4 तोअ विईन बाकी माहाल रोग की आली आने ते आखला इ आस्तर ते काहाल नंकामा नुकसान केयो. 5 काहाका इ तेल ता तीन होव चांदी रुप्याहा बी वाद किमतीम बेचाते आने ते पोयसा गरीब लोकाहान देता आवता . ऐहेकी आखीन तियो बायील काय काय आखा लाग्या. 6 ताहा येशु तियाहान आख्यो तीयो बायील राद्या तियोल काहाल सोतावताहा ? तियाय माअ खातोर खुबुज हारो काम केअयो. 7 गरीब लोक ता सादाज तुमा आरी रेताहा आने तुमा मोनाम जाहा आवनारो ताहा तुमा तियाहान मोदात की सेकनारा पेन आय तुमाआरी सदाज नाहा रोनारो, 8 तियाल जो काम केअता आलो तो आ तियय केअयोहो, तीयोय मांअ डाटाय जावुन तयारी केअन पेअलाज इयोय माअ आगाल आस्तर तेला की मालीश केअयोहो. 9 आय तुमहान खेराज आखुहु दुन्यामेने बादा लोकाहान जीही काही येशु देवा हाऱ्या गोठ्या आखाय जाय तिही इयो बायीय जो काम केअयो तोअ तियो इतवा खातोर आखाम आवी. 10 ताहा बारा चेलाहामेने एक चेलो यहूदा इस्कर्योत आथो येशु तीइ दा खातोर मोडा याजकाहा इही गियो. 11 जाहा याजकाही ती गोठ उनाया ताहा तीयाहील खुब खुशी वेअयी आने यहुदाल पोयसा देवनु बोली केअयी, ताह यहुदा येशुल तिई दा खातोर संधी होदा लाग्यो. 12 बेखमीर मांडाहा सोणा पेयलो दिही जाहां वल्हांडण सोणा मेडा पाटडो माअतले तिदीही ताहा येशु चेला तियाल फुच्यो, ‘आमा जायन वल्हांडण सोणा मांडा तीयारी केतेहे आमी कीही जयने तीयारी किहु ऐहकी तोअ काय विचार हाय ? 13 ताहा येशु तिया चेलाहान ऐहकी आखीन मोकल्या तुमा सेहेराम जाहा ताहा तिही एक माअहु पाअया वेंडो लिईन जाता तुमाहान मिली तिया फासाडीने जाजा. 14 तेहकी मांआहु जिया कोअमे जाय तिया कोंआ मालिकाल आखजा “गुरुजीय आख्यो का आय मांअ चेलाहां आरी वल्हांडण सोणा मांडो खाय सेकजी ऐहेंडी खोली किही हाय.” 15 ताहा तो तुमाहान एकी ओवालीवने हारी तयारी केअली को देखावी दी, तीही आपु खातोर तीयारी केअजा.” 16 फासे चेला तीहीने तिगीन सेहेराम गिया, ताहा येशुय आखला तेहेकीज तियाहान सापड्यो आने तिहीज तियाहाय वल्हांडण सोणा मांडा तियारी केअयी, 17 फासे वाअतो पोड्याताहा येशु तिया बारा चेलाहा आरी तिही आलो. 18 आने ते बाेहीन मांडा खताला ताहा येशुय आख्यो, “आय तुमाहान खेरीज आखुहु, ‘तुमाहांमेने एक जाे माले दुशमनाहा आथाम तीइ दी, तो माआ आरीज मांडो खाय रियोह . 19 ताहा चेला निरास वी गीया एका फासाडी एक तीयाल फुसताहा, तो आय हाय का ? 20 तीयाय तियहान आख्यो, “ बारा चेलाहामने एक जां हाय ताे माअ आरी थालीम आथ टाकी रियोहो तोज. 21 आने तिया बोद्दल पवित्र शास्त्राम जेहेकी लेखलो हाय तेहकीज जाई खेरो पेन जीया माअहा आथाकी माअहा पोयरो तेराम जाय तिया नाश वेरी तिया जोल्मोज नय वेअतो ता तिया खातोर हारो आथो.” 22 जाहा ते मांडो खातला ताहा येशुय मांडो आथाम लिईन प्रार्थना किअने मुड्यो आने चेलाहान दिइन आख्यो, “ल्या आने खा, इ माअ शरीर हाय.” 23 फासो येशुय दाराक्षाहां रोहो आथाम लेदा आने प्रार्थना केईयी, तो चेलाहान दिइन आख्यो, ‘तुमा बादे इयामेने पीया, 24 तहा येशुय आख्यो, “इ माआ नवा करार रोगोत हाय. तो खुबुज लोकाहा खातोर पोडनारो हाय.” 25 आय तुमाहान खेरोज आखुहु आय देवा राज्याम नोवो दाराक्षाहा रोहो पियेहे तावलुग आय आजने दाराक्षाहा रोहो पिइनारोज नाय’ 26 तहां ती तीयाय उपकारस्तुती गीत आख्यो आने ते जैतुना डोगाहोवे निगी गिये. 27 येशुय चेलाहाल आख्यो, ‘तुमा बादा माअ बाबतीम ठाेकराय जाहा, काहाकी एहेकी लेखलो हाय आय माअ मेढे पालनाराल माय टाकीदे आने बांदे मेढे जेहेतेहे नाही पोडी” 28 पेन आय जीवी उठेहे आने तुमा आगेलाज गालील हिवालाम जाहे.
29 पेत्राय आख्यो, “ए वादाज तोअ बाबती ठोकराय पेन आय किदीहीज ठोकरायु नया.” 30 ताह येशुय पेत्राल आख्यो, “आय तुल खेरोज आखुहुं आज कुकडे बेन दाव वाहाया लागी तहा तु मान तीन दाव नाकारोहो.” 31 पेन पेत्र तियाय आजी हिमतीकी जोर दिईन आख्यो, “तो खातोर मान मोरा बी पोडी, तेबी आय तुल किदिज नाकारु नय एहकीज बांदा बी आख्यो.” 32 फासे ते गेथशेमानी नावा जागाही आला आने येशुय तिया चेलाहान आख्या, ‘आय वायज दुर जायन प्रार्थना केहें ताव तुमा एहीज बोहजा.’ 33 येशुय त्याआरी पेत्र, याकोब आने योहान तियाल लेदे. तो खुबुज दुखाम आने विग्नाम् तीया मोन पोराय आलो.
34 ताहा तीयाय आख्यो, “माअ जीव खुबुज काबराय गियोहो आमीज जीव निगीजाय ओतोहो तारास वी रयिहाे तुमा इहीज रेजा पेन हुवी मा जाहा.” 35 फासे तो वायजे जायने तोरतीवे उबंडु पोडीन प्रार्थना केरा लाग्यो, ‘की वी सेकेता वेरी ता ओ टेम माअ इहीने दुर वी जाय.” 36 आने आजी तीयाय आख्यो, आब्बा-बाहाका तोअकी बांदोज वी सकेहे ओ प्यालो माअ इहीने दुर होरकावीले तेबी बी इ माअ मोरजी नाय पेन तोअ मोरजी किई वेअ.” 37 फासे येशु तियाही आलो ताहा ते हुतला आथा तोअ विइन तियाय पेत्राल आख्यो, “तु हुवी गियोहो का ? वाय बी तुल जागतो नाहा रेवातो का ?” 38 जागते रेजा आने प्रार्थना केअतो रेजा तुमा परिक्षाम पोडा नाय. आत्मा ता तियार हाय पेन शरीरा नोबलो हाय. 39 फासे येशु तिहीने दुर गियो आने तेहेकिज प्रार्थना केअयी. 40 आने तो फसे आलो तीही ते तियाल हुतलाज सापड्या, काहाका ते खुबुज नीदवाय गेहला आथा, आने तियाय काय आखजी तोंअ तियाहान होमजातलो नाय. 41 फासे तिसरीदाव आवीन तियाहान आख्यो, ‘तुमा आजीबी हुतलाज हाय का आने आराम केअता का ? पुरो वेअयो, टेम आवी गियोहो महांअ पोयरो, पापी लोकहंअ आथुं दुखे वेठांअ आने मोई जां समोय आवि गियोअ . 42 आमी उठा, आने चाला मान तीई देनारो माहुं पाही आवि गियोहो. 43 आने येशु गोठ्या केतअलो ओतामुज बारा चेलहामुने एक जां जो यहुदा तोही आलो.आने तिया आरी मोडो याजक आने लोकाहाल डाआया आने खुबुज लोक तरवाय आने टेनकारा लिईन तुरुतुज आवि पोहचीया 44 तीया दोगो देनाराय तिया एहेकी आखी थोवलो आथो का जियाल आय मीली गुआ देहे तो तोज हाय, तियालुज तेअजा आने सांबालीन ली जाजा.” 45 ताह यहुदा आलो आने तुरुतूज येशुही जायन आख्यो, “ओ रब्बी” आखीन गुआ दाअ लाग्यों. 46 ताहा तिया लोकाहांय त्यावे आथ टाक्यो आने तिई लेदो. 47 तियाहामेनेज जे लोक पाही उबा आथा तियाहांमेने ऐका जावायन तारवा काडी आने मोडा याजका आवत्याल तारवाया की ठोक्यो आने तिया कान तोडी टाक्यो. 48 ताहा येशुय तियाहान आख्यो “काय तुमा मान बांड होमजीन तेरा खातोर तारावाय आने डेंगारा लिइन आलाहा का ?” 49 आयता दिनेरोज तुमा आरिज रिईन मंदिराम हिकवुतलो ताहा तुमाहाय मान नाहा तेअयो. पेन शास्त्रलेखाम जो लेखलो तो पुरा वेरा जोजे.” 50 ताहा तिया बादा चेला तीयाल रा दिईन नाही पोड्या. 51 ताह एक माअहु आथे तोअ मलमोली पोतडो फागीन तिया आरी चालतुले तीयाही तीयाल बी तेअयो. 52 पेन तो माअहुं मलमली पोतडो टाकी दिईन उगडालोज नाही पोड्यो. 53 फासे तियाय येशुले तियाहाने मोडा याजका ही लिगीये आने तिही बादा मोडा याजक डाआया लोक आने शास्त्री लोक टोलवाया. 54 पेत्र दुरने तियाहा येशु फासला चालीन तो मोडा याजका कोआ चौठाम आने जागल्या सिपाडा आरी हेकातो बोठो. 55 मोडा याजक आने सभायीम टोलवाला यहुदी धर्मा पंच लोक बादा येशुले माय टाका खातोर केल्ली तेबी चुकी पुरावो होदतला पेन तियाहान सापड्यो नाहा. 56 खुब माअहाय तिया विरुध्दाम खोटी साक्षी देदी. पेन तियाहा साक्षी की कावीज मेल नाहा पोड्यो. 57 ताहा बाकी लोकाहाय उबी रिईन तिया विरुध्दाम खोटी साक्षी दिईदिईन आख्यो, 58 “इ आथाकी बांदलो मंदिर आय पाडी टाकेहे, आने माअहा आथुकी नाय बांदलो एहेंकी बिहिरो मंदिर आय तीन दिहाम बोनवी काडेहे.” 59 पेन इयो गोठीकीबी तियाहा साक्षी मेल नया खाहली 60 ताहा मोडा याजकाय तिअया आगला उबी रिइया आने तियाही येशुल फुच्यों “ पेन तु कावीज नाहा गोगनारो का ? ए लाेक ताे विरुध्दाम तुल दोष लागवुता इ केहकी ? 61 पेन येशु ठाकोज रियो, तिआय तो कावीज गोग्यो नाहा, ताहा मोडा याजकाय तियाल आजी फुच्यो, “तु ख्रिस्त काय का ? गुण आखांअ लोयोक पोरमेहेरुअ पोयरो हाय का ?” 62 येशुय तियाल आख्यो, “हां आयज हाय, पेन तुमा माअहा पोयराल बादी सोकती की पोराला देवा हुदी वेला बोठलो आन जुगामेने बादलाम आवता देखाहा.” 63 ताहा मोडा याजकाय सोवताहा पोतडे फाडीन आख्यो, “देखा, आमी आपहुन साक्षीदार काय गोरज ?” 64 तुमाहाय निंदा केअयी ती तुमा उनायाहा, ता तुमाहान काय लागहे ? ताहा बांदाहाय आख्यो इयाल “माय टाकनु इ शिक्षा वेरांज जोजे” 65 ताहा बाकी लोक येशुपे थुका लाग्या, तिया डोआ बांदीन तियाल गंचहीकी ठोकीन आखा लाग्या, ‘तु ओहोके वारु केडाय ठोक्यो ?” सिपाडाहाय तीयाल आथाम लेदो आने तीयाहीबी ठोक्यो. 66 पेत्र जाहा चोवठाम आथोज ताहा मोडा याजकाइही चाकरी केनारी बायी आथी. 67 आने तीयुय पेत्राल हेकाता देखीन, तीययावेल विइन आखेहे ‘तु बी नासरेथवाला येशु आरी आथो.’ 68 ताहा पेत्र नाकारीन आने आखेहे, “तु काय आखतीही इ मान होमजातो नाहा.” पेत्र तीहीने निगीन बाअणाही मांडवाम गियो ताहा कुकडो वाहायो. 69 फासो बी तिया बायीय पेत्राल तिही देख्यो आने तिही जे लोक उबा आथा तियाहाल आखा लागी, ‘ओ तियाहाज हेंगात्यो हाय.’ 70 तहा बी पेत्रा नाकार की देदो फासो वायज वाअ लागी ताहा तियाही जे लाेक उबा आथा तियाहांय पेत्राले आख्यो, “ते खेरोज तियाहामेने एक हाय काहा तु बी गालिलामेने लोकाहा बोली गोगतोहो.” 71 पेन पेत्र हाराप दिइन शपथलीन आखा लागयो “तिया माअहा बोद्दल तुमा गोठ्या केअताहा तियाल आय ओखुतोज नाहा.” 72 ताहा तुरुतुज बिहीरीदाव कुकडो वाहाय उठ्यो, ताहा जी गोठ येशुय पेत्राल आखली ती तीयाल इत की आली कुकडो बेन दावे वाहनु आगलो तु मान ती दाव नाकारी दिहो इ गोठ इतवीन तो रोडा लाग्यो.