁴ Sa vabaujia o ira eso ka ra qai vitokani vi Paula vata ki Sailasa, vata ki ira na le levu na kai Kirisi ra sa lotu va-Jiu vata ki ira na marama ra sa reva ni le lailai. ⁵ Sa qai vuvu o ira na Jiu, ra sa yadjia eso vi ira na kaisi botoboto mai na vanua ni vivoli, ra sa vasoqoni ira vata na le levu ka vatubu mawe i na koro, Ra sa cici vakaukauwa i na vale ni Jesoni, me ra saga me ra yadji rau mai o Paula vata ki Sailasa vi ira na le ni koro. ⁶ Ia ni ra sa reva ni raici ratou, ra sa yarataki Jesoni vata ki ira na viwekani eso vi ira na turaga ni koro, ka tagi, "O ratou ke ratou sa vukici vuravura me ca, ratou sa qai vokiliga mai vanua ke. ⁷ Sa yadji ratou o Jesoni i na nona vale ka ra sa talaimama o ira keceliga ke i na vunau ni Sisa, ra sa tukunia sa dua voki na tui-o Jisu." ⁸ Ra sa kidroataki ira na le ni koro vata ki ira na kena turaga ni ra sa rogocia na vika ke. ⁹ Ia ni ra sa vabaujia na yalayala ni Jesoni vata ki ira na tani, ra sa sereki ira me ra qai. ¹⁰ Ia o ira na viwekani ra sa vakusakusa me talai rau o Paula vata ki Sailasa i Peria i na bogi. Ia ni rau sa yaco kinia, rau sa qai i na nodra vale ni lotu na kai Jutia. ¹¹ Ra sa uasivi vi ira na kai Cesalonaika o ira ke, i na yalo vaturaga, ni ra sa varogocia na vosa i na loma e vinaka sara, ra sa dauvasaqaqara i nai Vola Tabu i na visiga se sa vakinia na ka ke se reva. ¹² O koya liga ke ra sa le levu kinia ra sa vabaujia, vata ki ira volikiga na marama ni Kirisi vata ki ira na tagane ra sa reva ni le lailai. ¹³ Ia ni ra sa kila o ira na Jiu mai Cesalonaika ni sa vunautakia na vosa ni Kalou o Paula mai Peria, ra sa qai vokiliga kinia ka vayavalaji ira na le levu. ¹⁴ Ra sa vakusakusa kinia na viwekani me ra vatalai Paula yani me qai vake i wasawasa, ia rau sa jiko liga mai o Sailasa vata ki Timoci. ¹⁵ Ia o ira sa varaici Paula ra sa yadji koya i Aceni. Ia ni sa tau vi ira nai varo vi Sailasa vata ki Timoci me rau sa vakusakusa vua, rau sa qai sara. ¹⁶ Ia ni sa waraki rau jiko o Paula mai Aceni, sa katakata valevu na lomana ni sa raicia sa oso na koro i na vimatakau. ¹⁷ Koya gona sa vileji kinia o koya vata ki ira na kai Jutia i na nodra vivale ni lotu vata ki ira vokiliga na tani ra sa lotu, vata ki ira vokiliga ra sa sota vata i na rara ni vivoli i na visiga. ¹⁸ Sa qai vileji vata eso na nodra vuku nai tokani ni Epikuro vata ki Sitoike. Sa tukunia eso, "Na cava mada sa via tukunia o ka na dauvosa ke?" Eso tani sa tukunia, "O koya ke sa va e dua sa vatakila mai eso na kalou vou," ni sa vunautaki Jisu vi ira o koya vata ki na nona tucake voki mai na mate. ¹⁹ Ra sa qai tauri Paula ka tuberi koya i na vanua cecere ni Arisi, ka tukunia, "Ena rawa beka me kimamu kila se cava nai vavuvuli vou ke o sa mai tukunia? ²⁰ Ni o sa yadjia mai eso na vika e vivakurabuitaki i daligai kimamu. Sa kimamu via kila se cava nai balebale ni vika ke." ²¹ (Ni sa reva na ka tani ra sa dauvayacoya o ira keceliga na kai Aceni, vata ki ira na vulagi ra sa jiko kinia ia me ra vitukutukunitakia liga se rogocia e dua na ka vou.) ²² Sa qai wiri tu o Paula i na loma ni vanua cecere i Arisi, ka tukunia, "Ikodou na kai Aceni, au sa raicia i na ka keceliga ni konu sa dausoro valevu. ²³ Io, niu sa qai wavoki ka raicia na vika konu sa soro kinia, au sa raicia vokiliga e dua nai cabocabo ni soro sa volai kinia, 'VUA NA KALOU E TAWA KILAI.' Ia o koya konu sa soro kinia ni konu sa reva ni kila, au sa qai tukunia ke vi konu. ²⁴ Na Kalou ka bulia na vuravura vata na ka keceliga sa tu kinia, sa Turaga liga o koya mai lomalagi vata ki vuravura, sa reva ni jiko i na vivale ni soro sa caka i na liga. ²⁵ Sa reva vokiliga ni qaravi i na liga ni tamata, me vaka me baki yaga vua e dua na ka, ni sa solia vi kita keceliga na bula vata nai cegu, vata ka na keceliga. ²⁶ Sa buli ira da sa dra vata, na lewe ni vivanua keceliga me ra jiko i na dela ni vuravura taucoko, sa lesia na vigauna ka djigitaki iliu vata nai yalayala ni nodra vivanua, ²⁷ me ra vasaqara na Kalou de ra vayayamo beka vua ka raicia. Ia sa reva liga ni yawa o koya vi kita yadua. ²⁸ Ni da sa bula vi koya ka yavala ka rawa mai vua na noda bula, me va vokiliga sa tukunia o ira na nomudou dau-ni-vucu eso, 'Sa nona kawa vokiliga o kita.' ²⁹ '"Ke, ni da sa kawa ni Kalou, e reva ni dodonu me da nanumakia sa tautauvata na Kalou vata i na koula, se na siliva, se na vatu-sa ceujia na matai se na tamata vuku. ³⁰ Ia na gauna ni lialia sa vosojia oji na Kalou, sa varojia i na gauna ni kua vi ira na tamata keceliga i na vivanua keceliga me ra vivutuni. ³¹ Ni sa lokucia o koya na siga na lewai vuravura kinia na lewa dodonu vi koya na tamata sa lesia o koya. Sa vadjinadjina kinia vi ira na tamata keceliga i na nona vaturi koya cake voki mai na mate." ³² Ia ni ra sa rogocia na tucake voki mai na mate, sa valialiai Paula eso vi ira; ka so sa tukunia, "Kitou na rogoci iko voki i na ka ke." ³³ Sa qai tani yani i na kedra maliwa o Paula. ³⁴ Ia sa kabiji koya eso na tamata ra sa vabaujia, sa dua vi ira o Tainonisio mai na matavilewai mai na vanua cecere ni Arisi, vata na yalewa sa vatokai o Tamarisi, vata ki ira voki eso.