¹ O esanogo waga at Musa dok it akhuni Israel meke dok it etai at Tuhan hasik wakhukha etai ewe elro jigisogon; "An etai at Tuhan hasik wasigin, nen an at Tuhan hogorasigin at owatne agikhe iti nen, wam kuda emenogo inom nen it akhuni kuda wolok meke emenogo inom polima laut laisasikhe. ² At Tuhan etnogo ewe an nowatne ato nen at owasik etai wakhe rek meke at o, at ewe owatne nen an tilnakhikhe o, at ewe Allah an nopase o, at ewe alep meke ikhok motok welagorek witi nen an at hogorakho motok welagarek. ³ At Tuhan etnogo at ewe wim jakherek meke; at Tuhan, etnogo etaga Tuhan iti. ⁴ At Firaun meke kereta emenogo inom at meke tentara emenogo inom ima laut emenogo po laisasikhe, at meke tentara tegelogo bisasikhe meke ima laut emenogo nabukhogon i kerbau laut etnogo akla nabukhogon usasukha. ⁵ It it inewe laut etnogo nen akla apema ukharinakhikhe; ima akla emenogo ukhat lagukha helekit weak emenogo talak. ⁶ Nopase hat iki hewe owane apik, Tuhan, hat hewe kain upuwaga at welagatek hat howatne kogat iti nen, hat hiki eweke owatneak etnogo waga, Tuhan, sabokhogon degerogo bisan. ⁷ Hat iki owatne etnogo kok etnogo waga wariginawin it nen hat hasuok iluk hagakho; hatne hukuman hitu pogoh owa meke etnogo inowa usaime, it inewe o dandum raoti werak lagarek etnogo talak weraklasuak nen. ⁸ it meke set etnogo i alrelroma lagarek-lagarek nen hulogo huk at luk nen; hulogo huk agarekkhak hulogo nen i laut hulogo huk atluk nen owalrodek huk agarekkhak hagat lagasuak nen o. ⁹ It akhuni wim inom jakharek meke emenogo nen ekhe dogolik: an it mugisik lalok nen it inowa haklasilalok nen it hagino wiligin, nen it meke jimeke timeke etoma an nen inikimo tilogo waga niluk nen it akhuni an meke supurogo; wogosalok nen nit sabokhogon nugun an nakla aga it inowa kogat biluk nen skhe sege owa onasigin; an niki owate waga nen it inewe sabokhogon degerogo bisagin. ¹⁰ Hat nen hapelaga waga hugisan, it hat hapelaga waga hugisamo nen it kilelogo ima laut etoma usoak nen o tima akin weak etnogo talak kilelogo ima laut ema usamo nen i laut nen sewel inawuak nen. ¹¹ It inewe hat hakene sa werek, it inom werek Allah, kaneke inilki nen aguak harek etnogo inom werek ya Tuhan nopase; hat hakena sa, hat tegelek sowalek dogolik kain upuwaga welagatek, it inayuk asuak nen it inayuk asusak meke hagarogo bin, hat nen ellin meke hagarogo bin? ¹² Hat eweke etnogo waga it inowa upuwaga dukhogon bin; o agat owa joma nen akla akharinawuak nen. ¹³ At meke umat emenogo inerawut sewekhogon welagakharek meke wogisan o it inerawut sewekhogon dogon dogomo nen hat wogosik lanok nen it inewe hat nen oko palogo bisasigitikmo; hat hiki owatne ak etnogo waga wogosik lano hat haila welagatekma tegelekma etomala. ¹⁴ It akhuni emenogo it inasukhasik nen, inayuk agukha nen inowa sogilrek hagatlagukha; akhuni o agat Filistin owa meke emenogo inayuk inowa dikik dekek khogon hagat lagukha. ¹⁵ It akhuni o Edom meke emenogo it inowa sogi lre-lre hagat lagukha akin werek meke inowa dekelogo motok huk agikhe it akhuni o Moap meke inetaga werek inowatne werek welagukha emenogo; it akhuni o agat Kanaan owa meke emenogo inasuk holukhasik inakmaken lagikhesik nen inoak eken didik hagakhkha. ¹⁶ It inowa lre-lre hagat lagikhe inayuk nen it akhuni Kanaan inetaken hemulruk at hagat lagikhe nen inayuk agikhe at Tuhan owatne etnogo inelokhoma bigin apasikhe inetaiken hemulruk at hagat lagikhe owatne etnogo inelokhoma bigin apasikhe inetaiken hemulruk at hagat lagikhe, nen it umat Israel meke emenogo lagukha, it Israel meke Musu emenogo haginakhikhe; it akhuni Israel meke etnogo holak selegerogon bisa o, nen hat waganogo wogisik lan o. ¹⁷ Hat it wogisik lalok nen hat mikho bisigin mo harekma etnogola, o tom owa harerekma owa sowalekma etnogola, hat halrik at nen halogo bisikgin mo etnogola, ya Tuhan nopase; o itila an rekma iluk tegelogo bisiginmo hat hikiwaga nen halogo bisiginmo, ya Tuhan, Tuhan nopase. ¹⁸ Tuhan hat nen wene iluk ikhok welagarek meke muk nen aukhe nen ikhok motok dogogin meke wene ji wulawogo bigin mo." ¹⁹ At Firaun meke kuda emenogo inom kereta emenogo inom nen it akhuni kuda owa dagiluk lagukha emenogo inom it ima laut akla usaukha nen at Tuhan etnogo nen i laut etnogo awel dagakhogon it akhuni emenogo at Tuhan nen i laut turumo enogo kagukogon bisikhemo nen i laut tulrumo akla kalekma emenogo welrelagikhemo nen it akhuni Israel meke emenogo halok i laut kagalekma welre lekmake emenogo lagukha. ²⁰ Nen at Miryam, nabia, at Harun iru etnogo, o etai wakharek meke emenogo ikimo waganikhe, nen it homalrugi aperek emenogo it etai kokhak meke emenogo waganukhasik nen at he Miryam elokhoma melasik lagukhasik nen o rebana etai waklarek meke emenogo inikimo waganukhasik nen etai emenogo inalhik inal hogok wakhukha. ²¹ At Miryam etai enogo warik laga-laga dogolik at nen it homalrugi ato emenogo wogisik inom nekhe lagukha: "Nit etai at Tuhan meke wasuk ok iluk isukha, at ewe kain upuwaga meke ma; At nen kuda inom akhuni kuda owa dagiluk inom lagakharek meke emenogo warogo dekalogo ima laut etomala po akla laisaikhe."

²² At Musa nen it akhuni Israel meke jogisekhe dogolik hit i laut Teberau akla nen lani o iluk jogosasikhe, nen it o lima etaga syur etomala lagukha; it holagalrem lagu nem iniki henagan noge isukha o limo esoma nen it i nasak dek at hagat lagikhe. ²³ It akhuni Israel meke it holak owa lagunem-lagunem o etaga Mara, itilah ukilagukha, meke it o Mara ukilagukha meke it inasak dek it iniki dek welagukha, it esomala neke dogosak meke i o Mara esomala alre apok hagat laga lagkhe. Isi nen o etnogola etaga Mara salogo bisukha.