¹ देव खुप पेअला जुना कालामे आपु डाया आरी संदेष्टा मार्फत खुब पेलाआ जुदा-जुदा मार्गाकी गोग्यो, ² पेन ईया शेवट्या (सेल्ला) दिहयामे तो आपु आरी तीया पोयरा मार्फत गोगलो हाय, त्याये पोयराले बांदी गोठीही वारस अहेकी नेम्योहो. देवामे पोयराकीज जगत उपजाव्यो हो. ³ पोयरो ओ देवा गौरवा तेज हाय तो देवाआ स्वभावाआ बोरोबर प्रतीरुप उजवाडो हाय. पोयरो आपु सामर्थ्यशाली शब्द की बाठ्या गोठ्या राखेहे. पोयरामे लोकांहा तिया पापा मेनी शुध्द (चोखे) केअेयो, फासो तो होरगामेनी बांठाहीनी मोडो मान वालो देवाआ हुदा आथा वेले बोठो. ⁴ तो देवदुता केअेता मोडो वेअेयो. तीयाआ नाव बी जो वारसा की त्याले मिल्योहो तो तीया नावा केअेता मोडो हाय. ⁵ देवाय केल्लाज देवदुताले आख्यो नाहा का: “तु माआ पायरो हाय; आज आय तो बाहाको वेअेलो हाय?“ आने फासे,' आय तीईया बाहाको वेअेहे, आने तो माआ पायरो वेअेरी?' ⁶ आने फासे, देवा जाहा तीया पोयराले जगामे लावेहे, तो आखेहे “देवाआ बादा देवदुत त्याले नमन केरी.” ⁷ देवदुता केअेता देव अेहेकी आखयो, “तिया देवदुतांने वांरो आने ज्याआ सेवकांने तो अग्नी ज्वाला बोनवेहे". ⁸ पोयरो केअेता ते तो अेहेकी आख्यो; देवा, तोओ राजासन सादाजे बादा काला केअेता हाय, आने तोओ राज युगानयुगा केअेता हाय आने “तो राजदंड न्याय केअेनारो अेहेडो हाय. ⁹ नितीमत्व तुले सदा (नेहमी) पोटनारो हाय. अनिती ई तुले पोटतो नाहा, तो देवाये, तोओ हेगात्या हीने तुले आनंददायी तेलाआ अभिषेक केअेलो हाय." ¹⁰ आने हे प्रभु ,सुरवातील तु तोरती पायो टाक्यो, आने वादलो तो आथाआ काम हाय. ¹¹ ते पारवाय जाई पेन तु सदाजे रेहे ते फाडका होसे जुने वेअेरी. ¹² तु त्याहाले फागुला फाडका होसे चोहोडावोहो, तु त्याहाले फाडका होसे बोदलोहो, पेन तु सदाजे सारकोज रेहे, आने तो वोओरेहे कोदीज पारवानारे नाहा. ¹³ तो केल्लाज दुताल अेहेकी आख्यो नाहा, तोओ दुसमोनाले तो तोज पगाही बोंही ताव लागे तु माआ हुदी वेले बोहो. ¹⁴ बांदे देवदुत देवाआ सेवामेनी आत्मा नाहा का? आने तारणाआ अधिकार (मोको) जीहाले मिली त्याहाये मोदत केरा मोकलुले ते का नाहा?