अध्याय १
1
याकोब, देवाआ आने प्रभु येशु ख्रिस्ता सेवक, या होवेनी होग्गा जगामे फेअलायला, विश्वास थोवनारा बारा यहुदी वंशाले नमस्कार.
2
मा पावुहु, जीया जीया वेअले तुमापे जुदया-जुदया परिक्षा आवतहा, ताहा तुमा कुशीज मानजा
3
तुमाले माहीत हाय का, तुमा विश्वासाआ परिक्षे वाअई सहनशिलता उबजेहे.
4
आने तीया सहनशिलताले आपु कार्म पुरो केरा द्या. याकेअता का तुमा पाक्का, पुरेपुर आने केल्लीबी बाबत कोमी नैय अेहेडे पुरे केरा जोजे.
5
काहाका जर तुमाहीमेने केडो ज्ञानाकी कोमी वेअरी ते त्याये देवापेनी मागा जोजे काहाका तो त्याले मिली काहाका तो दोष नैय लागुवता होग्गाले मोनमोकलो देहे.
6
पेन तीयाय विश्वासाकी मागा जोजे आने सौंवशय तेअहो नाहा काहाका जो सौंवशय तेअहे तो वाराकी उडीजानारा आने दोऱ्यामेनी उचे उडनाऱ्या लाफासारखो हाय.
7
अेहेडा माहाये अेहेडो विचार केरा नाय जोजे का, प्रभुपेने त्याले काय मिली जाय.
8
काहाका तो बेन मोनाआ हाय तो होग्गा मार्गा मे निट नाहा.
9
गोरीब हाय त्या पावुहु, आपु मोडापना विषयी अभिमान केअजा
10
आने श्रीमंत पावुहुये जो नम्र सोबाव बारम अभिमान केअेजा काहाका तो ऐगाहा चाराआफुला सारखे रेअनारो नाहा.
11
दिही (सुर्य) तीयाआ मोडा उजवाडा की उग्यो आने त्याचे चारो कोमायो. हाती तीया फुल गोली पोड्यो आने तीया रुपा शोभा जातीरिई तीया होस श्रीमंत माहाबी तीया कामा भारामे कोमाय जाये.
12
जो वोहखो सहन केअहे तो आशिर्वादित हाय काहाका वोहखो सहन केअेहे आने जीतेहे तियाल जो जीवनुअ मुकुट देवाय जीया पे प्रीती केअेनारले द्या खातोर वचन देदला हाय तियान दीअई.
13
केडाबी परिक्षा वेअती ताहा त्याये ऐहकी आखा नैय जो जे का "देवाय माल लोबीमे टाक्यो." काहाका देवाले खराब गोठी लोब पोडती नाहा आने तो केडआल बी लोंबीम पाडतो नाहा.
14
हाती एक एक जावाले तीया सोताहा इच्छाकी लोबीमे पोडे हे आने फुलवाय जाहे
15
हाती इच्छा डेडीआरी रिई जायेने पपाले जन्म देई आने पापाआ (दिही) पुरो वेईन मरण उबजावे हे.
16
माआ मोयाला पावुहु, सौताहा फसवनुक वेअरा नाहा द्याहा.
17
एक ऐकाले हारो दान आने पुरो दान देवाईने हाय. जो बोदलु तो नाहा आने फिरनारी सावली की नाहा अेहेडा होरग्या उजवाडा रेनारो बाहाका मेने तो उतेहे.
18
आपु तिया उबजावलामने पेअेलो फोल वेअरा जोजे तियाले तिया सत्यवचना द्वारे सौताहा इच्छा की आपुले जल्म देदो.
19
माआ मोयाला पावुहु, ई मानामे थोवा अेकअेक माहाव उनाउलामे तत्पर जोजे, हाचवीन गोगनारो जोजे, आने रोग कोमी जोजे.
20
काहाका माहाहा रोगा मे देवाआ हारीगोठी कार्य वेअतो नाहा.
21
तीयाले तुमा चोमगी होग्गा खराब गोठी मेन पुरेपुर सोताहा सुटको केई ल्या, आने जो तुमा आत्माले तारण केरुलामे समर्थ हाये ती देवा वचन तुमा मोनामे पाक्को नम्रतेने मानिल्या.
22
वचनाप्रमाणे पालनकेअनारे व्या पेन फक्त उनानारेज ऱ्या नाहा ता ज्या प्रमाणे केअरा काहाका जो तुमा उनाते ओथेज ता तुमा सोतारी लोबाडी केअता.
23
जो केडो देवावचन उनाहाये पेन तीयालनुसार वागतोनाहा तो आरसामे आपु शारीरिक मुय वेअनारा माहाअ होस हाय.
24
तो माहाये सोताहोवे लक्ष दिईन वेअेहे पासे निगी जाये आने आपु केहडो आथो तो लगेज विहीराय जातेहे.
25
पेन जो सुट्टापणाकी पुरेपुर बारकी वाय नियमाले पालेहे आने वचन उनायने तो विहीराय नाय जाय तियालनुसार चालेहे तो माहावु जो काय केअहे तो तीया मे आशिर्वादीत वेअरी.
26
जेहेकी अेगोही माहु सोताले भोक्तीमान (धार्मिक) होमजे आने तेबी सोताहा जीभेवे ताबो थोवतो नाहा तो सोताहा मोनाले (ठोगावे. तिया माहाआ भोक्ती (धार्मिक) कावीज कामी नाहा.
27
अनाथ आने विधवा तिया मुश्किलि वेअले जो तिया काळजि लेहे ओ सोताले जगामेनी बिगडुल्या चाली रितीमेने दुर थोवेहे, अेहेडा माआहा भोक्ती (धार्मिकता) देवा हुबुर शुध्द (चोखी) आने केल्लो बी खराबी नैय ठेरे