¹ यापने ख्रिस्ताआ पे काय आश्वासन मोयाआ काय सांत्वन आत्म्याआ काय सहभाग काय कालावाला व करुणा ई जर हाय. ² तर तुमा एकचित्त वेरा एक बीराप सारखीच मोया केरा आने एकजीव विन एकमोनाकी वेरा या प्रकारा की माआ आनंद पुरो केरा. नम्रते केताआ विनंती ³ आने तुमा विरोधाकी किंवा पोकलो अभिमानाकी काय केरुला नाहा, पेन मोनाकी मोन लावीन आपु पेक्षा एकबीराल मोडो माना जोजे. ⁴ तुम्हा केडोच आपू विचार नाहा केरुलो तर विहराबी विचार केनु हाय. प्रभु येशूअ नम्रता आने त्यागा उदाहरण ⁵ एहकी जी चित लागवुनु होवाय ख्रिस्त येशुआपे आथी तिन तुम्हाप बी राजोजे. ⁶ तो देवाआ सारखो रीन तियाय आपु देवाआ होस राआ केता ई लाभ हाय एहकी तियाय मान्यओ नाहा. ⁷ तर सोताहाल रिकामो केयो काहका माहा रुपाम वीन दासाआ स्वरुप धारण केयो. ⁸ आने माहा प्रकृती एहकी प्रकट वेयो तियाय सोता हाल लीन केयो आने तियाय मरण आने तेबी वधस्तंभावने मरण भोग्यो इही लुगू आज्ञापलन कीन तियाय सोता लीन वेयो. ⁹ याकेता देवाय तियाल बादाकेता उचे केलो हाय आने बादा नावापने श्रेष्ठ नाव तो तीयाल देदलो हाय. ¹⁰ याकेता की होरगांम तोरतीप व तोरती ऐठा प्रत्येक एक गुडगो येशुआ नावाकी टेका जोजे. ¹¹ आने ई देवाबाहाका गौरवाकेता प्रत्येक जीभी की येशु ख्रिस्त हा प्रभु हाय एहकी कबुल केरा जोजे. सत्शील तारणप्राप्ती पुरावो हाय ¹² काहका माआ मोयालाहा जे तुमा बादीदाव आज्ञापालन केते आले, ते तुमा आय जागे रीया की नाहा तर विषेश कीन आमी काहाका आय जागे नेयरीयो तेबी बीन व कापीन आपु तारण साधील्या. ¹³ काहाका इच्छा केनु आने कार्य केनु तुमापेन हाय आपु केतो हाराकेता साधीलीन देनारो तो देव हाय. ¹⁴ जेबी काय तुमा केराहा कुरकूर आने वादविवाद न केता केरा. ¹⁵ याकेता की या कुटील आने विपरीत पिढीमने तुमा निर्दोष व निरुपद्रवी देवाआ निष्कलंक पोयरे एहकी वेरा जोजे. तीया लोकाहामे तुमा जीवनाआ वचन आगला किन देखवता ज्योती होस जगाम देखाताहा. ¹⁶ जीवनाआ वचनाल पालीन ज्या एहकी वेयो तर माआ धवडुनू वाया हाय नाहा व माआ केलेा वाया गिहलो नाहा एहडो अभिमान माल ख्रिस्ताआ दिही हारा केरा कारण वेरी. ¹⁷ तुमा विश्वास यज्ञ व सेवा वेरी वेरीतेबी आय अर्पिला जायरीयो हाय तेबी आय तिया बद्दल आनंद मानेह व तुमा बादाआरी आनंद कीहु. ¹⁸ आने तियायुच तुमा आनंद माना व माआरी आनंद केरा. तीमथ्य ¹⁹ प्रभु येशू म आय आशा कीहु की, माहारीच आय तीमथ्याल तुमाहोवे मोकले काहका तुमा विषयी गोठ जाईन माल समाधान वेरी. ²⁰ काहका तुमा विशयी गोठी खेरी कालजी एहकी बीहराल केडाल सारखो वृतीई माआपे नहा हाय. ²¹ काहाका बादे सोता गोठ्या वेतेह ख्रिस्त येशुअ होवे वेते नाहा. ²² पेन तुमा तिया शील ई जाते का जेहकी पोयरो बाहकाआरी सेवा केहे, तेहकी तीया शुभवर्तमाना केता माआरी सेवा केयीह. ²³ काहाका माआ काय वेरी तो देखायाम आव तियाल मोकुलता आवी ऐहकी आय आशा किहु. ²⁴ पेन आय बी सोता माहराी आवे ऐहकी प्रभुय माल विश्वास हाय. एपफ्रदीत ²⁵ तेबी माल माआ पाहु आने मोदत केनाराव बादा सैनिक आने तुमाआ प्रेषीत आने माआ गरज मिटीवीन माआ सेवा केनारो एपफ्रदीत याल तुमा पाही मोकला मान आवश्यक वाटेहे. ²⁶ काहाका तो बीमारी हाय इ तुमा उनाले आथे एहकी तीयाल होमजायो ताहा तियाल तुमा बादा कुरकूर लागीन तो चिंताम पोडी गीयो. ²⁷ तो खेरोज मरणापाही आवी गीलो आथो पेन देवाय तियाप दया माया केयी आने तिया पुच नाहा तर माल दुखापे दुख वेरा नेय जोजे ऐहकी माआपही केयी. ²⁸ काहाका मायुय तियाल माेकला जाहखो उतावाल केयो काहका तियाल फासे भेटीन तुाम आनंद केरा आने माआ दुखा कमी वेरा जोजे तीया केता केयो. ²⁹ यापने पुरो आनंदाकी तुमा तिया प्रभुम स्वागत केरा ऐहडो मान राखा. ³⁰ काहाका माआ सेवा केनुम तुमा आथामने जी कसुर वेली हाय ती पोय काडा जोजे ताहा ख्रिस्ता सेवेकेता तियाय सोता जीव अडचणीम टाक्यो व तो मोता मोता वाच्यो.