¹ फासो येशु गालील हिवालाम फिरा लाग्यो, काहाका यहुदी अधिकारी त्योल मारा केहता होदता फिरता आथा त्याहाले यहुदीया हिवालाम फिरा लाग्यो नाहा. ² यहुदी लोकाहा मंडपा सण पाहे आलो आथो. ³ त्या केता त्या पाऊ त्याले आख्यो, तु इहीनी नीग आने यहुदीया हिवालाम जो म्हणजे तु केहतो ती कामे तोह शिष्यानबी वेरा जोजे. ⁴ जो केअे प्रसिद्ध वेरा होदे तो दोबीन काहीजे केहतो नहा तु ईया गोठ्या केहेता वेरी ते सोताले देतियामे देखवज ⁵ काहाका त्या पाहूबी त्यायापे विश्वास थोवतुला नाहा ⁶ त्यावेने येशु त्याहाले आख्यो, सणाले जाऊलो मा वेल आजी आली नाहा तुमा वेल ते सदा तियार आहे. ⁷ जेमाये तुमा द्वेष केरुनु ई नाहा बी शकतो ; पेन ते माआ द्वेष केअने काहाका आय त्याहा विषयी साक्ष देतोहो, का त्याहा कामे हारे नाहा. ⁸ तुमा सणाले उचे जा आथा सणाले आमी जा नाहा काहाका माआ वेळ आजी पुरी वेअयी नाहा. ⁹ ऐहकी त्याहाले आखीन तो गालील हीवालाम रियो . ¹⁰ पेन त्याआ पाहु सणाले उचे गीया ताहा तो बी बाठा देखता नीग्यो नाहा दोबीन उचे गीया. ¹¹ ताहा यहुदी त्याले होदतला आने आखला तो हाय तेबी केहता?. ¹² आने लोकांमे बी त्याआ विषयी खुबूजे कुरकूर वेअई केडाे आखतलो ते हारो हाये बीहरे केडो आखतले का नाहा तो लाेकांले ठोगताेलो. ¹³ तेबी यहुद्याहा बीखीमुळे केडोज त्याआ विषयी उगाडावीने गोगतलो नेय. ¹⁴ हाती सण आऱ्धों वी गीयो, येशु उचे परमेश्वरा मंदिरामे जाईन शिक्षण दाआ लाग्यो. ¹⁵ हाती यहुदी नोवाय किने आखा लाग्या “हिक्या वाची इयाल विद्या आली केहकी ?” ¹⁶ त्यापेन येशुये तीहाले आख्यो, “माआ शिक्षण माआ नाहा तर जयाये माले मोकल्या त्या हाये. ” ¹⁷ जो केडो लााआ इच्छाप्रमाणे केरुलो इच्छा केरी त्याले ई शिक्षण देवापेनी हाय किंवा आय माआ मोनाकी गोगले ई हामजी. ¹⁸ जी आपु मोनाकी गोगेहे तो सोताहा मोठो केहे पेन आपुले ज्याये मोकल्यो त्याआ गौरव जो वेहेअे तो माहावु खेरो हाय आने त्या मे खराबी नाहा. ¹⁹ माेशेये तुम्हाले नियमशास्त्र देदो का नाहा ? ते तुमा कोडोबी नियमशास्त्र पालतो नाहा. तु माल काहा माय टाका होसे?. ²⁰ लोकाये त्याल उत्तर दिन आख्यो, तुले पुथडो लागलो हाय तुले माय टाका केडो वेरी ?. ²¹ येशु त्याहाले उत्तर दिईन आख्यो, “ मायु एक काम केअेयो आने त्याआकी तुमा बाठे नोवाय केअतेहे. ²² मोशेये तुमाले सुंता लागवी देदी ती मोसेपनु नेय पेन वाडवडीलापेने आने तुमा शाब्बाथ दिही मनुष्याहा सुंता केहता. ²³ मोशे नियमाशास्त्रा मुडा नेय जोजे तीया केहता माहा सुंता जर शाब्बाथ दिही वेहे तर आय शब्बाथ दिही एका माहाले अगदी हारो केअयो त्या खातोर तुमा मावे रोग चोडवुताहा का ? ²⁴ मुये विअीने न्याय क्या नाहा तर खेरो नयाय केरा. ²⁵ यापेने तो यरुशलेम वालाने कोताक जाआ आखा लाग्या “जीयाले मारा होदतला तो ओज हाय ने ? ²⁶ व्या तो खुला कीअेन गोगी रीयोहाे आने तेत्याले कायीज नाहा गोगता आजे ख्रिस्त हाये ई खेरोखेर अधिकाऱ्याले होमजी गीहीले हाय काय ? ²⁷ तेबी ओ किहीनी हाय ई आम्हाले मालुम हाय पेन ख्रिस्त आवी ताहा तो कहीनी हाये ई केडालुज होमजुनारो नाहा. ²⁸ या वे नी येशु परमेश्वरा मंदिरामेनी शिक्षण देतलो ताहा माेठा की आख्यो “तुमा माले ओहकुताहा आने आय किहीनी हाय ई तुमा जाआताहा तेबी आय सोताहा आलेा नाहा जाये माल मोकल्या तो खेरो हाये त्याले तुमा ओहकुता नाहा. ²⁹ आय ते त्याले ओहकुहु काहाका आय त्याजपेने हाय आने त्याय माल मोकलुलो हाय. ³⁰ यावेने ते त्याल तेरा होदतला पेन केडोज त्याव हात टाक्यो नहा काहाका त्याआ वेल आजी आली नाहा. ³¹ ताहा लोकाहा टोला मेनी खुबूज लोकाही त्यावे विश्वास थोव्यो आने ते आख्या लाग्ये ख्रिस्त आवी ताहा याये केअेल्या चिन्हा देख तो माेडो काम केनारा हाय ? ³² लोकांहा टोलो त्या विषयी अेहेकी कुरकूर केअतला ई परुशांहा कानापे गियो आने माेडो याजक लोक आने परोशांये त्याल तेरा केअता कामदार मोकल्या. ³³ यापेने येशु त्याहाले आख्यो, “आय आजी थोडक वेळ तुमाअरी हाय हाती ज्याअये माल मोकल्या त्याआ होवे आय निगी जानारो हाय.” ³⁴ माल होद काडाहा पेन आय तुम्हाले सापडुनारो नाहा आने जीही आय रेहे तिही तुमा आवी शेकनाराे नाहा. ³⁵ त्याकेअता यहुदी आपसामे गोग्या “ओ आपुले सापुडुनारो नाहा अेहेडो जाय तेबी कीही ? ओ ग्रीकमे आपु फेलाला यहुदी लोकाले जाईन त्याहाले हिकवी का ? ³⁶ ओ जो आखे का तुमा माआ होद केअहा आने आय तुम्हाले सापडुनारो नाहा, आय रिही तीही तुमा आवी शकनारा नाहा ई आखुलो काय हाय ? ³⁷ हाती सेलया सणा दिहामे म्हणजे मोडा दिहामे येशु ये उभो रिआीने मोडा कीा गोग्यो, केडाले पिही लागी वेरी त्याये माआ होवे आने पिये.” ³⁸ जो माआपे विश्वास थोवेहे त्याहा अंतकरणामेने शास्त्रालेख मे आखल्याप्रमाणे जिवता पाआया खाड्या वोयी.” ³⁹ जीहाये त्यायापे विश्वास थोवला त्याहाने जो आत्मो मिलनारा आथो त्याआ विषयी त्याये ई आख्यो तावलोगे पवित्र आत्मो देदो नाहा काहाका आजी तावलुग येशु गौरव वेयो नाहा. ⁴⁰ लोकाहा टाेलामेने काेताक जावाये ऐ शब्द उनायने आखता लाग्या, “खेरोज ओ ताेज संदेष्टो हाय, ⁴¹ कोताकाय आख्यो ओ ख्रिस्त हाय, बिहीरा कोताकाय आख्यो, “ख्रिस्त गालील हीवालाम आवनारो हाय का ?” ⁴² दावीदा वंशामेने आने ज्या गावामेन दावीद आथो त्याआ बेथलेहेमामेने ख्रिस्त आवी अेहेकी शास्त्रलेख आखतो नाहा का ? ⁴³ त्यापेनी त्याहामे लोकाहाम फुट पोडी, ⁴⁴ त्यायाहामेनी कोताक जाआ त्याले तेरा वेतला तेबी केडो त्यावे आथ टाक्यो नाहा. ⁴⁵ हाती कामदार मोडो याजकाही आने परशायाही आला ताहा ते त्याहाले आख्यो, “तुमा त्याहाले काहा नाहाली आला, ⁴⁶ कामदाराये उत्तर देदो, “केडोज माहावु तीयाहोच काधीच गोग्यो नाहा,” ⁴⁷ ताहा परशांयाही त्याहाले उत्तर देदो, “तुमा बी ठोगाया का ?” ⁴⁸ अधिकाऱ्या मेनी आने परशायामेनी कडो त्याआवे विश्वास थोवलो हाय का ? ⁴⁹ पेन ओ जो नियमशास्त्रा जाआता नाहा ते तियाहापे शाराप हाय. ⁵⁰ खुब पेहोला त्याही आलोला आने त्याहामेने एक आथो निकेदेम त्याहाले आख्यो. ⁵¹ ऐगाहा माहा उनायने आने ता काय केहे या मालुम किईन लेदल्यावाची आपु नियमशास्त्र तीयाआ न्याय केहेक ? ⁵² त्याये त्याहाले उत्तर देन आख्यो, “तुमाबी गालील हिवाराम हाय का ? होदा आने त्या काहाका गालील हिवाराम संदेष्टो निगगो नाहा . ⁵³ हाती ते बाठाजाआ आपु-आपू कोअ गिया.