¹ काहाका मा मोयाला पाऊलाहा, आय जिया केअता उत्सुक हाय ते तुमा माआ आनंद आने मुकुट हाय याकेअता माआ मोयाला पाऊला, तुमा प्रभुम तेहकीज धिर राखीन ऱ्या. ² आय युवदीयेला विनंती कीहु आने सुंतुखेला विनंती कीहु का, तुमा प्रभुम तियाआरी एक मानाम वेअरा. ³ आने हे माआ खेरीया हेंगात्या पेन आय तुलबी विनंती कीहु का, तु या बाईही माआरी आने क्लेमेंत आने जिया नावे जीवनाआ पुस्तकाम लेखलो हाय ऐहकी माआन मदत केअनारे तिया आरी सुवार्ता प्रचारा कामे मेहनत केअयी तियाहान मदत केआ. ⁴ तुमा प्रभुम कायम आनंद केअरा; फासे आखु, आनंद केअरा. ⁵ होग्गा लोकाहाल तुमा सहन केअनु शक्ती मालुम वेअरा द्या का; प्रभु आरी हाय. ⁶ केडाबी बाराम कालजी केअरा नाहा पेन प्रार्थना आने विनंती कीइन आभार मानीन आपु मागणी देवाल आखा; ⁷ काहाका होग्गा बुध्दीसामर्थ्याआ तिकानी रेअनारी देवाआ देदली शांती तुमा अंतकरणा मे आने तुमा विचार ख्रिस्त येशुम राखी. ⁸ ओमा पाऊलाहा, सेल्ली ओतो आखु का, जो काय खेरो हाय, जो काय आदरभाव हाय, जो काय न्याय हाय, जो काय शुध्द हाय, जो काय प्रशंसनीय, जो काय श्रवणीय, जो काय सद्दगुण, जी काय स्तुती, तियापे विचार केअरा. ⁹ मायने जो काय हिकलो हाय, जे काय स्वीकारलो आने मामने जे उनाये आने तुमाय वेअयो ते तुमाय पालन केअते रिअया, आने शांतीदेनरो देवा तुमाआरी रीअ. ¹⁰ माल प्रभुम रीइन खुप आनंद वेअयो. आमी तुमा खातोर माकेअता कालजी फासे जागती वेअयी. ई कालजी तुमा केअतुले आथे, पेन तुम्हाल मोखा नाह मिलियो . ¹¹ माल काय कमी पोड्यो तिया केअता आय गोगु ऐहकी नाह हाय, काहाका आय तिया परिस्थीतीम संतुष्ट राअकेता हिकलो हाय. ¹² गरीबी असस्थाम केहकी रेवनु ई आय जाहु आने विपुलताम केहकी रेवनु ई बी आय जाहु, केहडा बी केल्ली बी परिस्थीतीम तृप्त वेअराकेता तेहकीज उपास राअ केअता, विपुलतेम राअ केअता तेहकीज गरजाम राअ केअता मान शिक्षण मिल्लो हाय. ¹³ आने मान जो सामर्थ्य देहे तियापेन आय होग्गाज केरोकेअता शक्तिमान हाय. ¹⁴ पेन माआ दुखाम तुमा सहभाग वेअया ई तुम्हाय हारो केअयो. ¹⁵ फिलीपैकरा तुमा जाताका की, सुवार्ताआ पेलाज जाहाआय मासेदोनियामने गेलो, ताहा तुमा शिवाय केल्लीज मंडळी माअ आरी देवलामलेवलाम बाबतीम माआ भागीदार वेअयी नाहा. ¹⁶ आय थेस्स्लनीकाम आथो ताहा तुमाय एकदाव नाह बीहरीदावबी माअ गरज दुर केई. ¹⁷ आय देणगी अपेक्षा केअतो नाहा पेन तुमा इसबाम जमाआ हाय ऐहकी बाजु वादा जोजे ऐहकी इच्छा कीहु. ¹⁸ पेन माआरी होग्गा काय हाय आने खुब हाय, आने एपफदीता आथाम तुमाय जो काय मोकल्यो तो मिलीगीयोह माने खुब काय वेअलो हाय, तो काय एक सुगंध, ऐहकी देवाल मान्य आने संतोशकारक अर्पण ऐहकी हाय. ¹⁹ माआ देवाआपु संपतीनुसार तुमा गरज ख्रिस्त येशुम रिअन गाैरव केअता पुरवली हाय. ²⁰ आपु देवपिताल याल युगानयुग गौरव वेअे. आमेन. समारोप ²¹ ख्रिस्त येशुम होग्गा पवित्र जावाहान सलाम आखेहे, माआरी रेअनारा पाऊ तुमाहाल सलाम आखेहे. ²² होग्गे पवित्र जआ आने विशषत: कैसराआ कोवाआ तुमहाल सलाम आखेहे. ²³ प्रभु येशु ख्रिस्ताआ कृपा तुमा आत्माआरी रीअे.