¹ Ke i nai soqosoqo lotu mai Anitioki, sa jiko kinia eso na parofita vata nai vavuvuli. O ratou o Panapasa, o Simioni (sa yacana vokiliga o Nikeri), o Lusiu na kai Kirini, o Manaini (o koya rau susu vata ki Eroti na turaga), vata ki Saula. ² Ni ratou cakacaka vua na Turaga ka lolo, sa tukunia na Yalo Tabu, "Lesi rau mai vi au o Panapasa vata ki Saula i na cakacaka au sa kacivi rau kinia." ³ Ni ratou sa lolo, ka masu oji, ratou sa tabaki rau i na ligadratou, a ratou sa vatalai rau yani. ⁴ O rau o Panapana vata ki Saula, ni sa vatalai rau na Yalo Tabu, rau sa qai i Selusia; mai vanua gona rau soko tani mai ka qai ki Kipiro. ⁵ Ni rau sa jiko mai Salamisa, rau sa vunautakia na vosa ni Kalou i na nodra vivale ni lotu na Jiu. Sa vivuke vi rau o Joni. ⁶ Ni ratou sa qaivia taucoko na yanuyani sa yaco i Pafo, ratou sa raicia e dua na dauvadraunikau, sa parofita vailasu, na kai Jutia sa yacana o Pari-Jisu.

⁷ Rau sa jiko vata i na turaga ni vanua o Serikiu Paula, sa tamata yalomatua. Sa kacivi Panapasa vata ki Saula o koya, ni sa via rogocia na vosa ni Kalou.

⁸ O Elima "na dauvadraunikau" (ke nai balebale ni yacana) sa reva ni duavata kinia; sa vatovolea me vagolea tani na turaga me kua ni vabaujia. ⁹ O Saula, o koya vokiliga sa kacivi me o Paula, ni sa sinai i na Yalo Tabu, sa varaici koya vamatua ¹⁰ sa tukunia, "O iko sa luve ni tevoro, sa sinai vi iko na dauvivakaisini vata na ca. O sa meca ni vi ka keceliga e dodonu. Na reva beka ni oji na nomu vukicia nai naki dodonu ni Turaga? ¹¹ Ke, raicia, sa bikai iko na cudru ni Turaga, o na mataboko. O na reva ni raicia na matanisiga me oji mada e vica na siga." Sa lutu vasauri vi koya na kabukabu vata na butobuto; sa vayayamo jiko me vaqara eso me ra tuberi koya. ¹² Ni sa qai raicia na turaga na ka sa yaco, sa vabaujia, ni sa kurabui i nai vavuvuli ni Turaga. ¹³ Ke o Paula vata ki ratou sa qai vata, sa ratou daini Pafo me qai i Perika mai Pamifilia. O Joni sa lesu voki i Jerusalemi. ¹⁴ O Paula vata ki ratou na nonai lala ratou sa qai mai Perika, ratou qai i Anitioki mai Pisita. Rau sa curu i na vale ni lotu i na siga ni vacecegu, a rau sa dabe sobu. ¹⁵ Ni sa wiliki oji nai vola ni lawa vata ki ira na parofita, sa so na turaga ni vale ni lotu sa talatala yani sa tukunia, "Ikodrau na viwekani, ke tu vi ikodrau e dua na vosa ni vavuvuli vi ira na tamata, tukunia liga mai." ¹⁶ Sa qai tu cake o Paula sa vatabataba; sa tukunia, "Ikodou na Isireli vata ki kodou sa ravatakia na Kalou, dou varorogo mai. ¹⁷ Na nodra Kalou na tamata ke, io na nodra na Isireli sa djigitaki ira oji na noda matua, sa valevui ira na tamata ni ra sa jiko vulagi mai na vanua o Ijipita, sa yadji ira mai kinia i na ligana kaukauwa. ¹⁸ Ni sa vosojia o koya na nodrai valavala i na vikau me yabaki vasagavulu. ¹⁹ Ni sa oji na nona vakawabokotakia na vitu na matanitu i na vanua o Kenani, sa qai vota vi ira na nodra vanua. Sa yaco ke ni sa oji e va na drau limasagavulu na yabaki. ²⁰ Sa oji ke sa qai lesia eso na ka yabaki va na drau limasagavulu, sa qai yacovi Samuela na parofita. ²¹ Sa ra qai vinakatakia me dua na nodra tui, na Kalou sa qai soli Saula na luvei Kisi, na tamata i na yavusa i Penijamini, me nodra tui me vasagavulu na yabaki. ²² Ni oji na nona yadji koya tani mai nai tutu vatui na Kalou, sa qai vatuburi Tevita me nodra tui. Sa tukuni koya vokiliga sa tukunia, 'Au sa raici Tevita na luvei Jese ni sa tamata sa va na lomaqu, o koya na vayacoya keceliga na noqu lewa.' ²³ Mai na nona kawa na tamata ke na Kalou sa vatubuya i Isireli nai Vabula, o Jisu, me va na nona vosa ni yalayala. ²⁴ Ni se bera na nona yaco mai o Jisu, o Joni sa vunautakia na papitaiso ni vivutuni vi ira keceliga na Isireli. ²⁵ Ni sa vaojia jiko na nona cakacaka o Joni, sa tukunia, 'Ikodou sa nanumia se o cei o au? Au sa reva ni o koya. Ia dou rogocia, e dua sa muri au mai, nai vava i yavana au sa reva ni yaga me'u serekia.' ²⁶ Ikodu na viwekani, na kawa ni Eparaama, vata ki ira keceliga vi kodou sa ravatakia na Kalou, sa talai mai vi kita na vosa ni bula ke. ²⁷ O ira sa jiko mai Jerusalemi vata ki ira na nodra turaga ra sa reva ni kilai koya, se na nodra vosa na parofita sa wiliki i na visiga ni vacecegu ni ra sa vacacani koya a ra sa lewai koya me mate. ²⁸ Ka djina ni ra sa reva ni raicia e dua na ka sa dodonu me mate kinia, ra sa vamasuji Pailato me vamatei o koya. ²⁹ Ni ra sa vayacoya oji na ka keceliga sa volai me baleji koya, ra sa qai roqoji koya sobu mai na kau ka ra bulujia i na dua nai bulubulu. ³⁰ Sa vaturi koya cake mai na mate na Kalou. ³¹ Sa rairai me vica na siga vi ira, ra sa qai vata ki koya mai Kalili i Jerusalemi. O ira ke ra sa dau tukuni koya vi ira keceliga na tamata me ra vadjinadjinataki koya kinia. ³² Ke kirau sa tukunia vi ikodou nai tukutuku vinaka: Na yalayala ma caka vi ira na noda matua ni sa vayacoya ³³ na Kalou vi kita, vi ira na luvedra, ni sa vatuburi Jisu cake o koya. Me va na ka sa volai i karua ni Same: 'O iko na Luvequ, au sa vatuburi iko i na siga ke.' ³⁴ Ina vuku ni sa vaturi koya cake mai na mate, me kua ni vuca voki, sa tukunia vake o koya: 'Au na solia vi ikodou na vika sa yalataki djina vi Tevita.' ³⁵ Ni o koya ke sa tukunia vokiliga kinia o koya e dua voki na Same, 'Au na reva ni vatara na Le Dua yalosavasava me vuca mai.' ³⁶ O Tevita ni sa qaravia oji na nonai tabatamata me va na lewa ni Kalou, sa qai moce; sa bulu vata ki ira na nona matua, sa vuca mai na yagona. ³⁷ O koya sa vaturia cake voki na Kalou, sa reva ni vuca mai. ³⁸ O koya mo dou qai kila; na viwekani, i na vukuna na tamata ke sa bokoci kinia nai valavala ca me va sa vunautaki vi ikodou. Na vunau ni Mosese sa reva ni rawa ni dou vadonui kinia. ³⁹ I na vukuna vokiliga sa vadonui rawa kinia na tamata keceliga sa vabaujia. ⁴⁰ O koya mo dou qai raici ikodou vinaka, de yaco vi ikodou na ka sa vosa kinia o ira na parofita: ⁴¹ 'Raicia, o ikodou sa daubeci, ia mo dou reucala ka rusa; Ni'u sa vayacoya e dua na cakacaka i na nomudou gauna, na cakacaka dou na reva sara ni vadjinajia, ke sa dua e tukunia vi ikodou."' ⁴² Ni rau sa qai yani o Paula vata ki Panapasa, ra sa kerekere o ira ra sa soqoni vata me vunautakia vi ira na vosa ke i na siga ni vacecegu sa taravia mai. ⁴³ Ni ra sa suka tani o ira sa soqoni vata, sa le levu na Jiu vata ki ira na tamata sa lotu va-Jiu ra sa muri Paula vata ki Panapasa, a rau sa vosa vi ira a rau sa varojia vi ira me ra tauria deivaki na loloma ni Kalou. ⁴⁴ Ia i na siga ni vacecegu taravia, sa vo valailai me ra oji kece mai na lewe ni koro ni ra sa soqoni vata mai me ra rogocia na vosa ni Kalou. ⁴⁵ Ni ra sa raicia o ira na Jiu ni ra sa le levu, ra sa sinai i na vuvu a ra vasenitakia na vika sa tukunia o Paula, a ra sa vosavacacataki koya. ⁴⁶ A rau sa qai vosa doudou o Paula vata ki Panapasa ka tukunia, "E dodonu liga me vunautaki iliu vi ikodou na vosa ni Kalou. Ni dou sa dainia tani vi ikodou ka lewai ikodou mo dou reva ni rawa mo dou bula tawa mudu, raicia, kirau sa na qai vi ira sa kai matanitu tani. ⁴⁷ Ni sa varojia vakinia vi kitou, na Turaga, sa tukunia, 'Au sa vaturi iko mo nodra rarama na vimatanitu, mo yaco mo vu ni bula i nai yalayala ki vuravura."' ⁴⁸ Ni ra sa rogocia o ira sa kai matanitu tani, ara sa marau, a ra sa varokorokotakia na vosa ni Turaga. Sa vabaujia o ira kece ra sa varau tu me vinakatakia na bula tawa mudu. ⁴⁹ Sa kuruvaki na vosa ni Turaga i na viyasana keceliga ke. ⁵⁰ O ira na kai Jutia a ra sa vauqeji ira na yalewa lotu vata ki ira na marama vata ki ira na turaga ni koro. A ra sa vatubuya na dauvivacacani vi rau o Paula vata ki Panapaa, a ra sa vatalai rau tani mai na nodra vanua. ⁵¹ Rau sa kuretakia vi ira na kuvu ni qele mai na yavadrau, a rau sa qai i Ikiniona. ⁵² O ira sa lotu ra sa sinai i na marau vata i na Yalo Tabu.