¹ I na gauna gona sa caka o Eroti na tui me vararawatakia eso vi ira nai soqosoqo lewe ni lotu. ² Sa vamatei Jemesa na tuakai Joni i nai seleiwau. ³ Ni sa raicia sa vinakatakia o ira na Jiu, sa qai vesuki Pita vokiliga. Ke ni sa gauna ni kana madra sa reva ni valeveni. ⁴ Ni sa oji nodra vesuki koya, sa dai i na vale ni viviesu, sa soli koya vi ratou e lewe va na sojia me ratou yadravi koya; ni sa nanumi ni na yadji vi ira na tamata ni sa oji na kana vata ni qai-sivia. ⁵ Sa jiko o Pita i vale ni vivesu, ra sa daumasulaki koya jiko vua na Kalou o ira nai soqosoqo lewe ni lotu. ⁶ I na bogi ni bera na nona qai yadji koya mai o Eroti me mai vilewai, sa moce o Pita i na kedrau maliwa e rua na sojia, sa vesu tu i na sinucodo e rua, a ra sa tu nai vatawa i na mata ni darava me ra yadravia na vale ni vivesu. ⁷ Ka raicia, sa dua na agilosi ni Turaga sa qai mai, sa cila yani e dua na rarama i na vale ni vivesu. Sa tavia na sarisari Pita o koya, sa vayadraji koya sa tukunia, "Tu cake vatotolo," sa taluva tani na sinucodo mai ligana.

⁸ Sa tukunia na agilosi vi koya, "Vaucia na nomui curucuru, dara na nomui vava." Sa caka va kinia o Pita. Sa tukunia vua na agilosi, "Mo vaitutuvitaki iko mada qai muri au." ⁹ Sa muria na agilosi o Pita a rau curu yani i tuba. Sa reva ni kila o koya ni ka sa caka na agilosi e ka djina. Sa nanumia liga ni sa raicia jiko ina raivotu. ¹⁰ Ni sa siviji ratou nai matai ni vatawa vata na kenai karua, rau sa yaco mai i na bai kaukaumea sa basika mai i na koro; sa tadola vata ki koya liga. A rau sa curu i tuba sa sivijia e dua na tolo-ni-sala, sa qai daini koya vasauri na agilosi. ¹¹ Ia ni sa qai kilai yalona mai o Pita, sa tukunia, "Ke au sa qai kila djina sara ni sa tala mai na nona agilosi na Turaga, sa vabulai au mai na ligai Eroti, mai na nodrai naki keceliga na kai Jutia." ¹² Ni vananumakia jiko, sa yaco o koya i na vale ni Meri na jinai Joni, sa yacana vokiliga o Marika, ra sa lewe levu ra sa soqoni vata kinia me ra masu. ¹³ Ni sa tukituki o Pita i nai sogo ni matamata-ni-koro, sa qai e dua na vada me varorogo na yacana o Rota. ¹⁴ Ni sa kila na domo i Pita, sa marau ke se reva mada ni dola nai sogo; sa cici i loma sa tukunia ni sa tu o Pita i na matamata-ni-koro. ¹⁵ Ra sa tukunia vua, "Iko sa lialia." Sa cikevi ira jiko liga o koya ni sa va kinia. A ra sa qai tukunia, "Qori na nona agilosi." ¹⁶ Ni sa tukituki jikoliga o Pita, ni ra sa dola na darava, ra sa raici koya ra sa reucala. ¹⁷ Sa vatabataba vi ira o koya me ra jiko lo, sa tukunia vi ira ni sa yadji koya mai na vale ni vivesu na Turaga. Sa tukunia, "Qai tukunia na vika ke vi Jemesa vata ki ira vokiliga na viwekani." Sa qai daini ira o koya sa qai i na dua voki na vanua. ¹⁸ Ni sa siga na vanua, sa reva ni lailai na nodra kidroa na sojia se sa qai beka i vei o Pita. ¹⁹ Ni sa vaqarai koya o Eroti, sa reva ni raici koya, sa vatarogi ira nai vatawa, sa solia na lewa me ra vamatei. Sa qai sobu o Eroti mai Jutia i Sisaria me jiko kinia. ²⁰ Ke sa cudru valevu o Eroti vi ira na kai Taia vata ki Saitoni. A ra sa qai vi koya ni ra sa lomavata, ra sa vamasuji Pilasito, o koya sa lewa na vale ni moce ni tui, me vukei ira, ra sa masujia na vivinakaji i na vuku ni nodra vanua ni dau yadji mai na kedra mai na nona vale na tui. ²¹ Ni sa yaco na siga sa lokuci, sa vaicurucuru o Eroti ina curucuru vaturaga, sa dabe i na nonai jikojiko vaturaga, sa vunauci ira. ²² Sa ra kailavakia o ira na tamata, "Sa domo ni kalou ke, sa reva ni domo ni tamata!" ²³ Sa yaviji koya vasauri e dua na agilosi ni Turaga. ni sa reva ni varokorokotakia na Kalou o koya; sa kani koya na baca sa mate yani. ²⁴ Na vosa ni Kalou sa tubu sa levu sara mai. ²⁵ O rau o Panapasa vata ki Saula rau sa vaojia na nodrau cakacaka, rau sa lesu i Jerusalemi, rau sa yadji Joni sa yacana vokiliga o Marika.