¹ Au sa varojia vi ira nai talatala qase era jiko vi ikodou, niu sa qase vokiliga oi au, ka sa dautukutuku ena ka ka vosojia na Karisito, ka sai taukei vokiliga ni ukuuku ena varaitakia mai ena gauna maimuri: ² dou vakania na qele-ni-sipi ni Kalou era sa jiko vi ikodou, ka dou vatawana, kakua liga ena loma e vosojia, ena loma liga e vinakajia; kakua liga ena vuku ni yau vasisila, ena loma liga e rekitakia; ³ ia dou kakua ni valavala vaturaga vi ira sa nomudou i tavi, ia mo dou nodra i varau liga na qele ni sipi. ⁴ Ia ni na rairai mai nai Vatawa levu, dou na rawajia kinia nai sala vaiukuuku ena reva ni malai rawa. ⁵ Oi ikodou vokiliga na cauravou, dou vamalumalumutaki ikodou vi ira na qase. Io, dou dui vaamalumalumutaki ikodou vai ikodou, ka dou vaisulu ena yalomalumalumu: ni sa vorajii ira na viavialevu na Kalou, ia sa solia nai solisoli loloma vi ira na yalomalumalumu. ⁶ O koya ke mo dou qai vamalumalumutaki ikodou e ruku ni liga kaukauwa ni Kalou, me valevulevui ikodou cake o koya ena gauna sa lokuci: ⁷ ka dou dainia vi koya na nomudou lomaocaoca keceliga, ni sa daunanumi ikodou o koya. ⁸ Dou yalomatua, dou vatawa: sa viqaiyaki voli na nomudou meca na tevoro, me va na laioni sa tagi, a sa vasaqara eso me tiloma: ⁹ dou voraji koya ni dou sa tu dei ena vabaujia, ni dou sa kila sa vayacori na ka rarawa vakinia vi ira na wekamudou era sa jiko voli e vuravura ke. ¹⁰ Ia na Kalou sa dauia na loloma keceliga, o koya sa kacivi ikodou ki na nonai ukuuku reva ni mudu ena vuku i Karisito Jisu, ni dou sa vararawataki mada ena gauna eso, ena qai vavinakataki ikodou sara, mo dou vataudeitakia, mo dou vakaukauwataki. ¹¹ Me nona na lewa ena gauna kece ka reva ni mudu. Emeni. ¹² Au sa vola valailai ka caka nai varo, a sa yadjia vi ikodou o Silivenuse, o koya au sa nanumia sa wekada dina, ia au sa vadinadina ni sa loloma dina ni Kalou dou sa tu dei kinia. ¹³ Sa loloma yani vi ikodou nai soqosoqo lewe ni lotu, mai Papiloni, era sa djigitakia vata ki ikodou; sa vakinia o Marika na luvequ. ¹⁴ Dou dui vireguci vai ikemudou e na loloma. Me tu ga na vakacegu vei kemudou kecega sa tu vata kei Karisito Jisu. Emeni.