¹ Oi au o Paula, nai apositolo i Jisu Karisito i na lewa ni Kalou, i na vuku ni bula ka yalatakia, sa tu vi Karisito Jisu, ² vi Timoci, na noqu gone ni toko: Me yaco na loloma, na yalololoma, na vacegu mai vua na Kalou o Tamada vata ki Karisito Jisu na noda Turaga. ³ Au sa vavinavinaka vua na Kalou, o koya au sa qaravia i na yalo djina me va na nodra i valavala na qase iliu, niu sa reva ni mudu ni nanumi iko i na noqu masu i na bogi vata ki na siga; ⁴ niu sa gadrevia valevu meu raici iko, niu sa nanumia na wai ni matamu, meu vasinaiji kinia i na marau; ⁵ niu sa vananumia i na vabaujia djina sara liga sa tu vi iko, ka tu iliu vi Loi na bumu, vi Unaisi vokiliga na jinamu, au sa djinajia sa tu vokiliga vi iko. ⁶ O koya ke au sa vananumi iko kinia mo vauqejia nai solisoli ni Kalou, sa yaco vi iko i na vitabaki ni ligaqu. ⁷ Ni sa reva ni solia mai vi kita na Kalou na yalo ni rere: na yalo ni kaukauwa liga, vata ki na yalololoma, vata ki na yalomatua. ⁸ O koya mo qai kua ni maduatakia na kenai tukutuku ni noda Turaga, se oi au na nona tamata sa vesu tu: ia mo vosojia na vivararawataki i na vuku ni tukutuku-vinaka me va na kaukauwa ni Kalou; ⁹ o koya sa vabulai kita, ka sa kacivi kita me da yalosavasava, a sa reva liga i na vuku ni noda cakacaka, i na vuku ni sa nonai naki liga vata ki na loloma laliga ka soli vi kita iliu, i na vuku i Karisito Jisu, sa vatekivu imuri o vuravura; ¹⁰ ia ka sa qai varaitakia mai ni sa rairai mai na nodai Vabula o Jisu Karisito, o koya sa vaojia na mate, ka vavotuya na bula vata ki na reva ni mate rawa i nai tukutuku-vinaka: ¹¹ au ma lesi kinia meu vunau, meu apositolo vokiliga, vata kei na nodra i vavuvuli na vimatanitu. ¹² O koya vokiliga au sa vosojia kinia na vika ke: ia au sa reva ni madua kinia: niu sa kilai koya au ma vararavi kinia, ia au sa kila djina sara liga ni sa rawajia o koya me maroroya na ka au sa solia vua ka yacovia na siga ko ya. ¹³ Mo tauria matua nai varau ni vosa djina o ma rogocia maivi au, i na vabauji Karisito Jisu vata ki na loloma. ¹⁴ A ka vinaka sa soli vi iko mo tauria matua, ni sa vukei iko na Yalo Tabu sa tu vi kita. ¹⁵ A ka ke o sa kila, ni sa dainii au o ira keceliga na kai Esia; sa vakinia o Faijelo vata ki Erimojini. ¹⁶ Me yalololoma mada na Turaga kivi ira na mataqali i Onesiforo: ni sa vacegui au wasoma, a sa reva ni maduataki au niu sa vesu tu: ¹⁷ ia ni sa jiko mai Roma, sa vasaqarai au matua, a sa raicii au. ¹⁸ Me solia mada vi koya na Turaga me raicia na loloma mai vua na Turaga i na siga ko ya: ia na kena levu ni ka sa qaravia au kinia mai Efeso, o sa kila vinaka sara liga.