¹ १) यीसु यी आखी वात कोयीन ओवतु यीसु तेर चेलानुह कोयु।

² २) तुमु जाणतला के दुय दिहोन बादमा फासका तिवार से एने माणहोन पुरयु कुरुसोपोर चोडावीन मारावणेन कोरता दुस्मोनोन आथोमा दोरावणेन आपहे । ³ ३) तेतार बोगवानोन डायला पुजारा एने येहुदी माणहोन डायला पुडारया केयफा नावोन मुखी पुजारान गोरोन खोवीमा टुव्वाया ।

⁴ ४) एने तिंदरे तिंदरे चा होमचु लागडया की यीसु हेदोरीन मार नाखे ।

⁵ ५) पुण च्या कोयतोता इना तिवारोन दिहोमा आपु यीसुह नी दोरनु जोर आपु एहे कोरहु ते माणहोमा दोगु मात जायहे । ⁶ ६) तेतार यीसु बेतनिया मा सिमोनोन कुडयाव ने गोरमा ओतु ।

⁷ ७) तेतार एक बायी खुब मोगलो आतोर दोगडान हिहामालीन यीसु हाते आवी एने तेतार यीसु खातोतु एने च्यी यीसुन मुडोपोर मोगलो आतोर रेचवी देणी । ⁸ ८) यो देखीन यीसुन चेला खोताय गोया च्या तिनी बायीही फुस्या इतरो यो खुब मोगलो आतोर वायबार काहा नाख देणी ।

⁹ ९) जोर इना खुब मोगला आतोरोत मोगो बावोमा वेचीन गोरीबह पोयहा वाट देती ते । ¹⁰ १०) या काय वात कोरताला च्यो जाणीन यीसु तिनुह कोयु इनी बायीही काहा तुमु विताडतला यी ते मार कोरता हाजोन कोरली से ।

¹¹ ११) गोरीब माणहे ते तुमुहाते जोलमकाज रोयहे पुण मी तुमु हाते जोलमकु नी रोयो । ¹² १२) यी बायी मार डीलोपोर आतोर रेचवीन मी मोरनेन पेलुज मार दोडोह वोगे कोरनेन रीतीन तियारी कोरली से ।

¹³ १३) मी तुमुह खोराखोर कोयतलु काहरी बी इनी कोवीमा माणहे बोगवानोन हाजी खोराब पोरचार कोरतला च्याहरी च्या यी बायी कोरता काय कोरली एर कामोबेव नावलायहे तिनामा माणहे इनीही ओर कोरहोत । ¹⁴ १४) ओवतु येहुदास इस्करीयोत ज्यु बारा चेला मायलु एक चेलु ओतु च्यु बोगवानोन मोटला पुजारा पाहा जायीन कोयु।

¹⁵ १५) एने तिनुह फुस्या के जोर मी यीसुह तुमरा आथोमा दोराव देतु तेतार तुमु मेहे काय आपहे एने तेतार च्या तीनाहा तीस चोदीन बोदा आप्या ।

¹⁶ १६) ते दीही दोखु येहुदास इस्करीयोत यीसुह दोरावणेन सोदी हुदणे बाज गोयु। ¹⁷ १७) वीण जेवव्या लुरोन रुह खाणेन रीत ओतो फासका तीवारोन पेल्लु दिही चेला यीसुहाते आवीन फुसणे बाज गोया के तु का जातलु आमु तार कोरता फासका तीवारोन खाणो काहरी तियार कोरजे ।

¹⁸ १८) यीसु तिनुह कोयु तुमु सेहरोमा जावु एने एक माणुह तुमुह मीवायहे तीना माणहोह तुमु कोयजु गुरु कोयतलु बोगवान मार कोरता ताकुतु टेम आहनु से मी मार चेलानुह हाते फासका तिवारोन खाणो तार गोरमा खाण्यु से ।

¹⁹ १९) कोरीन चेला यीसु तिनुह जेहे कोयलु तेहेज फासका तीवारोन खाणो तियार कोरया । ²⁰ २०) हांजपोर ली वेवा यीसु तेरा बारा चेला हाते खाणो खाणे बोठरोयु ओतु ।

²¹ २१) तेतार च्या खाणे बाज रोया ओता तेतार यीसु तिनुह कोयु मी तुमुह खोराखोर कोयतलु तुमरा एक जोण मेहे दोकु दिन दोराव हे ।

²² २२) यो होंबीन चेला खुब नाराज ओय गोया एने आखा एकेक जोणवारु वारया यीसुह फुसणे बाज गोया ए पोरबु हासलीन च्यु दोरावणारु मीज से के । ²³ २३) यीसु तिनुह जोपाप आप्यु तुमरामा एक जोण ज्यु मार हाते वाटकामा रुटु बुडाडीन एवी खाणे बाज रोयहु च्युज दोकु दिन दोरावहे ।

²⁴ २४) काहाके जेहे तेर बारामा पोवित्र पुस्तोकोमा पेलेन लेखायले से तेहे माणहोन पुरयाहा यीसुह मोरनुज पोडहे पुण तिना माणहोन हाल कोतरी बेक्कार ओयहे ज्यु माणहोन पुरयाह दोकु दीन दोरावहे जोर च्यु पोयदा नी ओयतु ती बी हाजो रोयहे ।

²⁵ २५) तेतार तीनाहा दोरावणारु येहुदास कोयु ए गुरु काय च्यु मीज से के यीसु तिनाहा कोयु होव तुज कोय देल्लु । ²⁶ २६) जेतार च्या खातोता तेतार यीसु रुटु लीन बोगवानोह दोन्यावाद कोरयु ओवतु च्यु मुडीन चेलानुह आपीन कोयु यो तुमु लेवु एने खावु यो मार डील से । ²⁷ २७) ओवतु यीसु दोरकस्थान रुहोन पियालो लिन तेर कोरता बोगवानोन दोन्यावाद कोरीन चेला आपीन कोयु तुमु आखा इनाम दोखा पिवु ।

²⁸ २८) यो मार नोवला वायदान लुय से एने यो आखा माणहोन पापोन माफीन कोरता वोयाडनेवालु से ।

²⁹ २९) मी तुमु कोयतलु दोरकस्थान रुह तिनाहा दीही लोगोण नी पिव जाहा लोगोण मार बाबान राजोमा मी तुमु हाते नोवलु दोरकस्थान रुह फोसु नी पीव । ³⁰ ३०) ओवतु च्या बोजन गावीन जेयतुन बोयडापोर जाणे बाज गोया ।

³¹ ३१) तेतार यीसु तिनुह कोयु तुमु आखा आज राती मेहे सुडीन नाहा जाहोत काहाके बोगवानोन पुस्तकोमा यो लेखाय लो से मी मेडा बुकडान गुवाव्याहा मारीही एने मेडा बुकडान गोवारु वेरुसेर ओय जाहे ।

³² ३२) पुण मी जीवतु ओयीन ओवतु तुमु दोखु पेल गोलील जिलामा जायीही । ³³ ३३) यो होंबीन पोतरस यीसुह कोयु आखा तोहो सुड देहे पुण मी तोहो कोदीनी सुडो ।

³⁴ ३४) ओवतु यीसु पोतरसोहो कोयु मी तोहो खोराखोर कोयतलु आजुज राती कुकडु वाहणेन पेल तु मेहे तीन कावा मारु निकार कोरीन कोयहे के मी यीसुह नी उवोखतलु ।

³⁵ ३५) पुण पोतरस कोयु जोर मेहे तार हाते मोरनु पोडे ती बी मी तोहो कोदी निकार नी कोरो एने आखा चेलानु बी तिनाहा एहेज कोयणे बाज गोया। ³⁶ ३६) तेतार यीसु तेरा चेला हाते गोतसमनी नावोन एक जागामा गोयु ओवतु च्यु चेलानुह कोयु याहरीज तुमु बोठ रोयजु ताहा लोगोण मी पोरथना कोरोह । ³⁷ ३७) यीसु पोतरस एने जोबदीन दुय पुरया याकुब एने युहन्ना तेर हाते ली गोयु एने च्यु खुब दुखोमा नाराज आयणे बाज गोयु ।

³⁸ ३८) तेतार यीसु तिनुह कोयु मारु जीव दुखोमा खुब नाराज से जेहे मारु जीव निकोवतलुज लागेह याहरीज थाब रोयजु एने जागता रोयु । ³⁹ ३९) ओवतु यीसु थुडुक ओगोव गोयु दोरती पोर ओग मुय पोडीन पोरथना कोरयु हे मारा बाबा जोर ओय सोके ते यो दुखोन पीयालो मार हाते दोखो सेटु कोर देजी ती बी मारी मोरजी नी पुण तारीज मोरजी पुरी ओयणे दे।

⁴⁰ ४०) ओवतु यीसु पोरथना कोरीन नोवरायीन फोसू तिना चेलानु हाते गोयु एने तिनुह हुवतला काय तुमुह मार हाते एकताव बी नी जागाये के ।

⁴¹ ४१) जागता रोयीन पोरथना कोरता रोयु तुमु फारकोमा नी पोडनु जुवे आत्मा तियार से पुण डील ते कोमजुर से। ⁴² ४२) फोसु दुसरीवार जायीन एहे पोरथना कोरयु ए बाबा जोर यो दुखोन पियालो मी पिह तेतारुज टोवे ते तारिज मोरजी पुरी ओयणे दे।

⁴³ ४३) फोसु च्यु चेला हाते गोयु एने तिनुह हुवतलाज सापडाव्यु काहाके तीदरा डुवा खुब निदवायला ओता ।

⁴⁴ ४४) ओवतु च्यु फोसु तीनुह सुडीन तीसरी वार पोरथना कोरने गोयु एने जेहे पेल पोरथना कोरलु तेहेज पोरथना कोरयु। ⁴⁵ ४५) ओवतु च्यु फोसु तेर चेला हाते आवीन च्यु तीनुह कोयु काय तुमु उजु लोगोण हुवतला एने आराम कोरतला के देखु माणहोन पुरयु पापी माणहोन आथोमा दोरावणेन टेम आव लागलु से ।

⁴⁶ ४६) उठु आपु जाता देखु मेहे दोकुदीन दोरावणारु हाते आवणे बाज रोयुह । ⁴⁷ ४७) यीसु तेर चेलानुह यो कोय तोतु तेतारुज बारा चेला मायलु येहुदास च्याहरी आथु एने तेर हाते डायला पुजारा एने येहुदास डायला पुडारया हाते वारुज माणहोन गोरदी तोलवारे एने डेगारा लिन आव्या ।

⁴⁸ ४८) यीसुह दोरावणारु येहुदास तिनुहा निस्याणी कोरीन पेलेन कोयलु ओतु के मी जिनाहा गुवु दिही च्युज यीसु से तिनाहा दोर लेजु । ⁴⁹ ४९) ओवतु येहुदास यीसु हाते आवीन ए गुरु कोयीन यीसुह गुवु देदु ।

⁵⁰ ५०) यीसु तिनाहा कोयु ए दुस्ती ज्यो कोरने आवलु च्यो कोर ले तेतार च्या यीसु हाते आव्या एने यीसुह दोर लेदया । ⁵¹ ५१) यीसुह दोरताज यीसुन हातिहो मायलु एक जोण तोलवार काडीन मुखी पुजारान पावरोन जाटकु दिन कान्टो तुड देल्लु ।

⁵² ५२) तेतार यीसु तिनाहा कोयु तोलवारोह मियानमा फोसी मेक ज्या तोलवार कोरीन दिहरी माणहोह जाटकावे ते च्या तोलवार कोरीन मोरहे ।

⁵³ ५३) काय तु नी जाणतलु के जोर मार बाबाह मी रावव्या कोरीह ते च्यु बारा टुवान टुवा सोरगदुतो दोखा बी जास्ती मेहे वाचाडनेन कोरता मुकली देहे ।

⁵⁴ ५४) पुण जोर मी एहे कोरतु ते यो ओहलोज ओयणु जोरुडी से कोरीन पोवित्र पुस्तोकोमा लेखायली च्या वात केहेक पुरी ओयहे । ⁵⁵ ५५) ओवतु यीसु ज्या तिनाहा दोरने आवला तीनु माणहोह कोयु तुमु मेहे चुटु माणुह सोमजिन तोलवारे एने डेगारा लीन दोरने काहा आव रोयाहा मी ते दाडीन मोदिरोमा तुमरे हाते रोयीन वातु हिकाडतोतु तेतार तुमु मेहे काहा नी दोरया । ⁵⁶ ५६) पुण पोवित्र पुस्तोकोमा बोविस्य कोयणारा लेख रोयाहा च्यो पुरो आयणेन कोरता यो आखो ओयलो से ओवता यीसुन आखा चेला तिनाहा सुडीन नाहा गोया । ⁵⁷ ५७) एने ज्या माणहे यीसुह दोरया च्या तिनाहा बोगवानोन मुखी पुजारा केयफान गोर ली गोया च्यांहरी येहुदीन नेम हिकाडनारा एने दिहरा डायला पुडारया टुव्वाय रोया ओता ।

⁵⁸ ५८) एने पोतरस वारुज सेटे यीसुन फोसोव फोसोव बोगवानोन डायला पुडारया गोरोन खोविमा लोगोण गोयु यीसु हाते कोयलु ओयलो च्या बावणेन कोरता च्यु राखवावी कोरनारा हाते जायीन बोठ गोयु। ⁵⁹ ५९) मोटला पुजारा एने दिहरा येहुदिन पुजारान आखा यहुदिन पोचुन आखा माणहे यीसुन वीरुदमा वाको काडीन यीसुह मारने कोरता ठोग पुराव हुतोता । ⁶⁰ ६०) पुण वारुज माणहे ओगोव आविन यीसुन बारामा ठोग पुरावु आपीन मी यीसुन वीरुद तीनुह कायीज पुरावु नी सापडयु तिनामा च्या तीनाहा मार नी सोकया पुण सेवलीवार दुय जोणे ओगोव आवीन कोयणे बाज गोया ।

⁶¹ ६१) यु माणुह एहे कोयलु के मी बोगवानोन मोदोरोह वेसडी दिह एने तीन दीहोमा फोसु बांद दिही । ⁶² ६२) तेतार बोगवानोन डायलु पुजारु आखान ओगोव उबरोयीन यीसुह फुस्यु या माणहे तार विरुद्ध पुरावु आपतलु तु कायीज नी कोयतु के ।

⁶³ ६३) पुण यीसु ठावकुज रोयु फोसु बोगवानोन मोटलो पुजारु यीसुह फुस्यु मी तोहो जीवतला बोगवानोन नावोमा आण गालीन फुसतलु बोगवानोन पुरयु मसीह तु से के आमुह कोय दे ।

⁶⁴ ६४) तेतार यीसु तिनुह कोयु होव तु जेहे कोयलु तेहेज से एने आवलु दिहोमा तुमु माणहोन पुरयाहा आखी ताकोतवावा बोगवानोन जेवडीखेर रोयलु देख होत एने फोसु सोर गोन वादवापोर आवत लुन देख होत । ⁶⁵ ६५) यीसुन वात होंबोवताज बोगवानोन मोटलु पुजारु सोतापोमा सोतान लुगडा फाडीन कोयु यु माणुह।

⁶⁶ ६६) तेत्यार च्या माणहोह फुस्या इनाहाते काय कोरने तुमरो आखान विचार से च्या जोपाप आपया यु मोतोन डोंड जुडनेन लायक से । ⁶⁷ ६७) तेतार थुडाक मानहे यीसुन मुयोपोर थुकया एने तीनाहा दुमाडया एने थुडाक माणहे तीनाहा थापडाटया ।

⁶⁸ ६८) ए मोसी आमुह बोविस्य कोयदे तोहो कुण देल्लु। ⁶⁹ ६९) पोतरस खोवीमा बारये बोठ रयु अतु तेतार एक काम कोरनारी सुरी पोतरस हाते आवीन कोयी तु बी ते गोलीलवावा यीसु हातेज ओतु ने ।

⁷⁰ ७०) यो होंबीन पोतरस च्याहरी ओता आखा माणहोन ओगोव यो कोयीन निकार कोरयु तु काय कोयतली च्यो मी नी जाणतलु । ⁷¹ ७१) एहे कोयीन पोतरस खोवीमा दोखु उठीन जुपा हाते गोयु जुपान जागे दिहरी काम कोरनारी सुरी तीनाहा देखी च्यी च्यांहरी ओती तीनु माणहोह कोयी यु माणुह बी ते नाजतवावा यीसु हाते ओतु।

⁷² ७२) यो होंबीन पोतरस फोसु सोप्पोत खायीन कोयु इन माणहोह काय नि उवकतलु । ⁷³ ७३) यो होंबीन च्यांहरी उबरोय रोया ओता थुडाक माणहे पोतरसो हाते आव्या एने कोया हासलिन तु बी यीशु न चेला मायलु एक से काहाके तार बुली दोखा आमु सोमजी गोया के तु गोलील वावु से ।

⁷⁴ ७४) तेतार पोतरस मी तीनाहा जाणतलु बी नी कोयीन सोपत खाणे बाज गोयु मी तिना माणहोह नी जाणतलु तेतारु ज कुकडु वाह देदु ।

⁷⁵ ७५) तेतार पोतरसोह यीसु पेलेन कोयलु च्यी वात और आवी के कुकडु वाहणेन पेल तु मेहे तीना वाट निकार कोरहे एने च्यु बारथे जायीन ओर कोर कोरीन टुहकी टुहकीन रोडने बाज गोयु ।