¹ देवा पोयरो येशु देव तिया जिवना गोठ्या आखनु सुरवात हाय. ² जेहकी यशया भविष्य केअनारो तिया चोपडीम लिहिल्याप्रमाणे, "वेअरा, मी मा दूताला तो आगडी मोखलुतो, ती मा खातोर वाट तयार केअरी; ³ जंगलाम एका बोंबलुनारा आवाज आवि रिअयोहो, देवा केअता रस्तो तियार केअरा आने सोडको सिदी केअरा". ⁴ तिया केअता योहान आलो, जो जंगलाम बाप्तिस्मो देतलो आने पापा क्षमा मिलवा केअता तुमा मोन देवा गोठी वेअला फिरवा एहकी बाप्तिस्मा संदेश देहलो ! ⁵ यहुदीया हिवालाम आने यरुशलेमाम रेअनारा होग्गा लोक निंगिन तियाहाय गिया, आने सोताह पापा कबुली किइन यार्देन खाडीम बाप्तिस्मा लेदो ⁶ योहान उटडां चांबडा पोतळे पोविन कोंबराम चांबडा पाट्टो बांदलो रेअतलो आने टीडे आने रानमध खातलो . ⁷ आने तो माहान एहकी संदेश देहलो का, "मा फाचलो तो आवनारो हाय तो माहिने बी ताकतवान हाय माय आतो लायक नाहा का तिया पागुमने बुटा दोरि खोलु ⁸ मायु ता तुमनेहेन पायांकी बाप्तिस्मो देदोहो पेन तो तुमनेहेन पवित्र आत्माकी बाप्तिस्मो दी. ⁹ त्या दिहाम येशु गलील हिवालाम नासरतामने आविन यार्देनाम योहानापने बाप्तिस्मा लेदो. व ¹⁰ आने तो पायामने निगीन उसे आलो, ताहा तुरुतज तियाय वादलो खोलाय रियोहो एहकी वेअयो, आने वादलामने पवित्र आत्मा कंबुतरा रुपाम सोतापे उअती रियोहो एहकी वेअयो. ¹¹ आने एहकी वादलामने आवाज आलो की, "तु मान खुब गोमनारो पोयरो हाय, आने तोहकी आज आय खुशीम हाय". ¹² ताहा आत्माय तियाल तुरुतुज जंगला होवे मोकल्या.

¹³ आने जंगलाम चालीस दिही लुगु सैतानाय तिया परिक्षा लेदी, आने तो जंगली जनावरा आरि रिअयो, आने स्वर्गदुताय आविन तिया सेवा केअयी . ¹⁴ योहानाल ति देवुलाम आलो तिया फासो, येशुय गलीलाम आवीन परमेश्वरा राज्या हाऱ्या गोठ्या आख्या. ¹⁵ आने आख्यो, “ आमी योग्य समय आलो हाय, आने परमेश्वरा राज्य पाहि आवि गियोहो, तुमा मोने देवा होवे फिरवा आने देवा हारी गोठीप विश्वास थोवा”. ¹⁶ येसु गलीला खाडी तोडीप जाता जाता, शिमोन आने तिया पावुहु आन्द्रीया ईयाहान खाडीम जाले टाकता वेअयो, काहाका ते मासे मानारा आथा.

¹⁷ आने येशुय तियाल आख्यो, “ मा फासला चाली आवा, माय तुमनेहेन माहि तेनारो बोनवेहे !”

¹⁸ ते तुरुतुज जाले फेकीन तिया फासला चाला लाग्या. ¹⁹ आने वायज आगला चाली जायन, जब्दी पोयरो याकोब आने तिया पावुहु योहान इयाहान उडीप जाले हुदरावता वेअयो, ²⁰ आने तुरुतुज येशुय तियाहान हादी लेदा ताह ते तियाहां बाहाकाल (जब्दील) आने मजुराहान उड्याम राअ दिइन तिया आरि गिया. ²¹ फासे ते कफर्णहुम गांवाम गिया, आने तोरुतुज येशुय शब्बाथ दिह्या दिही (शनिवारी यहुदी लोकाहां भोक्ती दीही) भोक्ती सबाम जायन तो हाऱ्या गोठ्या हिकवा लाग्यो. ²² तिया हिकवुनुकी होग्गा लोकाहान नोवाय लागी, तो तियाहान शास्त्री लोकाहां होस नाहा, पेन खेरा अधिकाराकी हीकवुतलो, ²³ ताहा तिही तियांहा भोक्ती सबा पुतडो लागलो एक माहु आथो,

²⁴ तियाय बोंबलीन आख्यो, “ओ नासरेथवाला येशु , आमाहान तो काय काम? तु आमा नाश केअरा केअता आलो हो का? तु केअडो हाय, ई मान मालु हाय, पोरमेहेरा पवित्र माअहु तो तुजं “.

²⁵ येशुय तिया पुतडाल धमकावीन आख्यो “ठाको रे, आने इया माअहामेने निंगी जो,”

²⁶ ताहा तो पुतडो तिया माअहाल आवलावीन-आवलावीन तोडी पाडीन तियामेने बोंबलुतो निंगी गियो, ²⁷ तोंअ विइन होग्गा लोकाहान खुब नोवाय लागी, आने ते एक बिहीराल फुचा लाग्या, “इही काय वि रियोहो? इ ता नवीनुज हारी गोठ हिखुता हाय. तो अशुद्ध आत्म्याल हुकहम देतो आने ते उनाताहा ²⁸ येशु बारेमने नवीनुज हारि गाेठ.” इ गोठ माहारुज गालील प्रांताम चारी ओरी बादाहाल मालुम पोडी गियी. ²⁹ फासे येशु तुरुतूज भोक्ती सभामने निंगीन याकोब आने योहान इयाहां आरी शिमोन आने आद्रिया इयाहा कोअ आलो.

³⁰ ताहा शिमोना हावडी खुब बोरावली आथी, शिमोनाय तुरुतुज तियाल आख्यो,

³¹ ताहा येशु ति बारावली बायीही गियो आने तीयु आथाल तिइन उठविन बोहती केअयी आने ताहाज तियो बोरो निंगी गियो, आने ती तियाहा सेवा चाकरी केअरा लागी. ³² वाअतीवेला दिही बुडी गियो, ताहा लोक बादा दुख्याहान आने पुतडे लागलाहान येशुही ली आला,

³³ तिया शहरामने बादा लोग बाअनाही टोलवाया

³⁴ ताह येशुय जाती-जाती दुखे लागला माअहान हारे केअयें आने खुबुज पुतडाहान तांगाडी काड्ये, पेन तियाहान गोंगां नाहा देदा काहाका ते येशुल ओखुतले, ³⁵ फांसे तो चुनख्योज उठीन तिहीने निंगीन डोगाम गियो आने तिही तो प्रार्थना केअरा लाग्यो

³⁶ ताहा शिमोन आने तिया हेंगात्या तियाल होदता होदता गिया

³⁷ जाहां येशु तियाहान सापड्यो, ताहा तियाहाय तियाल आख्यो, “होग्गा लोक तुल होदताह, ³⁸ ताहा येशु तियाहान आखहे, “ चाला, बिहीरा गांवाहाम बी आपु परमेहेर राजुह हारी गोठ आखा खातोर जाहु, काहाका आय ईयाज खातोर निंग्योहो.”

³⁹ तो गोग्गा गालील प्रांताम यहुदी लोकाहां भक्ती पोंगाहाम जायन लोकाहान वचन आखतलो आने लोकाहांमेने पुतडाहान ओडी काडतलो. ⁴⁰ एक कोडलो माअहु तियाही आलो, तो तिया हुंबुर आवीन रांअव्या किइन पागे पोडीन आखां लाग्यो “तो मोरजी हाय ता, तु मान हारो की सेकनारो.” ⁴¹ ताहा येशुल तिया मांअहावे दोया आली आने आथ आगाडी किईन तियाल आथलिन आख्यो, "माअ मोरजी हाय तु हारो वी जो,” ⁴² ताहां तुरुतुज तिया मांहा कोड हारो वी गियो. ⁴³ ताहां येशुय तियाल हारकी होमजावीन तुरुतुज माेकली देदो. ⁴⁴ आने तियाल एहेकी आख्यो, देख केडालुज कावींज नाहा आखहो, पेन जायन सोवताहा याजकाल देखाव आने तो तुल तापासी ली, आने तुं हारो वेअहो एहेकी तियाल होमजाय. कोडला दुखामेने हारा वेअलाहां खातोर मोशे भविष्य वक्तांय ठरवुली चोखोपणा अर्पणा विदी केअजे. ⁴⁵ पेन इ गोठ तिया मांअहाय गोग्गा लोकाहान खुलिरीतीकी आखी देखावी, ती गोठ गोग्गाज मालुंम पोडी गियी तियाखातोर येशु फाच्चें खुली रितीकी सेहराम नाय जाय सेकतला, तिया खातोर येशु डोगामुज रिया तेबी चारी सोमकीने लोक तियाही आवतला.