¹ १) यीसु मोंदीरोमा दोखु बारथै जातोतु तेर चेला मोदीरोमा रचना देखाडणे कोरीन तीना हाते आव्या । ² २) यीसु तिनुह कोयु काय तुमु यो आखो नी देखतला ने मी तुमुह खोराखोर याहरी एक दोगडापोर एक दोगडु बी नी रोये । ³ ३) एने जेतार यीसु जेयतुन बोयडापोर बोठ रोयु ओतु तेतार तेरा चेला तिनाहाते ठावकाज आविन तिनाहा फुसया आमुह कोयजी यी वात केतार ओयहे एने तारो आवणेन एने कोवीन आखरीम काय निस्यानी रोयहे ।

⁴ ४) यीसु तिनुह कोयु सोमावीन रोयजु एने कुण बी तुमुह दोकु नी देणु जुवे ।

⁵ ५) काहाके खुब से ओहला रोयहे ज्या नावोमा आवीन कोयहे मी मोसी से एने होटा माणहोह फोसाडहे । ⁶ ६) तुमु जोगडा एने बारामा खोबर होबोवहे तेतार तुमु गाबराता जुण यो आखो जोरुड आयहेज पुण च्यु कोविन होरनेम टेम निबे ।

⁷ ७) काहाके एक जातीन माणहे दिहरी जातिन माणहोह वीरुद मा जोगडु एने एक राजवाडान माणहोन विरुद्ध दीहरा राजवाडान माणहे युदय कोरहे एने दुनियान खुब जागे काव पोडहे एने खुब जागामा दोरती आलीन दोदडी पोडहे ⁸ ८) यो आखो आवणे वाली पीडान सुरुवात से । ⁹ ९) तेतार च्या तुमुह खुब सोताडनेन कोरता दोरावहे एने मारीन बी नाखाहे तुमु मार नावो पोर बुरहु कोरतला कोरीन आखी जातीन माणहे तुमुह खोर राखाहे । ¹⁰ १०) तेतार खुब होंटा माणहे तिदरु बुरहु सुड देहे एने एक दिहराह दोरावहे एने एक दिहराह खोर राखहे । ¹¹ ११) वारुज होंटा ठोग बोविस्य कोयणारा आवहे एने खुब माणहोह फोसाडहे । ¹² १२) माणहोन पाप बोडनेमा खुब माणहोन मोंग ठोडो ओय जाहे ।

¹³ १३) पुण ज्यु आखरी लोगोण दिरोज दोरहे च्युज वाचहे ।

¹⁴ १४) एने बोगवानोन राजोन बारामा हाजी खोबोर आखी कोविमा पोरचार ओय जाहे एने आखी जातीनुह पोर गोवायी ओय तेतार आखरी दिही आव लागहे । ¹⁵ १५) कोरीन जेतार तुमु तिनी वीटवाडानारा चिजोह देखहोत तेरी वातु दानियेल बोविस्य कोयणारु कोयु पोवित्र जागा मा उबरोयली देखहोत । ¹⁶ १६) तेतार ज्या येहुदिया मा से च्या बोयडाखेर नाहा जायहे ।

¹⁷ १७) ज्यु कुण गोरोन सोतोपोर रोये च्यु काय बिलेणे सोतोपोर दोखु तेर गोरमा नी जाणु जुवे। ¹⁸ १८) एने ज्यु कुण खेतोमा काम कोरतलु च्यु बोदलनेन लुगडा लेणेन कोरता फोसु तेर गोरमा जाणु नी जुवे। ¹⁹ १९) तीनु दिहोमा उगवी रोयली एने दाय खावाडणारा बायराहा खुब काठो ।

²⁰ २०) एने पोरथना कोरु के तुमुह हियावान दिही ने ते आरामोन दिही तुमुह नाहणु नी पोडे । ²¹ २१) काहाके तिने टेमे ओहली खोतोरनाक पीडा रोयहे बोगवान कोवी गोडलु तेरी दोखी एवी लोगोण ओहली पीडा कोदी नी ओयी एने उजु कोदी नी ओय। ²² २२) जोर बोगवान च्या खोतरनाक दिहे कोम नी कोरतु तेतार कुण बी नी वाचता पुण बोगवान जिनुह निवाडलु से तिदरे कोरता पीडान दिहे कोम कोरलु से। ²³ २३) तिने टेमे जोर एकदो तुमुह कोये देखु मोसी याहरी से नी ते च्यु च्यांहरी से पुण तुमु बुरहु जुण कोरता। ²⁴ २४) काहाके ठोगरया मोसी एने ठोगरया बोविस्य कोयणारा निकोवहोत एने मा निस्णीया एने चोमत्कार देखा डोहत पुण च्या निवाडला माणहोह बी फोसाड देहे । ²⁵ २५) देखु मी पेलु दोखु तुमुह यो आखो कोय देल्लु से । ²⁶ २६) कोरीन जोर च्या तुमुह कोयहे देखु च्यु उजाडी जागामा से तेतार च्याहरी जुण जाता नी ते दुखु च्यु गोरमा से एहे कोयहे तेतार बुरहु जुण कोरता । ²⁷ २७) काहाके जेहे उगोवणीखेर दोखी दिही बुडोवणीखेर लोगोण वीज वीजोलतली तेहेज माणहोन पुरया आखा माणहोन देखाय पोडहे ।

²⁸ २८) ज्याहरी दोड रोयहे च्याहरी ए मोटला गुवडा बी टुवु ओयहे । ²⁹ २९) लोगेज तिना दिहोन पीडान बादमा दिही आंदारलु ओय जाहे एने चांद उज्यावो नी आपे एने बोगवान सोरग मायला तारा पोड देहे एने सोरगोन आखी ताकोतोहो आलोवहे । ³⁰ ३०) तिने टेमे सोरगोमा दोखो माणहोन पुरयु उतोरनेन निस्यानी देखाय पोडहे तेतार दोरती पोरलो आखी जातीन माणहे नेवती नेवतीन रोडहे एने च्या माणहोन पुरयाहा खुब ताकोत एने मोहिमा हाते सोरगोन वादवापोर आवतलु देखहोत । ³¹ ३१) जेतार पेपारया वाजान मोटलु आवाज होबायहे तेतार माणहोन पुरयु तेर सोरगदुतोनुह मुकोलहे एने च्या दोरतीन एकखेर दोखा वादवान दीहरीखेर लोगोण च्यार दिसा दोखा बोगवान जिनुह निवाडलु तिनुह टुवु कोरहोत । ³² ३२) यी उबरोन जाडो दोखा एक दाखलु हिकु जेतार डिरा फुटणे बाज जातला एने तेर डावी कुवोव्वी ओय जातली एने पान्टा निकोवणे बाज जातला ते उनावु आवणेमाज से कोरीन तुमु जाण लेतला । ³³ ३३) इने रिते जेतार मी कोयलु यी आखी वातपुरी ओयतली देखहोत तेतार तुमु जाण लेजु के माणहोन पुरयु जुपा हाते आव रोयुह । ³⁴ ३४) मी तुमुह खोराखोर कोयतलु के जाहालोगोण मी कायलु यी आखी वात पुरी नी ओय ताहा लोगोण इनी पीडीन माणहे नी मोरे ।

³⁵ ३५) सोरग एने दोरती नास ओय जाहे पुण मारी वात कोदी नी नास ओये । ³⁶ ३६) च्यु दिही एने च्यु टेम ने बारामा कुनीज नी जाणतला नी सोरगदुते एने माणहोन पुरयु बाह बोगवान ओतरुज जाणतलु । ³⁷ ३७) जेहे नुहान टेमोमा ओयलो तेहेज मगणहोन पुरयु आवहे तिने टेम बी आयहे । ³⁸ ३८) काहके मुसोवदार पाणी आवणेन पेल जेदिह लोगोण नुहु जाहाजोमा नी बोरायु ते दिही लोगोण माणहे खातोता एने पितोता एने एक दिहरान वियाव बी कोरतोता । ³⁹ ३९) एने मुसोवदार पाणी आविन आखा माणहोन वोयाडीन ली गोयु ताहा लोगोण तीनुह कायीज सोमजमा नी पोडयो माणहोन पुरयु आवहे तिने टेमे बी ओहलोज ओयहे । ⁴⁰ ४०) तिने टेमे दुय जोणे खेतोमा एखठाज काम कोरता रोयहे तिना मायलु एक जोण चुटाय जाहे एने दीहरु सुडनेमा आवहे ।

⁴¹ ४१) दुय बायरा गोटटीमा दाणा बोयोडता रोयहे तीनु मायलु एक चुटाय जाहे एने दिहरी सुडनेमा आवहे।

⁴² ४२) कोरीन तुमु जागता रोयजु काहाके तुमुह मालुम निबे के केतार तुमरु पोरबू आवहे । ⁴³ ४३) पुण तुमु यी वात सोमजी लेवु के गोर मालकोह मालुम रोयतो ते च्यु चुटटु केतार आवहे ते च्यु जागतु रोयतु एने तेर गोरमा चुरी ओयणे नी देये ।

⁴⁴ ४४) कोरीन तुमु बी तियारीमा रोयजु काहाके जीने टेमे तुमु विचार बी नी कोरे तिने टेमे माणहोन पुरयु आव लागहे । ⁴⁵ ४५) एने च्यु इमानदार एने ओक्कोल वावु पावर कुण से जीनाहा मालक तेर गोरोन आखा पावरोनुह राखवावी कोरनेन एने टेमो पोर तीनुह खाणो आपणेन काम आथोमा होपहे । ⁴⁶ ४६) किसमत वालु से च्यु पावर तिनहा तेरु मालक फोस आवीन तेरो पावरोह हाजो काम कोरतलु देख पाडे ते । ⁴⁷ ४७) मी तुमुह खोराखोर कोयतलु के मालक तेर आखा मालदोनोपोर तिनाहा मुखी दोरावहे । ⁴⁸ ४८) पुण जोर पावोर खोराब काम कोरे एने एहे तेर मोनमा विचार कोरे मारु मालक जोलदी नी आवे । ⁴⁹ ४९) एने तेर हातीत गुलाम पावरोनुह देणे एने दारकुटया हाते खाणे पिणे बाज जाहे । ⁵⁰ ५०) ओवतु तिना पावरोह मालक के दीह एने के तार आवहे एने वाट जुवीन नी रोये तिने टेमे मालक आव लागहे ।

⁵¹ ५१) तेतार च्यु मालक तीनाहा खोतरनाक डोंड आपहे एने डोगडा कोरनारा हाते बेसकी एने च्याहरी च्या डोवो डोवो रोडहे एने दाते कीकडावता रोयहे।