¹ इफिस शहराम रेनारे पवित्र लोक आने ख्रिस्त येशुम विश्वास थोवणारे इह्याले देवा इच्छाकी ख्रिस्त येशु प्रेषित पौल इयाहीने. ² देव आपो बाहाको आने प्रभु येशु ख्रिस्त इयाहीने तुमान कृपा आने शांती आवा जोजे. देवा स्तुती ³ आपो प्रभु येशु ख्रिस्ताआ बाहाकाल आभार हाय होरगामने गोठीकेअता होग्गा आत्मिक आशिर्वाद दिईन ज्या देवाही आमान ख्रिस्ताईने आशिर्वाद देदलो हाय. ⁴ देवाही ख्रिस्ताम विश्वास थोवणारान तोरतीबाेनावा पेहलाच निवडी लेदलो इयाखातोर का आमा आ तिईया आगला पवित्र आने निर्दाष रा जोजे. ⁵ देवाआ मोयाकेअता येशु ख्रिस्ताहीने तिईया खुद पोयरे वेअरा खातोर आमान मांडीपे लेदले खातोर पेहलाच आमा नेमाय गिईले हाय. ⁶ तिईयाइ इ होग्गा देवाआ गौरव कृपाआ स्तुती वेरा जोजे तिईयाय केअयो इ कृपा तिईयाही तिईया मोयाला पोयराईने आमान मिलवा देदी. ⁷ तिईया मोयाला पोयराई तिईया रोगोत वेअेरीन खोडं ती पोईन आमान मुक्ती देवाम आल्ली हाय, देवाआ कृपाआकी मोडा मोनाकी आमान आमाहा पापाहा क्षमा मिलली हाय. ⁸ देवाआ इ कृपा आमान होग्गा हारा विचाराकी आने शांती की खुप पुरवाम आल्ली हाय. ⁹ देवाई दोबावी थोवली खेरी योजना आपोल आखली हाय जी तिईयाही ख्रिस्ताहाईने आपोन आपो इच्छाकी देखावली हाय. ¹⁰ देवाआ योजना प्रमाणे ताहा तिईया टेम पुरो वेअरी ताहा तो होरगामने आने तोरतीपने होग्गा जे काही ख्रिस्ताम एक जागे ली आवी ¹¹ आमा देवाआ लोक मानिन पेहलाच ख्रिस्ताम तिईया योजना की नेमाय गिईले आथे जो होग्गा गोठ्या हारा केअता तिईया इच्छा की केअेहे. ¹² इयाके ओतो ख्रिस्ता गौरव स्तुती युहदी आमा होने वेअेरा जोजे जीईयाप आमा पेहलोच आशा हाय ¹³ ख्रिस्ताईने तुमाआबी खेऱ्या वचना आने तुमाआ तारना हारी गोठ उनाले हाय. आने तियाप विश्वास थोवलो हाय तहा तुमा पवित्र आत्माआ अभिवचना शिक्काे ठोकाम आल्लो हाय. ¹⁴ तिया प्रियलोकाहा खोंड पोईन मिलवुल्या मुक्तीकेअता ओ पवित्र आत्मो आपो वतनाआ पुरावो हाय इयाकेअतो की देवा गौरव स्तुती वेअरा जोजे. देवाज्ञाना प्राप्तीकेता प्रार्थना ¹⁵ तिइयाल तुमामने रेनारो प्रभु येशुपने विश्वास आने तुमाआ पवित्रलोकाहा उपे प्रिती अनाईन. ¹⁶ मायु तुमाखातोर देवाल धन्यवाद देवनु आने माआ प्रार्थनाम तुमाल इत राखनु रोकी नाहा थोव्यो. ¹⁷ माआ अेहकी प्रार्थना किवहु की आमा प्रभु येशु ख्रिस्ता देव, गौरव बाहाका इयाहा तुमान आपो ओखुनारो ज्ञानाआ आने प्रकट केअनारो आत्मो दा जोजे. ¹⁸ तियाल तुमा मोना डोओवा उजवाडो विईन तुमान इ होमजा जोजे तिया गोगनु आश्या खेरो काय हाय, तिया वोतना गौरवा धन पवित्र लोकाम कोती हाय. ¹⁹ आने आपु जे विश्वास थेावनारे तिइैया आपेकेअेता तिइया सामर्थ्या खुप मोठी महत्त्व तो काय, तो तुमाआ तिईया शक्तीशाली पराक्रमाआ कामाआपने वोअखीला जोजे. ²⁰ तियाही ती गोठ ख्रिस्ताहीने किइन तियाल मोअलामेने उठवुलो आने होर्गाम देवा हुदावेल बोहाव्यो. ²¹ तियाई तियाल होग्गा अधिपती, अधिकारी, सामर्थ्य प्रभुत्व आने होग्गा सामर्थ्या जे नाव इकालाम नाहा ते आवनारा कालामबी देवाम आवी तीयाहोग्गहीने खुप ऊच्चो केअयो. ²² देवाही होग्गा ख्रिस्ताआ पागाअेठा केअेयो, आने तियाल होग्गा उच्चे मंडळी मुनकाे आखिन देदो. ²³ इस ख्रिस्ता शरीर जो होग्गाहीने होग्गो पोओये तिईयाइ तो पोअलो हाय.