¹ १) पयलथी वचन आतलो, अन वचनम देव नी हारी आतलो,अन वचन देव आतलो.

² २) याहा पयलथी ज हारी आतलो.

³ ३) बट्ठा ज तिनाथी ज बनना,अन जा काय बनना आस, अन तिमथी काय बी वस्तू तिना शिवाय ना बननी मिय. ⁴ ४) तिम जिव आतलो अन ता जिव मनुस नी ज्योती आतलो.

⁵ ५) अन ज्योती आंधाराम चमक आस,अन आंधाराय तिला हारि ना थवाना. ⁶ ६) यक मनुस देवनी गमथी यनो अन उभो रनो,जिना नांव युहन्ना आतलो.

⁷ ७) अन तो साक्षी देवाल येनलो का उजाया ( ज्योती)नी साक्षी देय, किसाका होग तिनी वजयतती विश्वास लावी.

⁸ ८) अन तो ज्योती कान आतलो,पन तो ज्योती नी साक्षी देवाल पयलो आतलो. ⁹ ९) खरी ज्योती जी परतेक मानुसला उजायाम ली यय आस, जी दुनीयाम यनार आस. ¹⁰ १०) अन तो दुनियाम आतलो,अन दुनिया तिनाती ( उत्पन)बननी होयली आतलो,अन दुनिया तिला नाहा वयकनी.

¹¹ ११) तो तिना घरमं यनो पन तिला घरवाय तिला कायना अपनावन. ¹² १२) पन जतल तिला अपनावन,अन तो तिसला देवना पोरे बनवानो (अधिकार ) हक्क देनो मंजे जो तिनी नांव प विश्वास थवी तो.

¹³ १३) ते नाहा त रगतथी,नाहा शरीर नी ईच्छाती,नाहा का मानुस नी ईच्छाती,पेन दैवनी ईच्छाती उत्पन्न होयलो आस. ¹⁴ १४) अन वचन शरीर रुप धरनो,अन अनुग्रह अन खरायती भरायन आपनी वचम तो यनो.अन तिनी ईसडी महिमा देखन जिसाका आबानी पकला पोर्याप आस.

¹⁵ १५) युहन्ना तीन बाराम साक्षी देनो,अन गगापन आकनो यो तोज आस जिना बाराम हाय तुला आकनोल, अन जो मनी पाट यय रनो तो मनातीबी मोटो आस, किसाका तो मनारीबी पयलानो आस. ¹⁶ १६) किसाका तिना भरपुरी ती होगला मियना मंजे दया प दया.

¹⁷ १७) ईनी करता का नियम त मुसानी वजयती देवायल आतलो,पन दया अन खरापन यीशु मसिंह नी वजयती पोचना.

¹⁸ १८) परमेश्वर ( देव) ला कोनीबी ना हेरना, यकलो पोर्यो ( आंडर) जो आबानी ( पिता) नी उगडीम आस तोज तिला परगट करनो. ¹⁹ १९) युहन्ना नी गवाही ई आस का जव यहुदी यरुशलेम मती याजकास( सेवक ) अन लेवीयला ई पुसवाल मोकलना , " तु कोन आस?"

²⁰ २०) अन तो ई मानी लेनो,अन नाहा आकनो, अन मानी लेनो का " होय मिय मसिंह ना ".

²¹ २१) तव ते तिला पुछना," त फिरी कोन आस "? तु एलीयाह आस का? तव तो आखनो हाय नाहा, " त तु तो भविष्य आखनारो इस ? आन तो आखनो का " नाहा". ²² २२) अन तव ते पुछना , अत तु आस कोन ? किसाका हामला मोकलनारसला जवाब देवुला तु तुना बाराम काय आखी रनो ?

²³ २३) तो आकनो का,जे यशायाह भविष्य आकनारो आकनो हाय जंगलम गगानारानो शब्द आस का तुमू देव ( प्रभु ) नो रस्तो सिधो करा. ²⁴ २४) तिसला फरोशीना गुमरी मोकलीला आस.

²⁵ २५) अन ते तिला यक सवाल पुछन, " आन तु नाहा मसिहा मि य,अन नाहा एलीय्याह मि य,का नाहा तु तो भविष्य आकनारो मि य, त फिरी बाप्तिस्मा किसा देव आस ? ²⁶ २६) युहन्ना तिसला जवाब देनो,हाय त पानी थी बाप्तिस्मा देव आस,पन तुमनी वचम यक मनुस हुबो रयलो आस, जेला तुमु कायना वयकत.

²⁷ २७) मंजे मनी बाद जो यइ, जोडानो लसडीयो सोडवानी लायक बी नाह मिय.

²⁸ २८) यो गोटीयो यरदन नी पार बेतनीयाह म होन्यो,ताहा युहन्ना बाप्तिस्मा देवु लागो. ²⁹ २९) अन बिसरो दिन यीशु ला तिनी गुम येता देखीन आखनो, देखा ई परमेश्वर ( देव ) ना मेंडाना बच्चा आस,जो दुनीया ना पाप ली आस.

³⁰ ३०) यो तोज आस जिना बाराम हाय तुमला आखनोल, का यक मनुस मनी गुम यय आस.जो मनाथी श्रेष्ट आस,किसाका तो मनाथी पयलानो आस.

³¹ ३१) हाय तिसला का न वयकू लागो, तिन करता हाय पानीथी बाप्तिस्मा देतो यनो,किसा वारु का तो इस्राएल म यव ( प्रगट) वय. ³² ३२) युहन्ने ई गवाय देनो " हाय आत्माल खबुतर नी रुप म वादयाम तीप उतरता देखनो,अन तो तिप रोकाय गयो.

³³ ३३) हाय तिसला कायना वयकु लागो, पन जो मला पानी थी बाप्तिस्मा देवाल मोकलनोल तोज मला आखनो, " जिप तु आत्माल उतरता अन बसता देखस; तोज पवित्र आत्मा थी बाप्तिस्मा दैनारो आस.

³⁴ ३४) हाय देखनो अन गवाय देदली आस का, यो देव नो पोर्यो आस. ³⁵ ३५) बिसरो दिनला युहन्ना अन तिना चेलासमती बेन जन सुबोध रनाल.

³⁶ ३६) येशु यव लागो, तव तो नजर टाकीन आखनो " हेरा ई देव ( परमेश्वर ) ना पाटडा ( मेम्ना ) आस. ³⁷ ३७) तव त्या बेन चेला वनायन येशु नी पसय चालवाल लागा.

³⁸ ३८) येशु फीरी तीन पसय यता हेरीन विचारनो; " तुमु काय हेरता फिरी रना? "अन त्या तेल आखना " हे गुरू तु कहा रय रनो आस? "

³⁹ ३९) अन् तो तिसला आखनो चाला ते हेरी लेशा; अन तव त्या पयन तीसना रवानो जागो हेरना, अन तो दिवस तिना हारी रना अन ई तव दसवा कलाक नी बराबर आतलं.( पारगा पयन चार वाजना ) ⁴⁰ ४०) त्या बेन मती जे युहन्ना नी गोट वनायन येशु नी पसय गयला ते मन यक शमौन पतरस नो भाउस आन्द्रियास आतलो.

⁴¹ ४१) तो पयल तिनो सगो भाव शमौन नी हारी मियीन तिला आखनो; " हामला ख्रिस्त ( येशु मसिंह ) मिय जायलो आस.

⁴² ४२) अन तो तिला येशु नी जाग लावनो ; येशु तिनी गम देखीन आखनो, " तु योनानो पोर्यो शमौन आस ; तु ( कैफा ) मंजे पतरस आखवासे . " ⁴³ ४३) बिसरो दिनला येशु गालील ला जावानो ईस्छा करनो, अन फिलिप्पुस ला मिईन आखनो, " मनी पसय होय जा . "

⁴⁴ ४४) फिलिप्पुस त आन्द्रियास अन पतरस ना शहेर ( नगर ) बैतसैदा नो रनारो आतलो .

⁴⁵ ४५) फिलिप्पुस नतनाएल ला मियनो अन तिला आखनो , नियमशास्त्रम जिना वाराम मुसा अन भविष्य आकनारा लिखेल तो हामला मिई गयो आस. तो येशु नागरी युसुफ नो पोर्यो आस.

( मत्ती २१:११ )

⁴⁶ ४६) नतनाएल तिला आखनो,काई कोई सारी वस्तू भी नासरथ मती निंगी सकी का ? फिलिप्पुस तिला आखनो, आव येयन देखील लेव.

⁴⁷ ४७) येशु नतनाएल ला तीनी गम यता दखीन तिनं बाराम आखनो , देखा यो खर खर इस्रायली आस.इप कपट कायना मिय.

⁴⁸ ४८) नतनाएल तिला आखनो, तु मल किस काय वयक आस ? येशु तिल जवाब देनो,इनाती पयल फिलीप्पुस तुल वारी ली यनो, जव तु अंजीर झाड नी हेटा आतलो, तव हाय तुला देखनोल. ⁴⁹ ४९) नतनाएल तिल जवाब देनो, ऐ रब्बी तु देव ( परमेश्वर ) नो पोर्यो आस ; तु इस्राएल नो महाराजो आस.

⁵⁰ ५०) येशु तिल जवाब देनो, हाय जा तुला आखनो का हाय तुल अंजीर झाड नी हेटा देखनोल ईनी करता विश्वास करी रनो आस ? तु ईनाथी मोट मोठा काम देखस. ( युह.११:४० )

⁵¹ ५१) तव तो आखनो " हाय तुला खर खर आखु आस का तुमु स्वर्ग ला खुल्ला अन देव ( परमेश्वर ) ना स्वर्गदुतसला मनुसना पोर्येप उतरता अन उप चढता देखसा .