¹ येशुय तिया चेलाहान आजी आख्यो, “तुमा मोना मोनाम दुखी मा वी जाहा. पोरमेहेरापे विश्वास थोवा, आन मावे बी विश्वास थोवा.” ² मा बाहाका कोमे रेवनु खुब जागो हाय जर जागो नाय रेतो ता आय तुमहान आखतो काहाका आय तुमा केअता जागो तियार केरा जाहु. ³ आने आंय जायन तुमा खातोर जागो तियार किईन फाचे तुमाहान लां आवेहे आने तुमाहोन मा आरी ली जाहे, इया खातोर का आंय जिही रेहे तिही तुमा बी कायम रा जोजे. ⁴ आय कीही जाहु ती वाट तुमाहान मालुम हाय.” ⁵ थोमाय येशुल आख्यो, “ प्रभुजी, तु काही जावहो तो आमाहान मालुम नाहां, ता ती वाट केहकी मालुम रि ?” ⁶ येशुय तियाल आख्यो, “मार्ग, सत्य आने जिवन मायज हाय, केडाल बी मा इही आव्या वाची पोरमेहेर बाहाकाहीं जावानारो नांय.” ⁷ पेन तुमा जर मांन ओखुताहा ता तुमा मा बाहकाल बी ओखुताहा आने आमीनेज तुमा तियाल ओखुताहा, आने तुमहाय तियाल देख्योहो.” ⁸ ताहा फिलीपाय येशुल आख्यो, “प्रभु, आमाहान पोरमेहेर बाहको देखाव ओतोज आमाहान जोजे.” ⁹ येशुय तियाल आख्यो, “फिलीप्पा, आय आमी लुगूु तुमा आरी आथो, तेबी तुयूय मान वोअख्यो नाहा का?” जियाय मान देख्यो, तियाय मा बाहाकाल बी देख्योहो. ता बाहको देखाव एहकी काहाल आखतोहो ?” ¹⁰ आय बाहकाम हाय आने बाहाको माअम हाय, एहकी विश्वास तु थोवतो नाहा का ? जे गोठ्या आय आखुहू ते मा मोनाकी नाहा आखतो, पेन माम रेनारो बाहाको तिया सोवताहा काम केहे. ¹¹ आय बाहाकाम हाय आने बाहाको माअम हाय एहकी तुमा विश्वास थोवा, नाय ता मायुय केअले कामे विईन तेबी माअप विश्वास थोवा. ¹² आय तुमाहान खेरोज आखुहु आय जे कामे किईहु ते कामे माअपे विश्वास थोवनारो बी केरी आने तियासेबी मोडे कामे केरी काहाका आय पोरमेहेर बाहाकाही जाअहु. ¹³ जो काय तुमा मा नावाहाकी मागाहा तो आहे देहे इया खातोर का पोयराकी बाहाका नावा उंचो वेरां जोजे. ¹⁴ तुमा मा नावाहाकी माअप कायबी मागाहा ताहा आय तुमाहाल देहे. ¹⁵ माअप तुमा मोया वेरी ता मा आखल्या गोठ्या तुमा पालाहा. ¹⁶ आय बाहकाल आखेहे, आने तो तुमाहांन तुमा आरी कायमुज रा खातोर मोदत केअनारो आत्मो दी. ¹⁷ तो खेरो आत्मो हाय, तियाल दुनिया अविश्वासी माअही मानते नाहा, काहाका ते तियाल देखी नाहा सेकते, आन ओअखुते नाहा, पेन तुमा तियाल ओअखुताहा काहाका तो आमी तुमाआरी रेअहे आने फांसो तो तुमाहामुंज री. ¹⁸ आय तुमाहान आमी अनाथ रा देनारो नाय, आय तुमाही आवीही. ¹⁹ आमी आजी थोडाहाज टेमाम दुनिया अविश्वासी माहे माने वेअनारे नाहा , पेन तुमा माने वेअहा, आय जिवतो हाय तियाहाल तुमा बी जिवते रऱ्याहा. ²⁰ तहा तुमाहान होमजाय का आय बाहकाम हाय आने तुमा मां हाय, आय तुमाहाम हाय. ²¹ जियाप मा नियम हाय आने जो ते नियम पालेहे, तो माअवे मोया केअनारो हाय आने जो माअवे मोया केअहे तियाव मा बाहका मोया केरी आने आय बी तियावे मोया केअहे आने आय केडो हाय इ तियाल हारी रिती देखावेहे. ²² यहुदा (इस्कार्योत नाहा ) तियाल आख्यो, “प्रभु, एहडो काय वेअयो का आपमेहेन देखाहो आने था दुनिया अविश्वासी माअहान नाय देखाहो . ²³ येशुय आख्यो, “जो केअडो माअवे मोया केअहे तो मा वचन पालेहे तियवे मा बाहको मोया केरी आने आमा आविन तिया आरी रीहू. ²⁴ जो माअपे मोया नाहा केअतो तो मा वचन नाहा पालतो आने तुमा जे वचने उनातेहे ते मा नाहा पेन जियाय माने मोकल्योहो त्या पोरमेहेर बाहाका हाय. ²⁵ आय तुमा आरीज हाय ताहा ए गोठ्या तुमाहांन आखल्या हाय. ²⁶ आने जियाल बाहको मा जागो ला मोकली तो मोदत केअनारो पवित्र आत्मों तुमा होमजा जोजे एहड्या गोठ्या तुमाहान हिकवी आने मायुय जो तुमाहान आख्यो तियो गोठीहीमेने जो तुमा विहीराय गेहेला ते गोठ्या बी तो तुमाहान इतवी दी. ²⁷ आय तुमाहान मा शांती दिहू, आय मा शांती तुमाहान दिहू जेहेंकी दुन्यामेने गोठ्या शांती देत्याहा तेहंकी शांती आय तुमाहान देतो नाहा, तुमा दुखी मा व्याहा, आन बियाहा मा. ²⁸ आय जाहु आने तुमाही फासे आविही ; एहकी मायुय जो तुमाहान आख्यो तो तुमा उनाये, माप तुमा मोया रेती ता माय पोरमेहेर बाहकाय जाहू आखिन तुमा खुष वेता काहाका मा बाहाको मा से बी मोडो हाय. ²⁹ आय तुमाहान इ वेरा आगलोज आखहू इया खातोर का जाहा इ वेरी ताहा तुमा मावे विश्वास थोवा जोजे. ³⁰ आय तुमा आरी आमी वाद नाय गोगु, काहाका इया दुनिया अधिकारी काल्योपुत आवेहे पेन मावे तिया काविंज अधिकार नाय चालनारो. ³¹ पेन दुन्यामेने लोकाहान मालुम वेरां जोजे का आय बाहकावे मोया किहुं, आय बाहकांय जो हुकुम केअयो तो आय पालुहू, चाला आपू आमी इहीने निंगता.”