¹ आय द्राक्षावेलो हाय आने मा बाहाको खेती केअनारो हाय ² तो माअमेने फाेलवे नाय देनाऱ्या बाद्या डाहग्या रोंडी टाकेहे, जियो डाहगीहीन फोलवे आवतेहे तियाहोन बाद फोलवे लागां जोजे तियाल ते डाहग्या वाडीन साफ केअहे. ³ जो वचन मायुय तुमहान आख्योहो तियावे तुमाहांय विश्वास थोव्यो तियाल तुमा आमी पापामेने चोखा बी गियाहा. ⁴ तुमा मा आरी जोडायन रेजा, आने आय तुमाहाम रेहे. जेहेंकी डाहगी वेलाम रियावोगर फल देती नाहा, तेहेंकी माआम रिया वोगर तुमाहांन फल देता आवतो नाहा. ⁵ आय द्राक्षावेलो हाय आने तुमा डाहग्या हय जो माअम रेहे आने तियाम आय रिहूं, तो खुब फोलवे देहे काहाका मा हिने जुदो रिईन तुमाकी कायज केअता आवतो नाहा. ⁶ जो माआम रेतो नाहा, तियाल डाहगी होज रोंडीन बारे फेकी देवाम आवी आने ते डाहग्या हुकाय जातल्या ताहा ते टाेलवीन आगी की सिलगावी देतेहे. ⁷ तियाल तुमा मां रिहा आन तुमा मा वचना प्रमाणे चालहा, ताहा जो काय तुमहांन जोजी तो तुमा मावे मागहा तो आय तुमाहान देहे. ⁸ तुमा वाद फोलवे दयाहा ताहा मा बाहाका नांव उचो वेरी आने ताहा तुमा मा खेरा चेला वी जाहा. ⁹ जेंहकी बाहाकाय मावे मोया केअयीही तेहेंकी मायुय बी तुमाहावे मोया केअयीही तियाल तुमा मा मोयाम रेजा. ¹⁰ जेंहकी आय मा बाहाका आज्ञा मानीन तिया मोयाम रिहू तेंहेंकी तुमा बी मा आज्ञा मानहा ताहा मा मोयाम रिहा. ¹¹ मा आनंदु तुमाहाम रां जोजे आने तुमा आनंद पुरेपूर वेरा जोजे इया खातोर ए गोठ्या मायुय तुमाहान आख्याहा. ¹² जेहेंकी मायुंय तुमाहवे मोया केअयी तेहेंकी तुमा बी एक बिहिरावे मोयाकेअजा ईज मा आज्ञा हाय. ¹³ तिया आऱ्या खातोर जीव देवनु से केडाबी मोया मोडी नाहा ¹⁴ जर तुमा मा आज्ञा पालताहा ता तुमा मा आऱ्या हाय. ¹⁵ आमी आय तुमाहान आवत्या एहेंकी आखतो नाहा काहाका तिया तोनारो जो केरा तियाल लागवेही तिया आर्थ आवत्याल मालुम नाह रेतो पेन आय तुमाहान मा आऱ्या हाय ऐहेकी आखुहु जे गोठ्या आय मा बाहाकाहीने उनायो ते गोठ्या तुमाहान आख्याहा. ¹⁶ तुमाहाय माने नाह निवडी लेदो, पेन मायु तुमाहान निवडी लेदले हाय, आने तुमा जायन फोलवे दां जोजे तिया खातोर नेमहला हेय. तो इया खातोर का तुमा फाेलवे टिके आने तुमा मा आधिकाराकी बाहाकाही जो मागाहा, बाहाको तुमाहान तों दी. ¹⁷ एक बीहीरवे मोया केरां तियाल आय तुमाहन इ आशा किहुं. ¹⁸ विश्वास नाय केआनारे तुमा विरुध्द केअतेहे इ तुमाहान मालुमु हाय इतवी लेजी का तियाहाय पेअलो मा बी विरुद्ध केअयीही. ¹⁹ तुमा दुन्या रेता ता दुन्या अविश्वासी लो तुमाहवे मोया केअता पेन तुमा दुन्या नाहा मायुय तुमाहन पाी लोकाहामेने निवडी लेदा तियाल ते लोक तुमा विरुध्द केअताह. ²⁰ आवत्यो तोनारा से मोडो नाहा इ वचन मायुंय तुमाहन आख्लों तिया विचार केरा ते दुन्या लोक मान सोतवतला ता ते तुमाहान बी सोतावी ; ते लोक मा वचन पाली ता तुमा वचन बी पाली. ²¹ पेन तुमा इ बांदो ते मा नावाकी केरी, काहाका जियांय मान इया दुन्याम मोकल्योहो तियाल ओअखुते नाहा. ²² आय आवतो नाहा आन तियाहान आखतो नाह ता तियाहावे दोष नाय रेतो पेन आमी तियाहा पापाल केललो बी बाहानो नाहा. ²³ जो मा विरुध्द केअहे तो मा बाहाका बी विरुध्द केअहे. ²⁴ केडांयज केअये नाहा ऐहेंडे चमत्कार कामे जर तियाहाम आय केअतो नाय ता ते दोषी नया रेते पेन आमी तियाहाय मान आने मा बाहाकाल ओअखीन बी विरुध्द केअयीही. ²⁵ तियाहाय एहेंडीज मा विरुध्द केअयी इ वचन तियाहा शास्त्राम लेखलो हाय, तो पुरो वेरा जोजे तियालुज कावींज कारण नाहा ते बी इ विरुध्द वेअयी. ²⁶ बाहाकाहीने जो आवनारो हाय तियाल आय बाहाकाही जायत तुमाही मोकलेहे तो मोदत के अनारो खेरो आत्मो जाहा आवी ताहा तो मा बोद्दल साक्षी दी. ²⁷ मा सेवा सुरु वेअयी तेहे तुमा बी मा आरी हाय तियाल तुमा बी मा बोद्दल साक्षी द्याहा.