¹ Nai karua ni vola ke, oi ikodou sa lomani, au sa qai vola vi ikodou, au sa vauqejia kinia na yalomudou e savasava mo dou nanumia kinia: ² mo dou vananumia na vosa era sa vosatakia eliu na parofita yalosavasava vata ki na nitou vunau nai apositolo ni Turaga nai Vabula: ³ ni dou sa kila mada ke, ni na qai mai ina gauna emuri sara eso na dauvivasewasewani, era na dauvadamurimuria na nodra gagadre ca, ⁴ ka tukunia, Evei na vosa ni yalayala ni na qai voki mai o koya? ni ra sa moce liga na matua, a sa tu dei jiko vakinia na ka keceliga me va ni sa buli e nai vatekivu. ⁵ Ia na ka ke era sa vinakajia me ra lecavia, ni sa Vosa ni Kalou ka tu kinia na lomalagi eliu, ki na vuravura sa wase mai na wai, a sa tu ena vuku ni wai; ⁶ a sa varusai kinia na vuravura sa tu ina gauna ko ya, ina waluvu: ⁷ ia na lomalagi vata ki na vuravura sa tu ni kua, sa maroroi liga ina vosa vokiliga ko ya, sa maroroi ki na bukawaqa me yaco mada na siga ni lewa vata ki na vivarusai ni tamata reva ni lotu. ⁸ Ia oi ikodou sa lomani, mo dou kakua ni lecavia na ka ke, ni sa tautauvata vua na Turaga e dua na siga vata ki na yabaki e dua na udolu, vata ki na yabaki e dua na udolu vata ki na siga e dua. ⁹ Sa reva ni berabera na Turaga ni vayacoria na nona vosa ni yalayala, me va era sa nanumia na tamata eso sa berabera: sa vosoji kita liga vadede, ni sa reva ni vinakajia me rusa e dua, me yacovia liga na vivutuni o ira keceliga na tamata. ¹⁰ Ia na siga ni Turaga ena qai mai me va na daubutako ina bogi, ina qai tani kinia ko lomalagi ina rorogo tatamosamosa, ina waicala vokiliga na vivunika ni sa vavisa, ena vavisai yavu vokiliga o vuravura ki na ka keceliga sa tu kinia. ¹¹ Ia ni na takali yani na ka keceliga ke, a cava nai valavala sa kilikili ki ikodou, e nai valavala savasava vata ki na daulotu, ¹² ni dou sa dauwarakia ka dauvinakajia la liga na kena yaco mai na siga ni Kalou, ena takali kinia o lomalagi ni sa vavisai, ena waicala vokiliga na vivunika ni sa vavisai? ¹³ Ia oi kita, me va na nona vosa ni yalayala, eda sa warakia na lomalagi vou vata ki na vuravura vou, sa jiko kinia nai valavala dodonu. ¹⁴ Koya ke, ikodou sa lomani, ni dou sa warakia na vika va ke, dou gumatua kinia me raici ikodou o koya ena vacegu, ni dou sa reva ni tauvi duka, ka reva ni cala. ¹⁵ Ka mo dou djinajia na vosojia vadede ni noda Turaga me eda sa bula kinia; me va sa vola vokiliga vi ikodou na wekada lomani o Paula me va na vuku sa soli vua; ¹⁶ me va vokiliga ena nonai vola keceliga, ni sa tukunia na vika ke; a sa tu kinia na ka eso e dredre me kilai, ia o ira era sa reva ni vuku ka reva ni lomadei, era sa yadjia vatani, me va vokiliga kinia nai Vola Tabu kece, me ra rusa kinia. ¹⁷ Oi ikodou sa lomani, ni dou sa kila i liu, dou varaici ikodou vokiliga, de dou yadji vatani ina nodra dauvivacalai na tamatai valavala ca, dou na qai bale kinia mai na nomudou tu dei. ¹⁸ Ia dou tubu cake ena loloma vata ki na kila na noda Turaga o Jisu Karisito nai Vabula. Me caka vua na varokoroko ina gauna ke ka reva ni mudu. Emeni.