¹ Cici Omuyahudi alushinekwo? erhi kandi buguke buci okukembulwa kumulerera? ² Bwinji bwenene na bwangasi lubero.Burhanzi,bo Nnamahanga arhanziribisa ebinwa byage. ³ Ewe akaba baguma muli bo bahindusire ndyalya,k'obulyalya bwabo bwankarhuma Nnamahanga arhajira ebi alaganaga? ⁴ Rhuyishi oku Nnamahanga arhanywera,ciru n'ehitya,Ci Nnamahanga omukuli abali,ci ngasi muntu kujalira ajalira.Nkoku bibabiyandisirwe, "Ly'oyera omu binwa byawe,onayaze abakuheka lubanja." ⁵ Ci akaba obubi bwirhu buyerekana obu shinganyanya bwa Nnamahanga kurhi rhwaderhaga? (Naderha nka kula abantu baderha). ⁶ Ciru n'ehitya!Acibaga ntyo kurhigi Nnamahanga ali ayishitwa olubanja lw'igulu? ⁷ Ci akaba obunywesi bwani buyerekana irenge lya Nnamahanga omu kumyisa oku ye Nnamuderha_Okuli cankacirhuma ngajirwa omu banya byaha? ⁸ Erhi kandi nkoku baguma barhuhambara,cankarhuma rhurhajira amabi lyo aminja garhengamwo? Aba bene abo bakwanine obuhane. ⁹ Kurhigi birigi? Ka rhulushine? Ciru n'ehitya.Bulya rhwadesire nti Abayahudi n'Abgriki bali banya_byaha boshi, ¹⁰ nkoku biyandisirwe,mpu: "Nta muntu mwimana ntaye ciru n'omuguma. ¹¹ Nta murhimanya,ntaye olonza Nnamahanga. ¹² Boshi bali mihabuka,boshi bahindusire babi kuguma.Nta muntu ojira aminja, nanga,ciru n'omuguma. ¹³ Omumiro gwabo eri ncinda eyashamire.Endimi zabo ziyunjwire bulyalya.Marhi ga nkubojoka gababa omu kanwa. ¹⁴ N'akanwa kabo kayunwire obuheherere n'obukali. ¹⁵ Amagulu gabo gaba duba oku gendibulaga omuko. ¹⁶ Ahabagera biguka bahasiga n'obuhanya. ¹⁷ Enjira y'omurhula barhayiyishi. ¹⁸ Okuyoboha Nnamahanga kurhababa ebusu." ¹⁹ Rhurhanahabiri oku ebiba omu ndagano ya mira byoshi biyerekire ababihabagwa,lyo ngasi kanwa kahulika,lyo na ngasi muntu abona oku ali mubi embere za Nnamahanga. ²⁰ Bulya embere zage nta muntu ciru n'omuguma wayere mpu okwenge ashimbire amarhegeko,kulya kuba nta cindi amarhegeko gajira okurhali kumyisa ebyaha. ²¹ Ci buno lero,buzira irhegeko Nnamahanga ayerekine obwimana bwage buhamirizibwa n'irhegeko n'Abalebi. ²² Obwo bwimana bwa Nnamahanga buhabwa abayemera Yesu Kristu.Buhabwa abemezi boshi bulya nta lubero. ²³ Boshi abajizire ebyaha baheza irenge lya Nnamahanga, ²⁴ na kandi boshi bajizirwe beru_kweru n'engalo y'olukogo lwage erhi bucunguzi buli muli Yesu Kristu burhuma. ²⁵ Ye Nnahanga acishozire mpu abe nterekero y'okulyula ebyaha n'omuko gwage erhi bwemere burhma.Na ntyo ayerekana obwimana bwage omu kurhubabalira ebyaha bya mira. ²⁶ Amango Nnamahanga ali atuzire,analonza okuyerekana obwimana bwage mwo gano mango,lyo aba muciza anacize ngasi oyemire Yesu. ²⁷ Cicirhuma omuntu acikuza? Ntaco.Irhegeko lihi lirhumire ciba ntaco? Ka lya bijiro? Nanga,ci irhegeko lya bwemere. ²⁸ Bulya rhumanyire oku omuntu ajirwa kweru_kweru n'obuyemere buzira bijiro bya marhegeko. ²⁹ Ewe ka Nnamahanga akolaga Nnamahanga wa Bayahudi bone? K'arhacirigi w'agandi mashanja goki? Neci,ali wagndi mashanja nago. ³⁰ Bulya Nnamahanga aba muguma yenene,ye wacizize abakembule na barhali bakembule erhi bwemere burhuma. ³¹ Ka rhwamakundula amarhegeko erhi bwemere burhuma? Kunywera! Ciru rhuzibuhize amarhegeko erhikwo.