¹ परुश्यामने तिकदेम नावा एक माहु आथो, तो यहुदीया एक अधिकारी आथो, ² तो राती तियाही आलो आख्यो, “रब्बी, देवाईन आलाे ने शिक्षक हाय इ आमा जातेह, काहाकी आपु जी चिन्हे किरीयोहो ते केडोच माहु तियाआरी देव हाय या शिवाय तो की केह, ³ येशुय तियाल आख्यो "आय तुम्हाल खेरो खेरो आखु, फासे जोनमाेलीन केडाल बी देवाआ राज वेता नाय आवे, ⁴ निकदेमाइ तियाल आख्यो, “डायो वेलो माहु केहकी जनमो ली, तियाल आपु याहकी डेडीमने बीहरीदाव जावनो व जाेनमोलुवनु खरो वेरी काय ? ⁵ येशुय तियाल उत्तर देदो, आय तुम्हाल खेरो खरो आखु पांयाकी व आत्म्याकी जाेनमो लेवा सिवाय केडोच देवाआ राजाम जाय शकनारा नाहा, ⁶ शरीरामने जनमो लेदलो देह हाय आने आत्म्याकी जनमो लेदलो आत्मा हाय, ⁷ तुमा फासे जाेनमो लाजो जे ऐहकी आय तुम्हाल आखु या नोवाय माना नाहा, ⁸ वारगो केंबी तो चालेह तिया आवाज तुम्हा उनातेह, पेन तो कीहने आवे कीही जय ई तुमनेल होमजातो नाहा, जो केडो आत्म्याकी जाेनमो देदलो हाय तिया ऐहकीच हाय. ⁹ निकदेमाय तियाल उत्तर दिन आख्यो, ‘या गोठ्या केहकी वी शेकत्याहा ? ¹⁰ येशुय तियाल उत्तर दिने आख्यो, “तु इस्त्राएलाआ गुरु वीन बी या गोठ्या होमज्यात्या नहा काय ? ¹¹ आय तुम्हाल खेरो खेरो आखुहू जे आमाहाल मालुम हाय ते आम्हा आखताह आने आमा जो वेलो हाय तिया साक्ष देताहा, पेन तुमा आमाह साक्ष मानता नाहा. ¹² आये तोरती गोठ्या आखु, पेन तुम्हाल विश्वास थोवता नाहा, ताहा आय होरगा गोठ्या जर तुम्हाल आखु तर तुमा केहकी विश्वास थोवाहा. ¹³ होरगामेने उतलो व होरगाम रेनारो जो मनुष्या पोयरो तियाशिवाय केडो होरगाम चोडीन गीयो नाहा. ¹⁴ जेहकी मोशेय जोगलाम पितलाआ हापडो उंसे केलो आथो तेहकी मनुष्या पोयरालबी उंसे केरा जोजे, ¹⁵ याकेता की जो केडो विश्वास थोवेहे तियाल तियाकेता कायमने जीवन मिला जोजे, ¹⁶ काहाकी देवाय जगापे आते मोयो केयी की, तियाय आपु एकुलतो एक पोयरो देदो याकेता की जो केडो तियापे विश्वास केरी तियाआ नाश नाय वे तर तियाल कायमने जीवन मिले. ¹⁷ काहकी देवाय पोयराल जाेगाम मोकल्यो ते जगा न्याय केराकेता नाहा पेन तिया द्वारे जगा तारण वेरा जोजे तिया तियाल मोकल्यो, ¹⁸ जो तियापे विश्वास थोवे तिया न्याय वेनारो नाहा, पेन जो विश्वास केतो नाहा तिया न्याय वेलोंच हाय तियाय देवाआ एकुलताे एक पोयराआ नावाप विश्वास केयो नाहा, ¹⁹ आने त्याय ओजे हाय की जगाम उजवाडो आलो हाय पेन मनुष्याय उजवाडाही ने अंधराहा आवड केई काहाकी तिईया कर्मे हारे नाय आथे, ²⁰ काहाकी जो केडो खराब कामे केहे तो उजवाडा नाकार केहे आने आपु कामे उगड्ये पोडा नेय जोजे याकेता उजवाडाम आवते नाहा. ²¹ पेन जो खेरो माने तो उजवाडाम आवेहे या केता की आपु कामे देवाआ हूंबुर थेवले हाय ई उघडे वेरा जोजे. ²² फासे येशू ओन तिया चेला यहुदिय हिवालाम आला आने तिही तियाआरी रीन तो बाप्तिस्मा केतुलो, ²³ आने योहान बी शालिमापाही एनोन इही बाप्तिस्मो केतुलो , काहाकी तिही पांय खुब आथो आने माहें तिही आवीन बाप्तिस्मो लेतुले. ²⁴ तावलागु योहान जेलाम थोवायो नाहा, ²⁵ ताह योहाना चेला एक यहुद्या आरी द्रीशुध्दीकरण बाराम वादविवाद वेयो, ²⁶ ते योहानाय आवीन तियाल आख्यो, “रब्बी, यार्देन खाडी तिवेले जो आपुआरी आथो आने तुयुय ज्याआ विषयी साक्ष देदी तो बाप्तिस्मो की रीयो आने तियाहावे बाटे जाय रीये, ²⁷ योहानाय उत्तर देदो, माआहाल होरगामने देता हाच कायच मिले नेय. ²⁸ आय ख्रिस्त नाहा तर आय तिया आगला मोकलुलो हाय, याकेता तुमा मा साक्षी हाय. ²⁹ जियाल वोडली हाय तो वोडलो आने जो वोडला जोडीदार उभोरीन तिया गगुन उनाय तियाल वोडला आवाजा की तो खुब खुश वेहे, तेहकी ओ मा आनंद पुरो वि गीलो हाय, ³⁰ तिया वृध्दी वे व माआ ऱ्हास वे इ वेनारोच हाय. ³¹ जो उच्चेने आवे तो बाठाआ उच्चे हाय, जो तोरतीपेने हाय आने तोरतीपेन गोगेह, जो होरगामने आवे तो होरगा वोडलो हाय, ³² जेा तियाय वेलो हाय व उनालो हाय तियाविषयी तो साक्ष देहे आने तिया साक्ष केडो मानतो नाहा. ³³ तियाय तिया साक्ष मान्य केलो हाय तियाय देव खेरो हाय यापे आपु शिक्को ठोकलो हाय. ³⁴ 34. काहाकी तियाल देवाय मोकल्यो तो देवाआ वचन गोगे काहाकी तो आत्मा मोजीन माफीन देतो नाहा. ³⁵ बाहको पोयरापे मोया केहे आने तियाय बाठोकाय तिया आथाम देदलो हाय, ³⁶ जो पोयरापे विश्वास थोवे तियाल सार्वकालिक जीवन मिललो हाय, पेन जो पोयराअ उनातो नाहा तिया नोजरीम जीवन मिलनारो नाहा पेन देवा रोग तियापे री.