¹ Kitou sa qai vamasuji ikodou na viwekani, i na vuku ni nona qai voki mai na noda Turaga o Jisu Karisito, vata na noda soqoni vata ki koya, ² mo dou kua vitosoyaki vasauri mai na lomadei, se vataqayataki, me kua i na vuku ni vosa ni yalo se nai tukutuku se nai vola me va sa vu mai vi kitou, me va sa voleka mai na siga i Karisito. ³ Me kua sara ni dua me vakaisini ikodou ina dua na ka. Ni na yaco mada iliu na vuki tani, ka na varairaitaki mada na tamata ni valavala ca, vata na luve ni dauvivarusai. ⁴ O koya sa dauvorajia, sa valevulevui koya me vinaka cake i na ka keceliga sa vatokai me Kalou, se dauqaravi. I na vuku ni ka ke, sa jiko kinia o koya i na vale ni Kalou, sa dau varaitaki koya me Kalou. ⁵ Dou sa reva beka ni nanumia ni'u ma jiko vata ki ikodou, au sa dau tukunia vi ikodou na vika ke. ⁶ Ke dou sa qai kila na ka ma tarovi koya, me varaitaki mai kinia o koya ina kena gauna liga. ⁷ Ni sa cakacaka vavuni na ca ina gauna ke, sa dua sa tarovia jikoliga me yacovia na gauna na yadji tani kinia o koya. ⁸ Na qai varairaitaki mai na vunia gona, koya ma vamatea o Jisu inai cegu ni gusuna, sa vayalia na nona varairaitaki koya mai. ⁹ Sa va na cakacaka ni Setani na nona qai mai, sa caka i na kaukauwa levu vata na vivatakilakila vata na vi ka seseni sa vivakurabuitaki, ¹⁰ vata ina vi ka reva ni dodonu, sa vivacalai vi ira sa rusa, ni ra sa sece ni lomania na ka djina, me ra bula kinia. ¹¹ Ina vuku ni ka ke, sa tala jiko na vivacalai mana vi ira na Kalou, me ra vadjinajia kinia na seni; ¹² vata me ra cudruvi o ira keceliga ra sa reva ni vabaujia na ka djina, ra sa vinakatakia liga na ka sa reva ni dodonu. ¹³ Ia sa dodonu me ta dau vavinavinaka vua na Kalou ina vukumudou, na viwekani, ikodou sa lomania na Turaga, ni sa djigitaki ikodou na Kalou mai nai vatekivu mo dou bula, ni dou sa vasavasavataki i na Yalo Tabu, dou sa vabaujia na ka djina. ¹⁴ Sa kacivi ikodou kinia o koya i na vuku ni nitou tukutuku-vinaka, mo dou rawa kinia na kena kalougata ni noda Turaga o Jisu Karisito. ¹⁵ O koya mo dou tu dei na viwekani, dou tauria jiko nai tukutuku dou sa vavulici kinia mai vi kitou, i na vosa se ina nitou i vola. ¹⁶ Na noda Turaga o Jisu Karisito, vata na Kalou o Tamada, o koya sa lomani kita, sa solia vi kita na nona vacegu, sa reva ni mudu rawa na nona loloma vata nai nuinui vinaka, ¹⁷ me vaceguya mada na yalomudou, sa vataudeitaki ikodou i na cakacaka vinaka vata na vosa keceliga.