¹ Sa qai yaco o Paula i Tapi vata i Lisitira, sa raicia, sa jiko e dua o Timoci na yacana, sa dau lotu, sa luve ni yalewa ni Jutia, sa vabaujia, ia sa kai matanitu tani o tamana. ² Sa rogo vinaka o koya vi ira na viwekani mai Lisitira vata i Ikoniona. ³ Sa vinakatakia o Paula, me rau qai, sa yadjia mada sa cilivi koya, i na vukudra na Jiu ra sa jiko i na vanua gona, ni ra sa kila keceliga ni sa kai matanitu tani na tamana. ⁴ Ni rau sa qaivia na vikoro, rau sa tukunia vi ira me ra vabaujia nai varo sa lesia o ira nai apositolo vata ki ira na matua sa jiko mai Jerusalemi. ⁵ Sa vataudeitakia va kinia i na visoqosoqo le ni lotu i na vabaujia ni ra sa tubu vokiliga i na visiga me ra lewe levu. ⁶ Ni rau sa qaivi Firijia vata na vanua o Kalatia, sa tarovi rau na Yalo Tabu me rau kua ni vunautakia na vosa i Esia. ⁷ Ni rau sa yaco mada i Misia, rau sa vatovolea sara me qai i Picinia, sa tarovi rau na Yalo i Jisu. ⁸ Rau sa sivi Misia, rau sa qai sobu i Tiroa, ⁹ Sa rairai vi Paula i na bogi na raivotu: Sa tucake tu e dua na kai Masitonia, sa vamasuji koya sa tukunia, "Qai mai i Masitonia, mai vukei kimamu." ¹⁰ Ni sa raicia oji na raivotu o Paula, sa vatovlea sara me qai i Masitonia, ni kitou sa vananumakia e djina sara sa kacivi kitou na Turaga me kitou vunautakia vi ira nai tukutuku-vinaka. ¹¹ Ni kitou sa varewa mai Tiroa, kitou sa mua yani i Samoceresa, sa yaco i na savulaci i Niapoli. ¹² Mai vaka i Filipai, e koro levu i na yasayasa va-Masitonia o koya, sa koro va-Roma, kitou sa jiko i na koro gona me vica na bogi. ¹³ Ni na siga ni vacecegu kitou sa qai i nai bili ni koro i na baji ni uciwai, i na vanua kitou sa nanumia sa dau caka kinia na lotu masumasu. Sa kitou dabe sobu ka vosa vi ira na yalewa ra sa soqoni vata kinia. ¹⁴ Sa varogocia e dua na yalewa o Litia na yacana, mai na koro o Caetaira, sa dauvolitakia na kalokalo sa daulotu vua na Kalou. Sa dola na yalona na Turaga, sa vabaujia kinia o koya na vika sa tukunia o Paula.

¹⁵ Ni sa papitaisotaki o koya vata ki ira vokiliga na nona le-ni-vale, sa vamamasu o koya, ka tukunia, "Ke dou sa lewa niu sa djina vua na Turaga, curu i na noqu vale mo dou jiko kinia." Sa cikevi kitou sara o koya. ¹⁶ Sa yaco, ni kitou sa qai i na vanua sa caka kinia na masumasu, kitou sota ki na dua na vada sa jiko vua na yalo i Paiconi. O koya sa dauvavutuniyautaki ira valevu na nona turaga i na nona parofisai vaseseni. ¹⁷ Sa muri Paula vata ki kitou o koya ke, sa kailavakia, sa tukunia, "Sai talatala cecere ni Kalou sara o ratou na tamata ke. Ratou na vatakila vi ikodou na sala ni bula." ¹⁸ Sa vica na bogi na nona caka jiko na ka ke. O Paula, sa qai rarawa na lomana vi koya, sa rai vua sa tukunia vua na yalo, "Au sa varoji iko i na yaca i Jisu Karisito mo qai tani mai vua." Sa qai tani sara i na gauna vata liga gona. ¹⁹ Ni sa raicia o ratou na nona turaga ni sa yali na ka ratou ma vararavi kinia na nodratou i yau, ratou sa tauri Paula vata ki Sailasa, ra sa yarataki rau i na rara ni vivoli vi ira na turaga. ²⁰ Ni ra sa yadji rau i na matavilewa, ra sa tukunia, "O rau na tamata liga ke, rau sa vavu leqa jiko i na noda koro. ²¹ Rau sa kai Jutia. Rau sa vunautakia nai valavala eso sa reva ni dodonu vi kita me da vabaujia se muria ni da sa kai Roma." ²² Ra sa qai tucake vata taucoko vi rau o ira na le levu; ra sa luvajia na nodrau icurucuru o ira na matavilewai, ra sa tukunia me rau warolaki. ²³ Ni ra sa warolaki rau, ra sa qai daini rau i vale ni vivesu, ra sa varojia vua nai vatawa me yadravi rau vakaukauwa. ²⁴ O koya sa varoji ke, sa biliraki rau i na loma ni vale ni vivesu, sa vesukia vakaukauwa na yavadrau i na i vesu kau. ²⁵ Ni sa lomaloma ni bogi na vanua rau sa masumasu jiko o Paula vata ki Sailasa, ka sere vua na Kalou, ra sa rogoci rau o ira na vo ni kaivesu. ²⁶ Sa dua na uneune levu sa yaco vasauri i na vanua gona, sa yavala kinia na yavu ni vale ni vivesu, sa tadola vasauri keceliga na darava, sa tasere yadua na kedrai vesu na tamata. ²⁷ Sa yadra mai na moce nai vatawa ni vale ni vivesu, sa raicia sa tadola tu nai sogo ni darava ni vale ni vivesu, sa ucunia mai na nonai seleiwau, ni sa nakijia me vamatei koya, ni sa nanumia ra sa tuba o ira na tamata sa vesu tu. ²⁸ Sa kaci i na domo levu o Paula, sa tukunia, "Kua ni o vamavoataki iko, kitou sa jiko keceliga ke." ²⁹ Sa qai kaci o koya me yadji mai na cina, sa rika i loma sa sautaninini mai, sa cuva sobu vi Paula vata ki Sailasa, ³⁰ sa yadji rau i tuba sa tukunia, "Ikodrau na turaga, cava meu vayacoya meu bula kinia?" ³¹ Rau sa tukunia, "Vabaujia na Turaga o Jisu Karisito, o na bula kinia vata ki ira vokiliga na nomu le ni vale. ³² Rau sa tukunia vua na vosa ni Turaga, vi ira kece vokiliga ra sa jiko i na nona vale. ³³ Sa yadji rau o koya i na bogi gona sa quarakia na we ni kuita, sa papitaisotaki sara o koya vata ki ira keceliga na wekana. ³⁴ Ni sa yadji rau i nona vale sa taucia na kakana i matadrau, sa marau valevu ni sa vabaujia na Kalou vata ki ira keceliga na nona le ni vale. ³⁵ Ia ni sa siga mai, ra sa tala na ovisa o ira na matavilewai ka tukunia, "Sereki rau na tamata qori me rau qai." ³⁶ Sa tukunia vi Paula na vosa ke nai vatawa ni vale ni vivesu, "Sa tala mai na matavilewai mo drau sa sere ka mo drau qai. Drau qai cavu tu ka qai i na vacegu." ³⁷ Sa tukunia vi ira o Paula, "Ra sa warolaki kirau i matamudou ka ra sebera ni ra lewai kirau mada iliu, kirau sa kai Roma, ra sa daini kirau i vale ni vivesu. Dou sa via vatalai kirau vavuni beka? Reva! Me ra qai mai ra mai yadji kirau yani i tuba." ³⁸ Ra sa tukunia na vosa ke o ira na ovisa vi ira na matavilewai, ra sa qai rava ni ra sa rogocia ni rau sa kai Roma. ³⁹ Ra sa qai mai na matanivilewai ra sa mai kere vivosoti vi rau ka yadji rau i tuba, ra sa vamasuji rau me rau qai tani i na koro. ⁴⁰ Rau sa qai tani i na vale ni vivesu, rau sa curu i na vale ni Litia. Ni rau sa raici ira na viwekani, rau sa vacegui ira ka qai yani.