¹ ए गोठ्या वी गीया तीया फाचो येशु गालील तिबीर्य समुद्रा ती वेल गीयो ² ताहा मोडो लोकाहा टोलो तीया फाचला फाचला चालतलो काहाका आजारी माहान तो हारो केतलो तो तीया लोकाय वेलो आथो. ³ येशु डोंगु पे जाईन तीही तीया हेगात्या आरी बोठो. ⁴ येशु वल्हांडण सण ओ यहुदी लोकाहा सण जागे आललो आथो. ⁵ ताहा येशुय नोजोर उचे कीन वेयो ताहा लोकाहा मोडो टोलो तिया होवे आवेहे ऐहकी वीन येशु फिलीप्पाल आखा लाग्यो. आपु ईया लोकाहा वाटो खा खातोर माडो काहीने वेचातो लावु ⁶ ऐहकी तीया तीया परिक्षा वेरा खातोर आख्यो काहाका तो काय केनारो आथो इ तीयाल मालुम आथो. ⁷ फिलिप्पाय आख्यो, “तीयामेने थोडो थोडो माहाय माडो लेवो तेवी तीनशो चांदी नाना पोईया माडो पुरे नाय. ⁸ तीया आख्या मेने ऐ जा शिमोन पेत्रा पाऊ आंद्रीया तीयाल आखा लाग्यो, ⁹ इही एक हानो पोयरो हाय तीया पे पाच मांडा आने बेन मासे हाय पेन ओता लोकान तो केहकी पुरी ¹⁰ येशुय आख्यो, “लोकान बाहा लागवा तीया जागाप खुबूज चारो आथो तीही ते पाच हजार माही आथे ते बोठे. ¹¹ येशुय ते पाच मांडा माग्या आन तीयापे उपकार मानीन त्या माडांन बोठला माहान वाठी देदा तेहकी त्या माहान बी लागे ओतो वाटी देदो. ¹² जाह ते लाेक खाईन ताराय गीया ताहा येशुय तीय आऱ्यान आख्यो, रेहलो आख्यो मांडो टोलवी ल्या काहाका तो वाया नाय जा जोजे. ¹³ जाहा लोकाहा मांडो खावाय गीयो तीया फाचला रेहलो बारा सिबले पोराय ओतो मांडो हेंगलाय गीया. ¹⁴ ताहा येशुय ओ चमत्कार केयाे तो लोकाय वेयो ताहा लोक आखा लाग्या जगाम जो संदेष्टे आवनारो हाय तो खेरोज आज हाय. ¹⁵ ते येशुल जबरदस्ती राजो केरा आखतेहे इ होमजीन येशु एखलोज डोगुपे निगी गियो ¹⁶ वातीवेला वेयो ताहा येशु आऱ्या समुद्र वेल गीया. ¹⁷ आने ऐका उडीम बोहीन दोर्या ती वेला कफर्णहुम गावुम ते जा लाग्या तोताम आंधारो पोडी गीयो आने ताऊलुग येशु तीया जागे आलोज नाहा. ¹⁸ आने मोडो वारो सुट्यो आने दोऱ्याम मोड्या मोड्या लाटा चाला लाग्या. ¹⁹ ताहा ते होऱ्या खुबुज वोचमे निगी आला ताहा येशुल तीयाय पाया ऊच्चे चालता वेयो वीन ते बी गीया. ²⁰ ताहा येशुय तीयान आख्यो, “माय हाय, बीया नाहा.” ²¹ येशु हाय ऐहकी तीयान होमयायो ताहा तीयाय येशुल उडीम बोहावा ते तीयार वेया पेन तोताम तियान जावुला आथो तिया तोडीप उडी आवी यी. ²² बीजा दिही जो लोका मोडो टोलो आथो तो समुद्रा बीहीजा जागाप उबो आथो तीयाय वेयो का हानी उडीम तीया आऱ्या बोठला आथा तीया शिवाय तीही बिहजो उडी नाय आथी आन येशु तीया आऱ्या आरी तीया उडीम चोडलो नाय आथो ता तीया आऱ्या एखलाज नीगी गेहला आथा. ²³ पेन येशुय मांडाप उपकार मानलो आथो मांडो खादलो आथो तीया जागाप तिबीर्या वेने बीहजी हानी उडी आललो आथो. ²⁴ तीही येशु आने तीया आऱ्या बी नाय आथा इ लोकाय वेयो ताहा लोकाय बी उड्या लेद्या आने येशुल होदता होदता ते कफर्णहुम गावुम आला. ²⁵ आने तो तीयान समुद्रा बीहीजी वेल मिल्यो ताह ते आखा लाग्या, “रब्बी ! तुमा ऐहे कीधी आले ?.” ²⁶ येशुय तीया आख्यो, “माय तुमान खेरो खेरो आखुहू तुमाय चमत्कार वेयो तीयल नाहा पेन मांडो खाईन ताराय गीया तियाल तुमा मन होदी रीया हाय. ²⁷ पारवाय जानारा मांडा वाटो मेहनत नाहा केरा सार्वकालीक जीवनाम टिकनारो मांडा वाटो मेहनत केरा माहा पोयरो तो तुमान दी काहाका तीयाप देवपिताय तीयाप शिक्को मारलो हाय. ²⁸ ताहा ते तीयाल आखा लाग्या, ‘ आमा देवा कामे केरा जोजे तीया आमा काय केजी ?. ²⁹ येशुय तीयान आखे “देवा काम ईज हाय का , जीयाल पेरमेश्वराय मोकल्यो तीयाप तुमा भोरुसो थोवा. ³⁰ ते आखा लाग्यो, “एहडो केललो चमत्कार तु आमान देखावतोहो तो वीन आमा तोपे भोरुसो थोवुहू ?” तु केल्लो केल्लो चमत्कार केतोहो. ³¹ आमा आगला डायाय जोंगलाम मान्ना खादो मोशाय तियान होरगामेने मांडो खा देदो, ऐहकी शास्त्राम लिखलो हाय. ³² ताहा येशुय तीयान आख्यो, “माय तुमान खेरो खेरो आखुहू मोशेय तुमान होरगाेमेने मांडा देदो एहकी नहा ता मा बाहको होरगामेने खेरो मंडो टुमान देहे दी. ³³ काहका जी होरगामेने उतेहे आने जगाल जीवन देहे तीज देवा परमेश्वरा मांडो हाय.” ³⁴ ताहा ते आखा लाग्या मा देवा मा मालक ओजे मांडो आमान सदा देजे. ³⁵ ताह येशुय तीयान आख्यो, “मायज तीवना मांडो हाय. मा जागे जो आवेहे तीयाल कीधिच पुख नाय लागे आने जो मावे भोरुसो थोवेहे तीयाल कीधीच पाहापी लागे नाय.” ³⁶ तेबी तुमाह मान वेयो तेबी तुमा मापे भोरुसो ठोवते नाहा, ऐहकी आय तुमान आखुहू. ³⁷ मा बाहाको जो मान देहे तो आखो मा जागे आने मापे जो आवे तीयाल माय कीधीज वाया नाय जा दीव. ³⁸ काहाका माय होरगामेने आल्लो हाय, सोता मोरजी पुरी केरा नाहा आलो पेन जीयाय मान मोकल्याे तीया मोरजी पुरी केरा आय होरगामेने आल्लो हाय. ³⁹ आने जीयाय माने मोकल्या तीया मोरजी ईज हाय का तीयाय मान जो आखो देदो तीयामेने आय कईज नाय गोमावा जोजे आने तोज शेवट्या दीही माय तीयान उठवे हे, ⁴⁰ मा बाहका इज इच्छा हाय का, जो केडोबी माने विन तीयावे भोरुसो थोवी तीयाल सार्वकालीक जीवन मिली जाय आने तीयाल आय शेवट्या दिहाम उठवे हे. ⁴¹ माय होरगामेने उतालो मांडो हाय ऐही तीयाय आख्यो. तीयाम यहुदी लोका तीया बोपोल कुरकूर केरा लाग्या. ⁴² ताहा ते आखा लाग्या ओ येशु योसेफा पोयरो नाय का ? ईया बाहकाय आन याहकील आमा ओखतेहे आने ओ ऐहकी आखे का माय होरगामेने उती आलो. ⁴³ येशु ये तीयन आख्यो तुमू तुमातुमाज कुरकूर नाहा केरा. ⁴⁴ जीयाय मान मोकल्यो हो त्या बाहकाय आखल्या शिवाय केडोज मा जागे आवे नाहा शकतो तीयाल माय शेवतल्या दिली आय तीयान उठवे हे. ⁴⁵ संदेष्टा ग्रंथाम लीखलो हाय का ते आखज देवाल हिकऊलो हाय ऐहकी बी जो पेरमेश्वरा वेने ऊनाईन हिकलो हाय ता मा जागे आवेते हे. ⁴⁶ जो देवा होवेने हाय तीयाय परमेश्वराल वेलो हाय तीया शिवाय केडायईज परमेश्वराल नाई देखलो हाय. ⁴⁷ माय तुमान खेरो खेरो आखुहु जो भोरुसो थोवेहे तीयाल सार्वकाली जीवन मिललो हाय. ⁴⁸ माईज जीवना माडो हाय. ⁴⁹ तुमा आगला डायाय लोका हाय मान्ना खादो आने ते मोई गीया ⁵⁰ आने होरगामेने उतनाारो मांडा ऐहडो हाय का जो केडाय खादो तो आत्माम मोनारो नाय. ⁵¹ होरगामेने उतनारा जोवना मांडो मायुज हाय, या माडामेने जो केडो खाय तो सार्वकालीक जीवन जीवी मांडो माय देहे तो मा डील तो जोगा जीवना खातोर हाय. ⁵² ताहा यहुदी लेकाय आप आपुम गोठ्या केरा लाग्या, ऐलो तीया डील आपुन केहकी खा दी सेकेहे ? ⁵³ तीयाल येशु तीयन आख्यो मा अमान खेरो खेरो आखुहु तुमा लोकाय मा डील आने रोकतो नाय पीदो ता तुमान जीवन नाहा हाय. ⁵⁴ जीयाय मा डील खादो आने मा रोकतो पिदो तीयाल सार्वकालीक जीवन मिल्यो हो आने माईज तीयाल शेवटल्या दिही फासे जीवतो केहे. ⁵⁵ काहाका मा डिल खेरो मांडो हाय आने मा रोकतो खेरो पिवनु पेय हाय. ⁵⁶ जो मा डील खाहे आने मा रकतो पीहे तो माम रेहे आने माय तीयाम रीहु. ⁵⁷ जेहकी मा जीवता बाहकाय मान मोकल्यो आने माय जेहकी मा बाहका आखलया होस जीवुहू तेहकी जो मा डील खाय आने रोकतो पी तो बी मा आखल्या की जीवी. ⁵⁸ होरगामेने उतलो मांडो ओज हाय तुमा आगलया डायाय लोकाय मांडो खोदो तेबी ते मोई गीया ई तेहकी नाहा ओ मांडो जो खाहे तो जुग्यो जीवन जीवी. ⁵⁹ कफर्णहुमाम शिक्षण देते आथो ताहा तियाय सभास्थानाम ई गोठ्या आख्यो. ⁶⁰ येशु आऱ्याय खुप लोकाय ई उनाईन आख्यो इ वचन कठीण हाय ई केडो उनाय ली सकहे. ⁶¹ आपु आऱ्या ई गोठीप कुरकूर की रीया हा ई येशु होमजायो ताहा येशु तीयान आख्यो ई या गोठया तुमान कठीन वाटत्याहा का ? ⁶² मनुष्या पोयरो पेहेला आथो तिहीज जर उचे चोडता व्या तर ? ⁶³ आत्मा जीवन देनारो हाय डीलुकी काईज फायदो वेनारा नाहा माय तुमान जो आख्यो ती वचने आत्मा आने जीवन हाय. ⁶⁴ तेबी विश्वास थोवता नाहा ऐहडो तुमाम लोक हाय काहाका केडो भोरुसो ठोवतो नाहा आने मान केडो ती दी ई येशु आगलावेज होमजाय गेहालो आथो, ⁶⁵ येशुय आख्यो तीयाल मायु तुमान आख्यो का केडोज माहू तीयाल मा बाहकाय दो देदो तीया शिवय तो मा जागे आवी नाय शके. ⁶⁶ तीया फासो तीया आऱ्या खुबूज जा फीरी गीया आने फासे किदीही तीया चाल्या नाय. ⁶⁷ ताहा येशु खुबूज जाहान आख्यो तुमा बी जावुला इच्छा हाय का ? ⁶⁸ ताहा शिमोन पेत्राय आख्यो, प्रभु आमा केडाही जाहु सार्वकालीक जीवआ वचने ता तुमा जागे हाय. ⁶⁹ आने आमाय भोरुसो थोवलो हाय आने आमान माहिती हाय का देवा मोलावलो पवित्र माहु तुमा हाय. ⁷⁰ येशुय तीयान आख्यो मायु तुमा बारा जावन निवडी लेदलो ताहा का ? तेबी तुमामेने एक ता सैतान हाय. ⁷¹ शिमोन इस्कार्योत पोयरो यहुदा बोदल येशु आखतोलो काहाका बारा चेलामेने एक तोज इ येशुल तिई देनारो आथो .