2 आपहु बाह बोगवान,एने पोरबु येसु मोसी खेर देखी सुख एने सांती तुमु आखाह जुडती रोये। 3 आपपु पोरबु येसु मोसीन बाह बोगवानोह आपु दोन्यवाद कोरहु ,काहाके आपु येसु मोसी हाते एखठा रोयतला कोरीन,च्या आपुह जीव आत्मान जीवायमा आखी बावीन सोरगोन आसीरवाद आप रोयुह ।
4 बोगवान तेर नोजरोमा आपुह पोवित्र एने बीगुर गुनावाला बोणावणेन कोरता कोवी गोडायणेन पेलेन येसु मोसीन कोरता,च्यु आपहु मोंग कोरीन नीवाड रोयुह। 5 बोगवानोन पेलेन मोरजी ओती के येसु मोसी आपुह मोंग कोरलु एने आपणे कोरता मरलु तीनामाज बोगवान आपुह तेर सोतान खुवे लेदला पुरया बोणावणेन नोक्की कोरलु यीज तेरी मोरजी एने एहें कोरनु तीनाह हाजो लागतोतो।
6 बोगवान तेर लाडकु पुरयु येसु मोसीह लागाडीन आपु आखानुह तेर पुरया बोणावतलु कोरीन आपु तेरी मोहीमान दोयान कोरता बोडायी कोरहु। 7 काहाके येसु मोसीन लुयी कोरीन आपणा पापो दोखा आपु वाच गोयला से,एने आपणा आखा पापे माफ ओय गोयला से,बोगवानोन खुब मोटली दोयान मालदोन दोखो यु जुडलो से।
8 एंहे कोरीन वाचाडीन बोगवान आपु पोर कोतरी मोटी कुरपा देखाडलु । 9 बोगवान खुब ओक्कोलवावु एने आखो जाणनारु से,कोरीन ज्यो काय च्यु बजट लागाडलु ,च्यो आखो करणे से,एने बोगवान येसु मोसीन लागाडीन ज्यो काय पूरो कोरणे पेलेन बोजोट लागाडलु ,तीनी लीकायली वातोह आपुह देखाड देल्लु ।
10 बोराबोर टेमे बोगवान सोरग एने दोरती पोरली आखा चिजोह एखठा कोरीन येसु मोसीन आदीकारमा लावहे ,युज बोगवानोन बजट से। 11 ओवी,येसु मोसी हाते आपणो नातो बोण गोयलो,कोरीन बोगवान आपुह तेर वारीस बोणाव देल्लु,काहाके आखा चिजे गोडायणेन पेलेन च्यु आपुह नीवाड रोयुह ,एने आखा कामे तेर बजट दोखु पुरी कोरतलु।
12 बोगवानोन मोरजी ओती के आमु येहुदी माणहे पेल मोसी पोर बुरहु कोरनु,एने तेरो गुण गावणु एने मोहीमा कोरनु। 13 एने तुमु बीगुर यहुदी जाती वावा बी एंवी हाजी खोबोरोन खोरी वात मोंजे बोगवान तुमुह वाचाडतलु यी हाजी खोबोर होंबीन तुमु येसु मोसी पोर बुरहु कोरला,कोरीन खुब सालोन पेल बोगवान वायदु कोरलु ओतु ,च्यी पोवित्र जीव आत्मा तुमुह आपीन मोसीहोह लागाडीन च्यु तुमुह तेर सोतान माणहे बणनेन सीक्कु लागाड देल्लु ।
14 कोरीन पोवित्र जीव आत्मा बोगवानोन बुरहु से,के च्यु आपुह वायदु कोरलु ओतु, च्यो आखो आपुह खोरखोर आपहेज ,आपु पोर पोवित्र जीव आत्मान सीक्कु मोंजे,बोगवान आपुह सुटकारु आपीन तेरा सोतान माणहे बोणावणेन कोरता,आपुह पेलेन वाचाडी ली लेदलु से,यी वात पोक्की कोर देतलु के च्यु आपुह तेर हाते लावहे ,बोगवान ज्यु होज आपुह आपणेन वायदु करलु से, च्यु होक आपहु जुडहेज ,एंहे कोरीन तेरी मोहीमा एने इस्तुती कोरणेन कोरता ,एक सोंदी से। 15 तीनामा पोरबु येसु पोरलु तुमरु बुरहु एने पोवित्र माणहो पोरलो तुमरो मोंग यो होंबीन ।
16 तुमरे कोरता बोगवानोह मी दोन्यवाद कारतलु, एने मार पोरथना मा तुमुह ओर करतु जायीन पोरथना करतलु। 17 तुमुह आत्मान जीवायमा ओक्कोल एने सोमज आपणु जुवे ,कोरीन मी आपणा पोरबु येसु मोसीन मोहीमान बाह बोगवानोह ,पोरथना करतलु तेतार तुमु बोगवानोह जाणनेमा वोडता जाहोत ।
18 तेतार बोगवान काल्ली आशान कोरता तुमुह बुलाड रोयुह ,च्यो तुमरो मोन उज्यावा दोखो बोराय जाय,एने तेर पोवित्र माणहोह आपणे वायदु कोरीन मेक रोयुह ,च्यो मोहीमान होकोन मालदोन कोतरा होंटो से,कोरीन मी तुमरे कोरता पोरथना करतलु। 19 ज्या माणहे येसु पोर बुरहु कोरतला तीनुह मोदोत कोरनारी बोगवानोन सोक्ती ज्यी आपणा सोब्द दोखा आपु सोमजाड नी सोके तीनी सोक्तीह तुमु समजणु जुवे,कोरीन मी पोरथना करतलु।
20 च्यी सोक्ती यीसु मोसीह मोरलाम दोखी जीवती कोरली ,एंने सोरगोमा बोगवानोन जेवडीखेर खुब बोडायी ओये ओहला जागापोर तीनाह बोठाडली से।
21 सोरगोन राज कोरनारापोर होक जोमाडनारा ती ,एने पुडारयापोर एंवीन कोवीन पुडारी माणहो पोर ,एने एकेक नावो पोर आवणे वाला कोवीन पुडारी मात हतों पोर बी बोगवान येसु मोसीहोह खुब बोडायी ओये, ओहला जागापोर बोठाड रोयुह। 22 एने बोगवान आखी कोवी यीसुन पायान नेचु मेक देल्लु ,एने यीसु मोसीहोह आखा चिजो पोर राज कोरनेन मुखी बोणाव देल्लु ,एने बोगवानोन मोंडलीन कोरता तीनाह मुंडकान होस मुखी बोणाव रोयुह ।
23 मोंडलीु येसु मोसीन डीलोन होस से, एने मोसी दोखी मोंडलीन माणहो तेर सोकती पुरीन पुरी पाक्को कोर देतली ,एने मोसीज आखा जागान आखा चीजोनुह जीवाय आपनारु से आखो पुरो कोरनारु से,च्युज से।