¹ Neci,ngasi mudahwa mukulu ali murhole omu bantu,ayimikwa mpu akasengerera abantu omu biyerekire Nnamahanga,anarhule entulo n'enterekero oku byaha. ² Anahashifira abahwinja n'abahabusire olukogo,bulya naye yene agosirwe n'obuzamba. ³ Okwo kwo kurhuma arhegesirwe arherekere enterekero oku byaha byage yene nk'oku ajira oku byaha byolubaga. ⁴ Ntaye ociha obwo bukuze yene.bunywesi,omuntu ahamagalwa na Nnamahanga,nkakulya ahamagalaga Aroni. ⁵ Kwo na kwo,arhali Kristu yene wacijiraga mudahwa mukulu ciolya wamubwiraga, "We Mugala wani,nie nakuburhaga ene." ⁶ Nkakulya adesire ahandi erhi: "Oli mudahwa w'ensiku n'amango aka Melikisedeki." ⁷ Ye omukarhi k'ensiku ajiri omu mubiri,arhula ensegero n'emingingo omu kuyama bwenene n'omu kurhoza emirenge,erhi ashenga Nnamahanga wali ohashire okumufumya oku lufu.Ayunvibwa erhi oku bukenge bwage burhuma. ⁸ N'obwo ali mwene Nnamahanga ayiga oburhumisi omu malumwa abwine. ⁹ N'erhi ayusiba mwimana,ahinduka imerero ly'obucire bw'ensiku n'amango kuli balya boshi bamuyunva. ¹⁰ Bulya Nnamahanga adesire oku ye mudahwa mukulu aka Melikisedeki. ¹¹ Kuli okwo rhugwerhe binji rhwankaderha kuli Yesu,ci okubihugula kuli kuzibu bulya muli bihwinja b'okuyunva. ¹² N'obwo kurhenga mira mwe mwankabire bayigiriza,mwabo mukolaga kandi mulangalire oku nyigirizo z'omurhondero gw'ebinwa bya Nnamahanga.Mwahika aha mwacifinja amonka ahali h'ebiryo bizibu! ¹³ Kwo binali ngasi yeshi wacilonza amonka arhankanunirwa n'enyigirizo z'obushinganyanya,bulya aciri kabonjo. ¹⁴ Ci abimana bohe ebiryo byabo bba biryo bizibu.Balya bakomerize obwenge bwabo okumanya ecinja n'ecibi.