¹ देवा पोयरो येशु देव तिया जिवना गोठ्या आखनु सुरवात ² जेहकी यशया भविष्य केनारो तिया चोपडीम लीखलो. ³ जंगलाम एका बोंबलुनारा आवाज आवि रियोहो, देवा केता रस्तो तियार केरा आने सोडको सिधी केरा. ⁴ योहान आलो, जो जंगलाम बाप्तीसमो देतलोह, आन पापा क्षमा मिलवा केता तुमा मोन ! देवा गोठी वेला फिरवा, एहकी बाप्तीस्मा संदेश देहलो ! ⁵ यहुदीया हिवालाम आने यरुशलेमाम रेनारा बादा लोक निगिन तियाहाय गिया, आने सोताह पापा कबुली किन यारर्देन खाडीम बाप्तीस्मा लेदो ⁶ योहान उटडां चामंबडा पोतळे पोविन कोंबराम चांबडा पाट्टो बांदलो रेतलो आने टीडे आने रान मद खातलो . ⁷ आने तो माहान एहकी संदेश देहलो का, मा फाचलो तो आवनारो हाय तो माहिने बी ताकतवान हाय माय आतो लायक नाहा का तिया पागुमने बुटा दोरि खोलु ⁸ मायु ता तुमनेहेन पायांकी बाप्तीस्मो देदोहो पेन तो तुमनेहेन पवित्र आत्माकी बाप्तीस्मो दी. ⁹ त्या दिहाम येशु गलील हिवालाम नासरतामने आविन एरदेनाम योहानापने बाप्तिस्मा लेदो. व ¹⁰ आने तो पायामने निगीन उसे आलो, ताहा तुरुतज तियाय वादलो खोलाय रियोहो एहकी वेयो, आने वादलामने पवित्र आत्मा कंबूतरा रुपाम स्वताप उती रियोहो एहकी वेंयो. ¹¹ आने एहकी वादलामने आवाज आलो, तु मान खुब गोमनारो पोयरो हाय, आने तोहकी आज आय खुशीम हाय. ¹² ताहा आत्माय तियाल तुरुतूज जंगला होवे मोकल्या.

¹³ आने जंगलाम चालीस दिही लुगु सैतानाय तिया परिक्षा लेदी, आने तो जंगली जनावरा आरि रियो, आने स्वर्गदुताय आविन तिया सेवा केयी . ¹⁴ योहानाल ति देवुलाम आलो तिया फासो येशुय गलीलाम आवीन परमेश्वरा राज्या हाऱ्या गोठ्या आख्या. ¹⁵ आने आख्यो, “समय पुरो वि गियोहो आन परमेश्वरा राज्य पाहि आवि गियोहो, तुमा मोने देवा होवे फिरवा आने देवा हारी गोठीप विश्वास थोवा”. ¹⁶ गलीला खाडी तोडीप जाता जाता, शिमोन आने तिया पावुहु आन्द्रीया ईयाहान खाडीम जाले टाकता वेयो, काहाका ते मासे मानारा आथा.

¹⁷ आने येशुय तियाल आख्यो, “ मा फासला चाली आवा, माय तुमनेहेन माहि तेनारो बोनवेहे !”

¹⁸ ते तुरुतूज जाले फेकीन तिया फासला चाला लाग्या. ¹⁹ आने वायज आगला चाली जायन, जब्दी पोयरो याकोब आने तिया पावुहू योहान इयाहान उडीप जाले हुदरावता वेयो, ²⁰ आने तुरुतूज इसुय तियाहान हादी लेदा ताह ते तियाहां बाहकाल (जब्दील) आने मजुराहान उड्याम रा दिइन तिया आरि गिया. ²¹ फासे ते कफर्णहुम गांवाम गिया, आने माहारुज शब्बाथ दिह्या दिही (शनिवारी यहुदी लोकाहां भोक्ती दीही) भोक्ती पोंगाम जायन तो हाऱ्या गोठ्या हिकवा लाग्यो. ²² तिया हिकवूनुकी बादा लोकाहान नोवाय लागी, तो तियाहान शास्त्री लोकाहां होस नाय, पेन खेरा मिलला अधिकाराकी हीकवूतलो, ²³ ताहा तिही तियांहा भोक्ती पोंगाम पुथडो लागलो एक माहॅू आथो,

²⁴ तियाय बोंबलीन आख्यो, “ओ नासरेथवाला इसु आमाहान तो काय काम ? तु आमा नाश केरा केअता आलो हो का ? तु केडो हाय, इं मान मालु हाय, पोरमेहेरा पवित्र माअहु तो तुजं “.

²⁵ इसुय तिया पुथडाल धमकावीन आख्यो “ठाको रे, आने इया माअहामेने निंगी जो,”

²⁶ ताहा तो पुथडो तिया माअहाल आवलावीन-आवलावीन तोडी पाडीन तियामेने बोंबलुतो निंगी गियो, ²⁷ तोंअ विइन बादा लोकाहान खुब नोवाय लागी आने ते एक बिहीराल फुचा लाग्या, “इही काय वि रियोहो ²⁸ इं ता नवीनुज हारि गाेठ हाय.” इ गोठ माहारुज गालील प्रांताम चारी ओरी बादाहाल मालु पोडी गियी. ²⁹ फाचे इशु तुरुतूज भोक्ती पोंगामने निंगीन याकोब आने योहान इयाहां आरी शिमोन आने आद्रिया इयाहा कोअ आलो.

³⁰ ताहा शिमोना हावडी खुब बोरावली आथी, शिमोनाय तुरुतूज तियाल आख्यो,

³¹ ताह इशु ति बारावली बायीही गियो आने तीयु आथाल तिइन उठविन बोहती केअयी आने ताहाज तियो बोरो निंगी गियो, आने ती तियाहा सेवा चाकरी केरा लागी. ³² वाअतीवेला तिही बुडी गियो, ताहा लोक बादा दुख्याहान आने पुथडे लागलाहान इशुही ली आला,

³³ तिया शहरामने बादा लोग बाअनाही टोलवाया

³⁴ ताह इशुय जाती-जाती दुखे लागला माअहान हारे केअयें आने खुबुज पुथडाहान तांगाडी काड्ये, पेन तियाहान गोंगां नाहा देदा काहाका ते इशुल ओखुतले, ³⁵ फांसे तो चुनख्योज उठीन तिहीने निंगीन डोगाम गियो आने तिही तो प्रार्थना केरा लाग्यो

³⁶ ताहा शिमोन आने तिया हेंगात्या तियाल होदता होदता गिया

³⁷ जाहां इशु तियाहान सापड्यो, ताहा तियाहाय तियाल आख्यो, “बादा लोक तुल होदताह, ³⁸ ताहा इशु तियाहान आखहे, “ चाला, बिहीरा गांवाहाम बी आपु परमेहेर राजुह हारी गोठ आखा खातोर जाहु, काहाका आय ईयाज खातोर निंग्योहो.”

³⁹ तो बादा गालील प्रांताम यहुदी लोकाहां भक्ती पोंगाहाम जायन लोकाहान वचन आखतलो आने लोकाहांमेने पुथडाहान ओडी काडतलो. ⁴⁰ एक कोडलो माअहु तियाही आलो, तो तिया हुंबूर आवीन रांव्या किइन पागे पोडीन आखा लाग्यो “तो मोरजी हाय ता, तु मान हारो की सेकनारो.” ⁴¹ ताहा इसुल तिया मांहावे दोया आली आने आथ आगाडी किईन तियाल आथलिन आख्यो, माअ मोरजी हाय तु हारो वी जो,” ⁴² ताहां तुरुतूज तिया मांहा कोड हारो वी गियो ⁴³ ताहां इसुय तियाल हारकी होमजावीन तुरुतूज माेकली देदो. ⁴⁴ आने तियाल एहेकी आख्यो, देख केडालुज कावींज मां आखहो, पेन जायन सोवताहाज याजकाल देखाव आने तो तुल तापासी ली, आने तुं हारो वेयोहो एहेकी तियाल होमजाय. कोडला दुखामेने हरा वेलाहां खातोर मोशे भविष्य वक्तांय ठरवुली चोखोपणा अर्पना विधी केअजे. ⁴⁵ पेन इ गोठ तिया मांहाय बादा लोकाहान खुलिरीतीकी आखी देखावी, ती गोठ बादेज मालुंम पोडी गियी तियाखातोर इसु फाच्चें खुली रितीकी सेहराम नाय जाय सेकतला, तिया खातोर येशु डोगामुज रिया तेबी चारी सोमकीने लोक तियाही आवतला.