¹ फाचे तिसरा दिही गालील शहरा काना नगराम एक वोराड आथो, आने ईसु याहकी तिही आथी. ² ईसु आने तिया चेलाहान वोराडाम हादला आथा. ³ फासे द्राक्षारोसो पारवायो ताहा ईसु याहकी तियाल आखालागी, “तियापाही द्राक्षारोसो नाहा.” ⁴ ईसुय तियुल आख्यो, “ बाई, ईयाकी तो आने माआ काय संबंध हाय ? मा वेल आजी आली नाहा.” ⁵ तिया याहकी चाकरान आखा लागी “ओ तुमाहाल जो ओ आखी तो केजा.” ⁶ तिही पांया सहा दोगडा गोले, यहुद्या शुध्दी करन कईलो रितीप्रमाणे थोवलो आथो, तियाम बेन-बेन, तिन-तिन मण पांय होमाय ऐहकी तेऐ आथे ⁷ ईसुय तियाहान आख्यो, “गोलाहान पाया की पोय द्या.” आने तियाही ते मुयाही आवे ओते पोये. ⁸ फासे तियाय नौकरान आख्यो, “आमी आमी तियामेने काडीन मांडोओ बाेनावनाराही ली जा, ताहा तियाही तोओ लि गिया. ⁹ द्राक्षारोसाे बनविलो पाय, मांडो बोनावनाराय जाहा साखी वेयो आने तो किहीने हाय ई तियाल मालुम नाय आथो, पेन जिया नौकराय पांय पोला तियाहान मालुम आथो, ताहा मांडो बोनावनाराय वोरराजाल हाद्यो. ¹⁰ तियाल आख्यो, ‘हर ऐक माहु पेला हारो द्राक्षारोसो वाटेहे आने माठो फासे वाटते पेन तु ता हारो द्राक्षारोसो आमी लुग थोवलो हाय.” ¹¹ ईसुअ गालील शहरामने काना नगराम तियाहान अद्भुत चिन्हां सुरुवात किईन तिया गौरव प्रगट केयो, आने तिया चेलाही तियाप विश्वास थोव्यो. ¹² तिया फासला ओते तिया याहकी तिया पावु आने तिया चेला निचे कफर्णहुम गिये, पेन तो तिहीज खुब दिही रियो नाहा. ¹³ फासे यहुदीयांहा वल्हांडण सण पाही आलो आने ईसु यरुशलेम शहराम उच्चे गियो, ¹⁴ आने तियाय परमेश्वरा मंदिरामेने (देवलामेने) डोगरे, मेढें, आने कबुतर वेचनारा आने सराफ ऐअ बोठला देख्या. ¹⁵ ताह तियाय दौढा एक चापको बनविन मेढें आने डोगरे इया आखान परमेश्वरा मंदिरामेने काडी टाक्ये, सराफा पैसा पेटी फेकी देदा, आने चौरगाना उबलावी देदे. ¹⁶ आने तियाय कबुतर वेचनारान आख्यो, “ईयान इहीने काडी टाका, मा होरगा वाहका कौओ बाजारापेट माआ बनावा.” ¹⁷ ताहा तोओ मंदिरामेने आवाजा वाय माल खाई जाय रियोह, ऐहकी शास्त्राम लेखलो हाय ऐहकी तिया चेलाहान ईतवी काड्यो. ¹⁸ तियापेने यहुदीया तियाहान आख्यो, “तु आमाहा ई केहतो तर आमहाल तुमाहा अधिकार काय चिन्हे देखावता ?” ¹⁹ ईसु तियाहान उत्तर दिईन आख्यो, “तुमाहा ई परमेश्वरा मंदिराल तोडी टाका आने आय तीन दिहाम बनवि टाकेहे.” ²⁰ तियापेने यहुदी अधिकारी ई आख्यो, “परमेश्वरा मंदिर बांधा शेहचालीस वर्षे लाग्येहे, आने तु इ तिन दिहाम बनवि टाकोहो काय ?” ²¹ तोओ तिया देहाठपी (शरिरारुपी) मंदिरा बारामे गोगतो आथो. ²² फासे तोओ ऐहकी आखतलो की तोओ मोय गेहलेा मेने उठीन तिया चेलाहान ईत आलो. आने तियाय शास्त्रलेखाम वेयो, ईसु आखल्या बचना गोठीप विश्वास थोव्यो.” ²³ आमीही वल्हांडण सणा वेला तो ओ यरुशलेमा शहराम आथो. ²⁴ तियाय केअले चिन्हे विईन खुब माही तिया नावाप विश्वास थोव्यो. ऐहकी आथो, तेबी ईसुय तियाहान वोखीन तिया स्वता तियाप विश्वास नाय आथो. ²⁵ शिवाय माहा बद्दल केडोभी साक्षी दाआ जोजे ईया तियाल गरज नैय आथी, काहाल माहु काय काय ईतोओ वाेखी लेदलो आथो.