अध्याय १
1
पेअला शब्द आथो, शब्द देवाआरी आथो आने शब्द देव आथो.
2
तो पेअला देवाआरी आथो.
3
होंग्गोज काय तियावाय वेयो आने जो काय वेयो तो तियाय केया शिवाय वेयो नाहा.
4
तियाम जीवन आथो; आने तो जीवन माहा (लोका) खातोर उजवाडो आथो.
5
तो उजवाडो आंधाराम उजवाडो देतलो; तेबी अंधाराई तियाल अंगीकार केयो नाहा (मोन्यो नाहा).
6
देवाहाने माेकलुलो एक माहु प्रगट वेयो; तिया नाव योहान.
7
तो गवाही बोनी तिया उजवाडा बारामे गवाही द्या आलो; ईया खतोर का होग्गाय तिया द्वारा विश्वास थोवा जोजे.
8
योहान तो उजवाडो नेय आथो, पेन तिया उजवाडा बाराम गवाही द्या जोजे तिया खातोर आलो.
9
जो खोरो उजवाडो हरऐक माहा उजवाडो बोनावेहे तो जगाम आवनारो आथो.
10
तो जगाम आथो आने जग तियावाय बोनावलो, तेबी जगाय तियाल वोहख्यो नाहा.
11
जे तिया खाजगी आथा तियापाही तो आल्लो तेबी तिया कुटूंबीया तियाल मान्यो नाहा.
12
पेन जोताहाबी तियाल मानी लोदो, तिया नावाप विश्वास थोव्यो, तोताहान तियान देवा पोयरे वेरा खातोर अधिकार देदो.
13
तिया जल्मो रक्तो नेअता देवा इच्छा नेअता माहा इच्छा ईयापेने वेया नाहा पेन देवापेने वेयोहो.
14
शब्द देहे वेयो, आने तियाय आमाहमे वोहती केयी आने आमाये तिया गौरव वेयी, तो बाहाकोपेने आलेलो तिया ऐखलाज गौरव वेरा जोजे. तेहेकी कृपा आने सत्यावाय परिपुर्ण (पोरालो) वेलो आथो.
15
योहान तिया बाराम गवाही देहे आने माेडाआ आवाजा की आखेहे, “जिया बारामे मायुय आख्यो की, माआ फासला जो आवेहे तो माआ हुबुंर आगलो हाय, काहाल तो माआ पेअला आथो, तो ओज हाय.”
16
तियामेनेज आपुह होग्गाज कृपापे कृपा वेली हाय.
17
काहालका नियमशास्त्र मोशे वाय देदलो आथो; कृपा आने सत्यो येशु ख्रिस्ता वाय वेयी.
18
देवाल किदीहीज केडाय देखलो नाहा. जो देवा एक नौशी एक पोयरो बाहाका आरी आथो. तियाल तियाय प्रगट केलो हाय.
19
आने योहाना गवाही ई हाय; जाहा यहुदी अधिकाऱ्या यरुशलेम शहारामेने याजक आने लेवी तियाहान तियाय पुछा मोकल्ये की, “तु केडो हाय?”
20
तियाय खुलेआम कबुल केया, इन्कार नाहा केयो, “आय ख्रिस्त नाहा” ऐहेकी तियाय कबुल केयो.
21
ताहा तियाय तियान पुच्यो, “तेबी तु केडो हाय का? एलिया हाय का?” तियाय आख्यो, “आय नाहा.” “तु भविष्य आखनारो हाय का?” तियाय उत्तर देदो “आय नाहा.”
22
तियापेने ते तियाल आख्यो, “तु केडो हाय? याने जियाय आमाहाल मोकल्यो तियाल आमु उत्तर देहु. तो बाराम तो काय आखलु हाय?”
23
तियाय आख्यो, “यशया भविष्य आखनारा प्रमाणे पेरमेश्वरा वाट हारी केरा तिया वाट निट केरा, ऐहेकी रानामाय ऐहेडी आवाज आय उनालो हाय."
24
आने मोकलुले माही परुशी मेने आथे.
25
आने तियाय तियाहान प्रश्न किईन पुच्यो, “तु तर ख्रिस्त नाहा किवा एलिया नाहा, आने तो संदेश देनारो नाहा, तेबी तु बाप्तिस्मा काहा देतो हो?”
26
योहानुय तियान उत्तर देदो, “आय पायावाय बाप्तिस्मो दिहु, पेन तुम्हाये तियाले वोहख्यो नाहा ऐहेडो एक जाआ तुमामे उबो हाय.
27
तो माआ फासला आवनारो हाय, तिया चापलाहा बांद्यासोडा खातोर आय इया लायक नाहा.”
28
यार्देनु तियुवेलाने बेथानीन योहान बाप्तिस्मा केअतलो आथो तिही ई गोठ्या बोन्या.
29
बिहीरे दिही येशुल तियावेला आवता विईन योहानाय आख्यो, “ओ वेरा जगता पाप हरण केअनारो देवा कोकरो!
30
जिया बाराम मायुय तुमाहाल आखलो आथो की, माआ फासला एक जाआ आवी रेहेलो हाय तो माआ आगला वेलो हाय काहालका तोअे माआ आगला आथो; तो ओज हाय.
31
आय तियाल वोहखतलो नैय आथो; तेबी तियाय इस्त्राएलाम प्रगट वेरा जोजे तिया खातोर आय पाया वाय बाप्तीस्मो केअतो आल्लो हाय.”
32
योहानाय ऐहेकी गवाही देदी का, “आत्मा कबुतरा होस आकाशामेने उततो आवतलो ताहा तिया उच्चे उबी रिया मायुय वेयो.
33
आय तियाल वोहखुतलो नैय आथो, तेबी मायुज पायावाय बाप्तीस्मो केरावा खातोर जियाय माल मोकलुलो तियाय माल आखलो की, “तु जिया केडाप आत्मा उतुअता वेतलो आने स्थिर रियाे वेअयो तोज पवित्र आम्मावाय बाप्तिस्मो केअनारो हाय.’
34
मायुय सोता वेअलो हाय, आने गवाही देदली हाय की, “ओ देवा पोयरो हाय.”
35
तिया फासला बिहीरे दिही योहान आने तिया चेलामेने बेन्याआरी उबो रेहलाे.
36
येशु जातलो ताहा तियाल विईन आखतलो “ओ वेरा, देवा कोकरो!”
37
तिया ई गोंगलु तिया बेन्या चेलाही उनाया आने ते येशुअ फासला फासला गियो.
38
ताहा येशुय फासला फिरीन तिया फासला आवताल ई विईन आख्तालो “तुमु काय होदताहा?” तेअे तियाल आखताला, “रब्बी (गुरुजी) तु काही रेअतोहो?”
39
तो तियाहान आखतलो, “आवा आने वीइल्या.” फासे तीया जायने तो किही रेअतलो तो वेअयो आने ते तिया दीही तिया आरी तीही रिअया; ताहा तिही लगबोग चार वाजले आथे.
40
योहान गाेगता उनाईन तिया फासला जेअे बेन जाअ गेहेला, तियामेने एक शिमोन पेत्राआ पावु अंद्रिया ओ आथो.
41
तिया तियाल खास पावु शिमोन पेअलाने भेटलो, आने तियाय आखा लाग्यो “आमाहाल मसीहा याने ख्रिस्त सापड्यो हाय.”
42
तियाय तियाहाल येशुअ पाही लिई आला येशुय तिया वेला विईन आख्यो, “तु योहाना पोयरो शिमोन हाय. तुल कैफा याने पेत्र नेअता खडक (डोगडो) आखी."
43
बिहीरे दिही तियाय गालील शहराम जाआ खातोर कोशीश केअयी आने ताहा फिलीप्प तियाल मिल्यो; येशुय तियाल आख्यो, “माआ फासला आव.”
44
आमी, फिलीप्प बेथ्सैदा आने अंद्रिया आने पेत्र ईया नगराम आथो.
45
फिलीप्पाय नथनेला मिल्यो ताहा तो तियाल आखा लाग्यो, “जिया बारामे मोशेय नियमशास्त्राम लिख्लो आने तेहेकीज सदेष्ट्यांय लिख्लो तो तियाल योसेफा पोयरो येशु नासरेथकर आमाहाल सापड्यो हो.”
46
नथनेल तियाल आखा लाग्यो, “नासरेथ्मेने काही तेबी हारो निंगी का?” फिलीप्पाय तियाल आख्यो, “आवीन वेअरा.”
47
नथनेल तियावेला आवतालो ई येशुय वेयो आने तो आखा लाग्यो, “वेअरा, ओ खेरो इस्त्राएली हाय, इयाम खोटो नाहा.”
48
नथनेल तियाल आखतलो “तुमाहाल माआ ओळख केहेकी?” येशुय तियाहाल उत्तर देदो, “तुल फिलीप्पाय हादलो, तियापेल्लाने तु अंजिरा चाडवा निचे आथो, ताहाज मायुय तुल वेअलो."
49
नथनेलाय उत्तर देदो, “रब्बी, तु देवा पोयरो हाय, तु इस्त्राएल राजो हाय.”
50
येशुय तियाल उत्तर देईन आख्यो, “आय तुल अंजिरा चाडवा निचे वेअलो तियाल आख्यो तियाहाल तु विश्वास थेवतो का? तु तिया केअता मोड्या गोठ्या वेयहो.”
51
आने तो तियाल आखतलो “माय तुमाहाल खेरोखर आखुहु, तुमा ईया आगला आकाश खुल्ला आने देव दुतान चोडता आने माहा पोयरान उतुअता वेयाहा.”