¹ Paulo,mukozi wa Yesu Kristu,wahamagalagwa mpu abe ntumwa,aberulwa mpu amanyise emyanzi ya kalembe ka Nnamahanga. ² Eyo myanzi yakalembe alanganyagya kurhenga mira omu kanwa kabalebi bage omu mandiko matakatifu. ³ Eyerekire Mugala wage w'omubuko bw'omulala gwa Daudi oku ma burwa g'omu biri. ⁴ Erhi afuka omu bafire ayerekana oku anali Mugala wa Nnamahanga ogwerhe obuhashe bunene bwakuli Muka Mutakatifu,ye Nnawirhu Yesu Kristu. ⁵ Ye warhushobozagya olukogo anarhujira ntumwa mpu rhuyingirize abanyu b'amashanja goshi, oku muyemera n'okumuyunva,lyo izino lyage lija irenge. ⁶ Ninyu muli ba muli bo,mwe muhamagirwe na Yesu Kristu. ⁷ Mwe barhonyi ba Nnamahanga muli e roma mwe muhamagirwe mpu mube batakatifu,kuli mwe engalo n'omurhula gwa Larha Nnamahanga na Nnahano Yesu Kristu. ⁸ Burhanzi nvuzire Nnamahanga omukwa muli Yesu Kristu erhi mwe murhuma mweshi,bulya obwemere bwinyu bwadesirwe omw'igulu lyoshi. ⁹ Neci,Nnamahanga yenene,oyu nkolera n'omurhima gwani goshi nka naderha Emyanzi y'akalembe y'omugala,amanyire oku ntahusa okumukengera. ¹⁰ N'okushenga nkasi kashanzi omu nsengero zani nti nbone lero amango minja g'okuhika emwinyu akaba Nnamahanga alonzize. ¹¹ Bulya bwenene nnonza okumubona lyomuhabwa oku nshokano yo bunya_muka y'okumuzibuhya. ¹² Bulya,nbona okunahana haguma nanyi omurhima,mw'oyo nani omu bwere bwirhu rweshi. ¹³ Bene wirhu ntakalonza okumufulika,oku nakagilalira kanji_kanji okuhika emwinyu,(ci kuhika buno ebihanzo bicihali),lyo mpabwa amalehe ginyu nka agapabwa emwa abantu b'agandi mashanja. ¹⁴ Ndi mwenda gw'Abagriki nk'oku ndi wa bashenzi,ndi w'abasomi n'owabahwinja. ¹⁵ Nkwoku,okulunda lwani,ndi duba okuyigiriza emyanzi y'akalembe emwabali e Roma kwonoko. ¹⁶ Bulya Emyanzi y'akalembe nta yibonera nshonyi,bulya buli buhashe bwa Nnamahanga ociza ngasi mwemezi,burhanzi Omuyahudi,kandi Omugriki. ¹⁷ Bulyala obushinganyanya bwa Nnamahanga burhenga omu bwemere bunakomeze obwemere,nkakulya biyandisirwe,mpu: "Omushinganyanya alama oku bwemere." ¹⁸ Bulyala kurhenga empingu Nnamahanga ayerekana obukunizi bwage oku ngasi bubi na ngasi bulyalya bw'abantu bahindula obushinganyanya bwa Nnamahanga buja bw'obulyalya bwabo. ¹⁹ Bulya ebya nkamanyibwa bya Nnamahanga,babimanyire.Na Nnamahanga yenene abayeresire byo. ²⁰ Bulyala emyanzi yage erhabonekana,kurhenga oku bubwa kw'igulu ya bonezire n'obwalagale,ya namanyikana oku mikolo yage kuhika obuhashe bwage bwa amango na mango n'obu Nnamahanga bwage,co cirhumire barhankaberwa bwonjo. ²¹ Kulya kuba bamanyire Nnamahanga barhamukuzagya nka Nnamahanga barhanamuvugaga omunkwa.Nantya,baba basire omu ntimanyo zabo,n'emirhima yabo yaba buzirha bumanye yaja mw'omwizizi. ²² Mpu bayengeha,kwashuba kuhwinjagala. ²³ Erhi bahika aho bahindula irenge lya Nnamahanga orhankafa nshushano za muntu cibolereza,n'ez'orhunyunyi,n'ez'esimba zigendera oku magulu ani n'ezigendera oku nda. ²⁴ Co carhumire Nnamahanga abaleka omu kushimba enyifinjo z'omurhima gwabo.kuhika basheregezanya olukengwa lw'emibiri yabo. ²⁵ Bulyaira bahindamwire okuli kwa Nnamahanga oku bunywesi,bacikumba n'okukolera eciremwa kurhaluka owaciremaga,omugishe ensiku n'amango,Amen. ²⁶ Okwo kwa rhuma Nnamahanga abakabilira omu irhala libi bwenene,bakabo baleka oku kolesa emibiri yabo oku kujira ebishinganine,bajira okurhashinganini oborhere bomukazi. ²⁷ N'abalume kwo no kwo baleka bakabo,bashimbana bone nanene abalume bajira ou babo balume ebirhankaderhwa,nantyo bahabwa omu mibiri yabo oluhembo lukwanine obuhurha bwabo. ²⁹ Bayunjwire obubi bwa ngasi lubero,obushombanyi,okusima eby'enigulu,okugona,okucifinjaebyabene,okunigana,enogwe,oburhebanyi,obwengehuza bubi,akalimi kabi, ³⁰ okushobeka abandi busha,okushomba Nnamahanga,okukajacirana,okucibona,okucikunga,okuba ntwali omu kujira amabi,okuba bigamba, ³¹ okuba bizuzu,ndyalya,baminya,n'okurhayunva lukogo. ³² N'obwo barhahabiri irhegeko lya Nnamahanga oku abajira ebya bene ebyo bali bakufa,kurharhuma barha bijira bone,ciru n'okuha abandi babijira omurhima.