¹ काहाका तुमा ख्रिस्ता आरी उठवाम आलला हाय ताहा ख्रिस्त देवा हुदी होवे जीही बोठलेा हाय तिहीने उचऱ्या गोठ्या मिलवा कोसीस केरा. ² उचरी गोठी होवे मोन लागवा तोरतीपेने गोठी होवे लागवाहा नाहा, ³ काहाका तुमा माेअलो हाय आने तुमा जीवन ख्रिस्ता आरी देवाम दोबावी थोवली हाय. ⁴ आपु जीवन जो ख्रिस्त प्रगट केराम आवी ताहा तुमाबी तिया आरी जयजयकाराम प्रगट वेराम आवी. ⁵ ताहा तोरतोवेने तुमा अवयव काहाका सिनालो, खाराब गोठ्या, कामवासना, कुवासना ने लोब इयाल मुर्तीपुजा आखते हे इयाल माय टाका. ⁶ तिया इहिमे देवा कोप वेअेहे. ⁷ तुमाबी पेअला त्या वासनाम जीवी रेहेला ताहा तियाम तुमा चालतुला. ⁸ फाचे आमी तुमामेने खुबरोग, रोग ने खराब पोन निदा आने तुमा मुयाहाकी गाय देवुलो इ बादो आपुपेने दुर केरा. ⁹ ऐक बिहिराआरी खोटो गोगाहा नाहा काहाका तुमा जुना माआहाल तियाहा कामा आरी काडी टाकले हाय. ¹⁰ आने जो नोवो माआहु आपु उबजावनारा रुपाहोस पुरो ज्ञानाम जोतो केराम आवी रियोहो तियाल तुमाबी पोवी लेदलो हाय. ¹¹ इयाम ग्रीक ने यहुदी सुंता वेअलो ने नेय वेअलो बर्बर ने स्कुथी दास ने सुटोवेलो इयाम फोरक नाह हाय, ता ख्रिस्त बांद्दो काय हाय ने बांद्दाम हाय ¹² ताहा तुमा देवा पवित्र ने प्रिय ऐहेडो निवडुला लोक हाय, काहाका किवाला एहेंडो मोन, दोया सौभ्यता लीनता ने सहनशीलता लिल्या. ¹³ एकबिहिरा सहन क्या आने केडा एगाहा आरी भानगड हायता एक बिहीराहान माफ क्या, ¹⁴ आने प्रभुय तुमा माफी केअयी तेहेकी एकबिहीरा माफी केरा. पुरो केअनारो बंधन एहेंडी जी प्रिती ति इया बादावे लिल्या ¹⁵ ख्रिस्ता शांती तुमा मोनाम राज केअए तिया केअता एक डिल एहेडो हादलो हाय, आने तुमा उपकारस्तुती क्याआ. ¹⁶ ख्रिस्ता वचन तुमाम खुब जाहाको रेअ, तुमा ज्ञानापेनाहाकी एक बिहीराल हिकवा आने आखा आपु मोनाम देवाल स्त्रोत्रे गिते ने आध्यत्मीक गिते कृपा खुशीहीकी आखा. ¹⁷ आने गोगुलो ने जो तुमा केरुलो तो बाद्दो प्रभु येशु ख्रिस्ता नावा क्या आने तियाहाठहीमे देव जो बाहाको तिया उपकार स्तुती केरा. ख्रिस्ती माआहा कोओमेने जिवनु ¹⁸ थेअयीही जेहेकी प्रभुम होरो काय तेहेकी तुमा आपु आपु माट्याहा ताबाम रेजा. ¹⁹ माट्याही आपु-आपु थेअयी वे प्रिती केजा, तियु आरी कोडोक ऐहेकी वागा नाहा. ²⁰ पोयराहा तुमा बांदी गोठीम याहाकी –बाहाका आज्ञा पाला काहाका इ प्रभुल खुशी देनारो हाय. ²¹ बाहाकाहा तुमा आपु पोयराहान रोग आवे एहेकी क्याहा नाहा, नाहाता ते उदास वि जाई. ²² आवत्याहा जगामेने जो तुमा तारणारो हाय तिया बाद्या गाेठीहीम मान राखजा, माआहाल खुशी केअनारा आवत्या सारखे मुय विईन चाकरी केअहो नाहा, ता नोमला मोनाकी प्रभु धाक थोवीन पाला. ²³ आने जो काय तुमा केताहा तो माआहा केअता ऐहेकी क्याहाना ता प्रभु खातोर मोन लागवीन क्या. ²⁴ प्रभुहिने वतन रुपामे तिया फोल तुमाहाल मिली इ तुमाहाल मालुम हाय प्रभु ख्रिस्ता सेवा केअते ऱ्या. ²⁵ काहाका अन्याय केअना राहाने जो अन्याय केअलो तोज तियाल मिली ओन भेदभाव नाय वेअनारो.