¹ Ia au sa varojia, i na mata ni Kalou, vata ki Jisu Karisito, o koya ena lewai ira na bula vata ki ira na mate i na nona rairai mai vata ki na nona matanitu; ² mo vunautakia na Vosa; gumatua i na gauna vinaka, i na gauna ca; mo tukunia na ka e ca, mo vunauci ira sa cala, mo dauvarojia jiko i nai vavuvuli ka vosojia valevu sara. ³ Ni na yaco na gauna ra na reva ni vosojia kinia nai vavuvuli dodonu; ia ena va na nodra gagadre ca, ra na valewevuqataki ira kinia na nodra i vavuvuli, ni sa qasikanunu na daligadra; ⁴ a ra na vagolea tani na daligadra mai na ka djina, ka lesu ki nai tukutuku laliga. ⁵ Ia o iko, mo yalomatua i na ka keceliga, mo vosojia na ka rarawa, mo caka na cakacaka ni vavuvuli, vayacora sara na ka o sa lesi kinia moi talatala. ⁶ Niu sa varau tu meu liviraki, ka sa voleka na siga ni noqu toki yani. ⁷ Au sa vala oji i nai valu vinaka, au sa cicivia oji na cere, au sa tauria matua na vabaujia: ⁸ imuri, sa maroroi me noqu nai sala vaturaga ni valavala dodonu, o koya ena solia mai vi au na Turaga, o koya na turaga ni lewa dodonu, i na siga ko ya; ia ena reva vi au duadualiga, vi ira kece vokiliga era sa vinakajia na nona rairai mai. ⁹ Gumatua mo qai variri mai vi au: ¹⁰ ni sa daini au o Timasa, ni sa lomani vuravura ke, ka sa qai ki Cesalonaika; o Kirisiki ki Kalatia, o Taito ki Talimetia. ¹¹ Sa jiko vi au o Luke duadualiga. Yadjii Marika mo drau qai vata kaya mai: ni sa yaga vi au o koya i na cakacaka. ¹² Au sa talai Tikiko ki Efeso. ¹³ Ai tutuvi au ma dainia mai Tiroa vi Karipo, ni o sa qai mai, mo yadjia mai, vata ki nai vola, ia mo nanumia sara jiko nai vola kuli-ni-sipi ¹⁴ Sa levu na ka ca ma caka vi au o Alekisada na matai ni parasa; ena sauma vi koya na Turaga me va na nona cakacaka: ¹⁵ mo qarauni iko vokiliga maivua; ni sa qajia valevu na nitou vosa o koya. ¹⁶ Niu a tukuni au mada iliu, sa reva e dua na tamata kirau sa tu vata kaya, ia sa daini au o ira keceliga: me kakua ni wili vi ira. ¹⁷ Ia sa tu vata ki au na Turaga, a sa vakaukauwataki au; me kilai sara i na vukuqu na ka sa vunautakia, me ra rogocia vokiliga na vimatanitu keceliga; ia au ma vabulai mai na gusu ni laioni. ¹⁸ Ena vabulai au na Turaga mai na ka ca keceliga, ka na vayacori au vokiliga ki na nona matanitu valomalagi: me caka vua na varokoroko ka reva ni mudu. Emeni. ¹⁹ Au sa loloma yani vi Pirisila vata ki Akuila, vi ira vokiliga na lewe ni vale i Onesiforo. ²⁰ Sa jiko mai Korinica o Erasito: ia au sa daini Tirofimo mai Milito ni sa tauvimate. ²¹ Gumatua mo liu mai ni sa bera na vula i liliwa. Sa loloma yani vi iko o Upolo, vata ki Putena, vata ki Laino, vata ki Kilotia, vata ki ira keceliga na viwekani. ²² Me jiko vata ki na yalomu na Turaga o Jisu Karisito. Me nomudou na loloma. Emeni.