¹ At Tuhan nen at Musa Jogokhi; ² "It elege akhuni Israel meke inaburi alep itago meke etoma tegelogo bisalok nen an woknitni o, it akhuni Israel meke inelawutla nen itaklagakha meke etoma, it akhuni IIsrael meke inaburi inom nen it meke wam domba kambing lembu sapi eagi alep itago meke etoma inoman woknitni o, it inewe etoma an meke o." ³ At Musa etnogo nen it akhuni Israel meke emenogo jogosasikhe, "O Jogotakne jiwaga at hit dukhilani, o jiwaga hit o Mesir nen dukhi agasipmo, hit o Mesir welagep etoma akhuni rekma meke welagepma, at Tuhan iki owatne waga hit o Mesir nen wokhisik dukhi agama. Etnogo hit hipiri roti weak meke etoma hit nasak dek o. ⁴ O ji waga hit dukhilani, o jiwga tanggal i opakiat nen bulan i opakiat, hit o Mesir here disalok o Israel dukhi lani. ⁵ At Tuhan nen hit wokhisik o akhuni Kanaan rekma, akhuni Het rekma, akhuni Amori, akhuni Hewi, nene akhuni Yebus rekma, o hit hinagonalak hinakhopalak wene warisasigimo o itilal hit hurelasisugun nen, hit o itila ite at luk dogogun o, hit o itilah ierak apusu inom semuk apusu inom apik werekma hiwiku jogoku neko motok-motok dogolik ibadah ji sun jiwaga at hagarik motok-motok laga dogo. ⁶ O tujuh ja hagat lagat larik laga kolrek hi qroti owasi dek meke hano meke jiwaganiluk nilik laga dogono, hetujuh ji hari raya at Tuhan meke o iluk hit hagarik laga dogono. ⁷ Roti hano meke owasi dek meke ji o tujuh ja hagat larik laga kolrek nilik laga dogono; owasi weak meke halok hineleken lakhugup, nen hit o lugun mo etoma lalok nen ragi owasi weak meke iti hinileken lakhugup. ⁸ O iti waga hit hinaburi elege etoma jogisano; 'Ibadah at Tuhan etaga kogokhe dogosak ji hit hinakla ewerekhogon dogosak o ji at Tuhan nen hagarogo an hasik hagarogo bisikhemo nit o Mesir nen dukhi agakolrek.' ⁹ Wene ji hasik nen hit hinikimo dekelogo bigik nen hinakla ewerek dogowagik nen iluk hit hinilhawaga dekelogo bino. Nen hukum Tuhan hape ekaka waga eta dogoak nen o, at Tuhan iki awatne kogat etnogo waga hit wokhisek o Mesisr nen dukhiagikhe o. ¹⁰ At Tuhan nen o hulri warogo bisikhemo dogolik, ji tahun ti tahun lagodogolik inikimo abethogon ket khogon hogo dogolik nen hukum ikhok motok dogoak iluk hagarogo bisikhe meke ji hinikimo abet hogon hago dogolik nen hagarik laga dogono. ¹¹ At Musa nen it akhuni Israel meke emenogo jogosasikhe, "At Tuhan nen hit waganogo wokhisek o negeri Kanaan wene bogokhogon palogo nen hit hinagona hinakhopalok jogisasikhemo etomala dogosak o. O agat Kanaan iti hit ite dogogun o. ¹² It akhuni inom it ineagi inelawutla nen alep agik itagi nakla meke etoma mepersembahkan at Tuhan wogosusak o. Hit nen hiwiku jogoku hit meke wam eak alep, kulok it akhe halok at Tuhan wogosusak o. ¹³ At keledai sapi talak etnogo eak alep meke, it akhe halok domba oko palusak o; nen it oko palugun dek halok, hit nen wam keledai etogo alrokop ade palusak o. Meke akhuni halok, inaburi alep itogo meke hit hinam welagep meke inaburi etoma oko palinawusak. ¹⁴ Nen hit hinaburi nen hinok wokhinakhe halok jawoka neke nen; iti neke sogo usak isihalok? Hat wene oko at jogosigiluk halok: at Tuhan iki owa ine owa nit o Mesir nen waknisik dukhiagikhe, nit it rekma uma iatua meke welaugumo. ¹⁵ Nen at Firaun etnogo ukuloak abereak nen nit dukuak iluk nen at ikimo nen eheseogo it loak iluk heredisigi dek, it nen at Tuhan etnogo nen it akhuni Mesir meke inaburi elege alep itago nmeke emenogo sabokhogon waninakhikhe, it akhuni meke inaburi elege alep meke itogo emenogo inom nen it meke wam domba kambing lembu sapi eagi kulotek alep meke itago emenogo inom. Iti halok an nen wam domba kambing lembu sapi eak kuloktek alep itakherek meke emenogo mempersembahkan hagarogo at Tuhan wogokhe lagi o, it akhuni inaburi an naburi inom inak werek emenogo an oko palrakhe lagi o. ¹⁶ Wene iti inelekelro nen hinikimo iwat hagarogo busak nen inikimo herewo rogo bigik nen inilhaoakma helre warogo wbigik hagasusak inelekelrogo negen, iti at Tuhan iki owat nen waga o Mesisr nen woknisik dukhiagikhe. ¹⁷ At Firaun etnogo nen it akhuni Israel meke emenogo at ikimo nen henedisasi khemo nen it lagukha. It akhuni Israel meke halok o kota Filistin ke lagukhama nen, at Tuhan nen wogosik lagisik lagi dek here disasikhe; at Allah nen isikhe; "It akhuni Israel meke nen nit ninerawut nen weak hagakhoma ugun, it wim kogat it hagarik lagukha it akhuni Filistin meke inom, etnogo nen it akhuni Israel meke emenogo inapoke o Mesir lagukha." ¹⁸ Nen at Tuhan Allah etnogo it akhuni Israel meke etnogo halok apoke dagalogo nen o limoke ke nen dagak-dagak wagisik ilaut terbauke wogisik lagakhe. Nen it akhuni Israel meke wim jawusak owa. ¹⁹ At Musa etno at Yusuf oak emenogo wolok wagikhe, nen at Yususf etnogo nen it elege akhuni Israel meke inaburi emenogo ane ewenogo at meke tilrip hogon palogo bisikhe, "At Allah nen hit hinelokhoma owatne werek meke hagasigin, nen hit an noak etoma wolok o jomala nen wolok lani." ²⁰ It akhuni Israel meke emenogo it o sukat nen lagukhasik nen it o etoma nege wisukha, i laut jip itla emenogo. ²¹ At Tuhan etnogo at it inelokhoma alep agik lagikhe, o dikagane emenogo waga aisa emenogo it holagalrem woisik laga-lagikhe, nen o hiwakone emenogo waga isagak jiwalrogo wogisik laga-lagikhe, etnogo nen it akhuni Israel meke emenogo it holak hiwako dikagane it holak lago motok laga lagukha. ²² O dikene emenogo waga o isa emenogo it inelokhoma laga lagikhe nen o hiwako emenogo waga isagal jiwalrogo it inelokhoma wogosik laga lagikhe.