¹ पेन जाहा सेल्यो कालाम संकटा दिही आवी ताहा होमजी ल्या ² लोक स्वार्थी, लोभी, बढाई केनारा, गार्विष्ठ, निंदा केनारा याहकी बाहका गोठ्या नाय माननारा, अनुपकारी, अधार्मिक, ³ बीजा केडापबी दोया नाय केनारा, चुगल्या केनारा असंयमी क्रुर हाऱ्या गोठीप प्रेम नाय केनारा, ⁴ विश्वासघाती, उतवाल्या, गर्वाकी पोराला, देवाप प्रीती केरापेक्षा चैनी वादार पोटनारी एहेडी वि जाय, ⁵ ते देवा केरूला स्वरूप हारो देखावी पेन ते तियाम जी सोकती हाय तियुल ते नाय ले, एहडा माहायने दुर रेजा. ⁶ काहाका इयामने वाहीक लोक एहडा बी हाय जे ठाकाज कोमे विहताहा आने पापाकी पोराला बाद्दा वानी वानी वाईट अभिलाषाकी पोराला आने कमकुवत थेईप ते ताबो मिलवुतेहे ⁷ एहड्या थेया निसत्या हिका खातोर प्रयत्न केत्याहा पेन सत्या पुरा ज्ञानाहीलुग त्या किधी जाई नाहा सेकत्या, ⁸ जेहकी यान्नेस आने यांब्रेस इयाय मोशे विरोध केलो तेहकी इ माही सत्या विरोध कि रियाहा, इ माहा मोने भ्रष्ट हाय आने भोरुसो अनुसरण केरुलाम इ अयशस्वी वेले एहडे इ माही हाय ⁹ पेन ते तियाहा आगला वादार प्रगती नाय वे काहाका जेहकी यान्नेस आने यांब्रेस इयाहा मुर्खपणो हुमबुर आललो, तेहकी इयाहा बी मुर्खपणो बाद्दा हुमबुर, प्रकट वि ¹⁰ तेभीभी, मा जीवनु पध्दती, मा जीवनामने मा विश्वास मा धीर, मा प्रीती, मा सहनशीलता, मा वेलो छळा, मापे आलेलो संकटे इ तुल मालुम हाय ¹¹ अंत्युखिया, इकुन्या आने लुस्र इ शेहराम मा भयानाक छळ केयो तो मा दुखे तुल मालुम हाय, पेन तेबी प्रभुय बाद्दा तारासाम सांमभाल्यो ¹² खेरो ता जे ते येशू ख्रिस्ताम चोखो जीवन जीवनु होदताहा ति बाद्दापे छळ वी ¹³ आपु पापी ने ठोगऱ्या लोक बिजाहान ठोगता ठोगता सोता बी ठोगय जाय आने वादार पापाम जातेरी ¹⁴ पेन तो बाबतीम जे गोठ्या तु हिक्यो आने जियुप तो विश्वास हाय त्या तुल मालुम हाय केडायने हिक्योहो. ¹⁵ आने तुल मालुम हाय की तो हानोपेने तुल पवित्र शास्त्र मालुम हाय, ते तुल येशू ख्रिस्ता विश्वासा की तुल शाहणो की आने तारणाही लि जाऊला सामर्थ हाय ¹⁶ बाद्दो पवित्र शास्त्र परमेश्वरा प्रेरणा की लेखलो हाय तो लोकांहान सत्य हिकवा, तियान हुदरावा, तियाहान तिया चुका देखावा आने धार्मिक जीवन जीवा मार्गदर्शन केरा खातोर उपयोगी हाय ¹⁷ इया खातोर का देवा प्रत्येक सेवक शास्त्रा प्रयोग किन बाद्दा प्रकारू हारे कामे केरा खातोर समर्थ आने साधन सम्पन्न वि.