¹ Oi au o Saimoni Pita, ai talatala vata ki nai apositolo i Jisu Karisito, vi ira era rawajia na vabaujia talei sa tautauvata ki na nitou ena yalododonu ni noda Kalou o Jisu Karisito nai Vabula: ² Me valevutakia vi ikodou na loloma vata ki na vacegu ni dou sa qai kila na Kalou vata ki Jisu na noda Turaga. ³ Ni sa solia mai vi kita o koya ina nona kaukauwa Vakalou na ka keceliga sa yaga ina noda bula vata ki na lotu vokiliga, ni da kilai koya sa kacivi kita i na vanua vaiukuuku vata ki na i valavala vinaka: ⁴ o koya ke sa soli kinia vi kita na vosa ni yalayala e levu sara ka talei: mo dou rawajia kinia na ka sa Vakalou, ni dou sa dro tani mai na dukadukali sa tu e vuravura ina vuku ni daugagadre ca. ⁵ Ia, ina vuku ni ka ke, dou gumatua valevu sara kinia, mo dou vaikuritakia na nomudou vabaujia e nai valavala vinaka vata ki nai valavala vinaka ina vuku; ⁶ vata ki na vuku i nai valavala malua; vata ki nai valavala malua ena vosojia; vata ki na vosojia ina daulotu; ⁷ vata ki na daulotu ina vilomani vavitacini; vata ki na vilomani vavitacini ina yalololoma. ⁸ Ia kevaka sa tu liga ina lomamudou na vika ke, ka sa tubu cake me levu, era sa uqeti ikodou mo dou kakua ni vucesa se reva ni vua ena nomudou kila na noda Turaga o Jisu Karisito. ⁹ Ia o koya sa reva vua na vika ke sa mataboko, a sa matabuawa, a sa nanulevajia ni sa vasavasavatakia tu mai na nonai valavala ca eliu. ¹⁰ Ia oi ikodou na viwekani, dou gumatua cake kinia, mo dou vataudeitakia sara na nomudou kacivi ki na nomudou djigitaki; ni dou na reva sara ni bale, kevaka dou sa caka na vika ke: ¹¹ ni na soli vayauyau vakinia me rawarawa vi ikodou me curu ki na matanitu reva ni mudu ni noda Turaga ki nai Vabula o Jisu Karisito. ¹² O koya ke au na reva ni guce kinia niu sa vananumi ikodou jiko ena vika ke, ia sa djina liga dou sa kila, ka dou sa vataudeitakia e nai vavuvuli djina ke. ¹³ Ia au sa vasama, ni sa dodonu, ena visiga au sa jiko kinia ena vale vacevaceva ke, meu vauqejia na lomamudou mo dou nanumia; ¹⁴ niu sa kila au sa voleka ni dainia tani na noqu vale vacevaceva, me va sa tukunia mai vi au na noda Turaga o Jisu Karisito. ¹⁵ Ia, au na gumatua mada mo dou nanumia tikoliga na vika ke, niu sa mate. ¹⁶ Ni kitou a reva ni muria nai tukuni sa caka vavuku, ni kitou a tukunia vi ikodou na nona kaukauwa ki na nona qai mai na noda Turaga o Jisu Karisito, ia kitou a raicia djina liga na nonai valavala vaturaga. ¹⁷ Ni sa yaco vi koya mai vua na Kalou o Tamana na varokoroko vata ki na vidokadokai, ni sa rogo sara vua na domo o ya mai nai ukuuku djina sara vake, O koya ke na noqu Gone ni toko, au sa dauvinakajia valevu. ¹⁸ Ia na domo ke mai lomalagi kitou sa rogocia, ni kitou a jiko kaya ena ulu-ni-vanua tabu. ¹⁹ A sa tu vokiliga vi kita na vosa sa vadjinadjinatakia valevu cake, a parofisai; ia dou na caka vinaka, kevaka dou sa vananumia kinia, me va ki na cina sa serau ena vanua sa butobuto, ka malua me kida mai na mataka, ka cabe mai ki na lomamudou na kalokalo i vola siga; ²⁰ ni dou sa kila taumada na ka ke, ni sa reva na parofisai e nai Vola Tabu, sa vu ena kena kilai eliu na kenai balebale; ²¹ ni sa reva ni vu na parofisai ena gauna eliu ena lewa ni tamata: sa vosa liga na tamata yalosavasava ni Kalou me va sa vayadji ira na Yalo Tabu.